កម្ពុជាស្វែងរកអ្នកផលិតស្បែកជើងមានរូបទង់ជាតិខ្មែរ
- Thursday, January 14, 2010, 1:42
- ពត៌មានភាសាខ្មែរ, សេដ្ឋកិច្ច & នយោបាយ
- 8 views
- បញ្ចេញមតិផ្ទាល់ខ្លួន
ដោយ លាង ដឺលុច
អត្ថបទ RFI
ថ្ងៃទី 13/01/2010
រដ្ឋមន្ត្រីក្រសួងការបរទេសខ្មែរលោក ហោ ណាំហុង បានថ្លែងថា លោកបានបញ្ជាអោយមានការស្រាវជ្រាវរកអ្នកផលិតស្បែកជើងប៉ាតាដែលមានដាក់រូបទង់ជាតិកម្ពុជា។ រដ្ឋមន្ត្រីការបរទេសចាត់ទុកថា ការផលិតស្បែកជើងមានរូបភាពទង់ជាតិខ្មែរនេះ គឺជាការមើលងាយជាតិខ្មែរ។
ស្បែក ជើង មាន រូប ប្រាសាទ អង្គរ ដែល មាន ដាក់ នៅ គេហទំព័រមួយ
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជាបានបញ្ចេញប្រតិកម្មនៅថ្ងៃនេះប្រឆាំងការផលិតស្បែកជើងប៉ាតាដែលមានរូបទង់ជាតិកម្ពុជា។ លោក ហោ ណាំហុង បានថ្លែងថា លោកបានជួបពិភាក្សាជាមួយរដ្ឋមន្ត្រីក្រសួងពាណិជ្ជកម្មលោក ចម ប្រសិទ្ធ រួចហើយ ដើម្បីស្វែងរកទីតាំងផលិតស្បែកជើងនេះ។ បើតាមការអត្ថាធិប្បាយរបស់លោក ហោ ណាំហុង ការផលិតស្បែកជើងដោយមានដាក់រូបទង់ជាតិខ្មែរយ៉ាងនេះ គឺជាការមើលងាយ ដោយសារតែទង់ជាតិដែលមានរូបអង្គវត្ត គឺជាព្រលឹងជាតិខ្មែរ។
ស្បែកជើងប៉ាតាមានដាក់រូបទង់ជាតិអង្គរវត្តកម្ពុជា ត្រូវបានគេរកឃើញក្នុងគេហទំព័រមួយ www.zazzle.com/cambodia_flag_shoes-167999868568277464។ ក្នុងពេលនេះ លោកឧបនាយករដ្ឋមន្ត្រី ហោ ណាំហុង គ្រាន់តែបានបញ្ជាក់អោយដឹងថា គេហទំព័រនេះមានប្រភពមកពីរដ្ឋកាលីហ្វ័រនីញា សហរដ្ឋអាមេរិក។ ប៉ុន្តែកម្ពុជានៅមិនទាន់ដឹងថា តើទីតាំងផលិតស្បែកជើងនេះនៅទីណាពិតប្រាកដឡើយ។ គេហទំព័រនេះបានបង្ហាញ រូបភាពស្បែកជើងប៉ាតាជាច្រើនដែលមានដាក់រូបភាពទង់ជាតិរបស់ប្រទេសផ្សេងៗដូចជា ប្រទេសថៃ អាល់ហ្សេរី កូសូវ៉ូជាដើម។
នេះមិនមែនជាលើកទីមួយទេដែលនិមិត្តរូបនៃព្រលឹងជាតិខ្មែរត្រូវបានគេរកឃើញនៅជាប់នឹងស្បែកជើង។ កាលពីដើមឆ្នាំ២០០៨ អាជ្ញាធរកម្ពុជាក៏បានរកឃើញមានការនាំចូលស្បែកជើងផ្ទាត់ពីប្រទេសវៀតណាម។ ស្បែកជើងផ្ទាត់ដែលមានគូររូបប្រាសាទអង្គរវត្តនៅពីលើ៕
No comments:
Post a Comment