ប្រមុខការទូតកម្ពុជា ថ្កោលទោសថៃ និង អំពាវនាវកុំឲ្យខ្មែរឆ្លងដែនខុសច្បាប់
- Thursday, January 14, 2010, 1:51
- ពត៌មានភាសាខ្មែរ, សេដ្ឋកិច្ច & នយោបាយ
- 2 views
- បញ្ចេញមតិផ្ទាល់ខ្លួន
ដោយ លី ម៉េងហួរ
អត្ថបទ RFI
ថ្ងៃទី 13/01/2010
ប្រមុខការទូតប្រទេសកម្ពុជា លោកឧបនាយករដ្ឋមន្ត្រី ហោ ណាំហុង បានធ្វើការថ្កោលទោសជាថ្មីម្តងទៀត លើទាហានថៃ ដែលបានបាញ់សម្លាប់ គ្មានប្រណីដៃលើពលរដ្ឋខ្មែរនៅជាយដែន។ ពលរដ្ឋខ្មែរ ដែលបាននាំគ្នាចូលឆ្លងដែនខុសច្បាប់ ទៅរកអនុផលព្រៃឈើ នៅលើខ្នងភ្នំដងរែក តំបន់ព្រំដែនកម្ពុជា-ថៃ។
ចំពោះមុខគ្រោះថ្នាក់ជាប្រចាំ ដែលទាហានថៃ បាញ់សម្លាប់ពលរដ្ឋខ្មែរនៅជាយដែន លោកឧបនាយករដ្ឋមន្ត្រី ហោ ណាំហុង បានអំពាវនាវឲ្យពលរដ្ឋខ្មែរ កុំព្យាយាមឆ្លងដែនខុសច្បាប់ទៅកាន់ទឹកដីថៃ ហើយងាកមករកការងារធ្វើនៅក្នុងស្រុកវិញ។
នៅថ្ងៃពុធ ទី១៣មករា ឆ្នាំ ២០១០ លោក ហោ ណាំហុង បានធ្វើការអំពាវនាវ តាមរយៈប្រព័ន្ធឃោសនាមហាជន រួមមាន៖ កាសែត វិទ្យុ និង ទូរទស្សន៍ ដើម្បីឲ្យពលរដ្ឋខ្មែរ កុំឆ្លងដែនទៅស្រុកថៃ ដោយខុសច្បាប់។ ពលរដ្ឋខ្មែរ ក៏គួរតែងាកមកធ្វើការងារនៅក្នុង ស្រុកប្រសើរជាជាង ព្រោះឥឡូវនេះ ការងារក្នុងស្រុកយើង ក៏មានប្រាក់កម្រៃដូចគ្នា នឹងការងារនៅប្រទេសថៃ។ ប៉ុន្តែបើត្រូវចេញទៅធ្វើការនៅក្រៅប្រទេស គឺពលរដ្ឋខ្មែរ ក៏ត្រូវចេញដោយស្របច្បាប់។
កងទ័ពថៃឈរជើងតាមព្រំដែន បានបាញ់សម្លាប់ពលរដ្ឋខ្មែរ យ៉ាងហោចណាស់ ១០ នាក់ គិតចាប់ពីឆ្នាំ ២០០៨ មកទល់នឹងពេលនេះ។ គឺគិតចាប់តាំងពីទាហានថៃ បានលើកទ័ព ចូលមកឈ្លានពានទឹកដីកម្ពុជា នៅព្រំដែនប្រាសាទព្រះវិហារ កាលពីថ្ងៃ ១៥កក្កដា ឆ្នាំ២០០៨។ ចុងក្រោយ គឺនៅថ្ងៃច័ន្ទ ទី១១ មករា ឆ្នាំ ២០១០ ទាហានឈុតខ្មៅថៃ បានបាញ់សម្លាប់ពលរដ្ឋខ្មែរ ២ នាក់ឪពុកកូន នៅលើខ្នងភ្នំដងរែក ជាប់ព្រំដែនប្រទេសកម្ពុជា-ថៃ ក្នុងខេត្តឧត្តរមានជ័យ។
ព្រឹត្តិការណ៍បង្ក្រាបរបស់ទាហានថៃនេះ ក៏មានយុវជនខ្មែរម្នាក់ កាលពីខែកញ្ញា ឆ្នាំមុន ត្រូវទាហានថៃ បាញ់ឲ្យរបួស ហើយចាក់សាំង ដុតទាំងរស់ទៀតផង។ ចំណែកពលរដ្ឋខ្មែរក្រីក្រប្រហែល ២០ នាក់ផ្សេងទៀត ក៏ត្រូវបានរាយការណ៍ថា ត្រូវទាហានថៃ បាញ់ឲ្យរបួស ហើយថៃបានចាប់កាត់ទោស ឲ្យជាប់ពន្ធនាគារយូរឆ្នាំទៀតផង។
មូលហេតុនៃការបង្ក្រាបយ៉ាងចាស់ដៃរបស់ថៃ មកលើពលរដ្ឋកម្ពុជាបែបនេះ ពលរដ្ឋខ្មែរនៅតាមជាយដែនប្រទេសថៃ មានជីវភាពក្រីក្រ តោកយ៉ាក។ អ្នកខ្លះក៏ដាច់ចិត្តចូលព្រៃ រុករកអនុផលព្រៃឈើ នៅលើខ្នងភ្នំដងរែក ក្នុងខេត្តឧត្តរមានជ័យ ជាប់ទល់ដែនប្រទេសថៃ។ អ្នកខ្លះទៅបោចវល្លិ៍ អ្នកខ្លះចូលកាប់ឈើ ពិសេសគ្រញូងដ៏មានតម្លៃ ដោយខុសច្បាប់។ ពលរដ្ឋខ្មែរទាំងនោះ ចូលព្រៃរហូតឆ្លងចូលទឹកដីថៃ។
ចំពោះមុខវិធានការណ៍បង្ក្រាបរបស់ថៃបែបនេះ អាជ្ញាធរប្រទេសកម្ពុជា តាមព្រំដែន បានចេញបម្រាមជាបន្ទាន់ អំពាវនាវកុំឲ្យពលរដ្ឋខ្មែរ ឆ្លងដែនដោយខុសច្បាប់ ទៅកាន់ទឹកដីថៃ ពិសេស ការចូលកាប់ឈើ តាមព្រំដែន ក្នុងទឹកដីថៃ។ ចំណែកចំណាត់ការ ខាងផ្លូវការទូតវិញ ក្រសួងការបរទេសកម្ពុជា ក៏បានធ្វើកំណត់ទូត ទៅកាន់ប្រទេសថៃ ដោយប្រើពាក្យធ្ងន់ៗជាច្រើនលើកច្រើនសារ ព្រមទាំងការថ្កោលទោសចំពោះទង្វើបង្រ្កាបរបស់ថៃ លើពលរដ្ឋខ្មែរឆ្លងដែនខុសច្បាប់ បូករួមទាំងការបាញ់សម្លាប់ពលរដ្ឋខ្មែរ ជាហូរហែមកនេះ។
បន្ថែមលើប្រតិកម្ម តាមបែបការទូតនេះ នៅថ្ងៃពុធ ទី១៣មករានេះតែម្តង លោកប្រមុខការទូតកម្ពុជា ហោ ណាំហុង បានថ្កោលទោស ដោយផ្ទាល់មាត់ម្តងទៀតថា ថៃកាត់ទោសពលរដ្ឋខ្មែរ ដោយការបាញ់សម្លាប់របៀបនេះ ជាអំពើឃោរឃៅ អមនុស្សធម៌ ដែលមិនអាចទទួលយកបាន។
លោកប្រមុខការទូតកម្ពុជា ហោ ណាំហុង បានគូសបញ្ជាក់ថា ទោះជាពលរដ្ឋខ្មែរឆ្លងដែនខុសច្បាប់ និង មានកំហុសយ៉ាងណាក៏ដោយ ថៃត្រូវចាប់គាត់កាត់ទោសតាមច្បាប់ ហើយថៃ ដែលជាប្រទេសប្រជាធិបតេយ្យទំនើបនោះ ក៏គួរតែមានការគោរពសិទ្ធិមនុស្ស និង គោរពច្បាប់អន្តរជាតិ៕
No comments:
Post a Comment