ពលរដ្ឋត្អូញត្អែរពីបញ្ហាប្រេងឥន្ធនៈឡើងថ្លៃ
ដោយ សេក បណ្ឌិត
2010-01-12
វិទ្យុអាស៊ីសេរី
ប្រជាពលរដ្ឋដែលមានមុខរបររត់ម៉ូតូឌុប បើករថយន្តតាក់ស៊ី បានត្អូញត្អែរថា នៅដើមឆ្នាំ២០១០នេះ ប្រេងឥន្ធនៈចាប់ផ្តើមឡើងថ្លៃជាបន្តបន្ទាប់ បញ្ហានេះពួកគាត់អះអាងថា នេះជាបន្ទុកយ៉ាងធ្ងន់ធ្ងរដែលពួកគាត់ចាប់ផ្តើមរែកពុនតាំងពីដើមឆ្នាំនេះតទៅ។
អ្នករត់ម៉ូតូឌុបម្នាក់រស់នៅរាជធានីភ្នំពេញ លោក តាម៉ៅ បានឲ្យដឹងថា តម្លៃប្រេងកាលពីឆ្នាំចាស់មានតម្លៃជាង ៣.០០០រៀល ហើយចូលឆ្នាំថ្មីបានឡើងរហូតដល់ ៤.០០០រៀល ជាបន្តបន្ទាប់ មកដល់ថ្ងៃនេះប្រេងសាំងឡើងដល់ ៤.១៥០រៀល ទៅ ៤.៤០០រៀល។ លោកបន្តថា ចំពោះអ្នកជិះមិនបានឲ្យឈ្នួលឡើងថ្លៃនោះឡើយ។
លោក តាម៉ៅ បានបញ្ជាក់ថា ៖ «ចំពោះអ្នកក្រសំខាន់រឿងសាំងហ្នឹង រឿងរកស៊ី សំខាន់រឿងសាំងហ្នឹង តែសាំងឡើង អ្នកក្រដូចជាយ៉ាប់ដែរ បើវាចុះវិញ អ្នកក្រធូរវិញហើយ ហើយបើសាំងនៅត្រឹម ៣.៥០០(រៀល)ដូចមុន អាហ្នឹងអាចរស់បានស្រួល»។
បុគ្គលិកផ្នែកលក់នៅស្ថានីយប្រេងឥន្ធនៈតូតាល់បានប្រាប់ឲ្យដឹងពីតម្លៃប្រេងសាំងសម្រាប់ថ្ងៃអង្គារ ទី១២ មករានេះ ថា ៖ «ថ្ងៃមុនសាំងស៊ុបពែរ ៤.៣៥៩(រៀល) ហើយនិងសាំងធម្មតាវា ៤.០០០ ហើយឥឡូវវាឡើង ស៊ុបពែរឡើង ១០០ ហើយនិងសាំងធម្មតាឡើង ១៥០»។
អ្នករត់តាក់ស៊ីពីភ្នំពេញទៅខេត្តតាកែវ លោក អន ប៉ុន បានត្អូញត្អែរថា ប្រេងសាំងតែឡើងហើយមិនងាយចុះវិញទេ ដូច្នេះវាជាបន្ទុកមួយធ្ងន់ធ្ងរណាស់សម្រាប់អ្នកមានមុខរបរតូចតាច ក្រីក្រ រកមួយថ្ងៃសម្រាប់រស់មួយថ្ងៃនោះ។
លោក អន ប៉ុន បានឲ្យដឹងថា ៖ «បញ្ហាសាំងឡើងថ្លៃរាល់ថ្ងៃនេះ ម៉្ងៃឡើង៥០(រៀល) ម៉្ងៃឡើង១០០ៗរហូត ហើយថ្ងៃណាក៏ឡើងថ្លៃៗ ហើយដល់ពេលអ្នកជិះសព្វដងយើងដាក់ ១២.០០០ ឥឡូវហ្នឹងអ្នកជិះរកលុយអត់បាន សុំតែ ១ម៉ឺន អ្នកខ្លះឲ្យ ៨ពាន់ ចេះតែដាក់ៗទៅ វាពិបាកពេក!»។
ប្រជាពលរដ្ឋសូមឲ្យរដ្ឋាភិបាលជួយទប់ស្កាត់ពីបញ្ហានេះ ពោលគឺកុំឲ្យប្រេងឥន្ធនៈឡើងថ្លៃជាបន្តទៀត ៖ «សំណូមពរឲ្យវាបានចុះទៅ ក៏វាល្អជាងវាឡើងដូចរាល់ថ្ងៃ។ សំណូមពរឲ្យរាជរដ្ឋាភិបាលយកចិត្តទុកដាក់ សាំងហ្នឹងកុំឲ្យចេះតែឡើងរហូតពេក ឲ្យវាបានចុះខ្លះទៅ ធ្វើឲ្យពួកខ្ញុំតាក់ស៊ីស្រណុករកស៊ីផង ហើយណាមួយយើងដាក់ទៅតម្លៃទាបបន្តិចទៅ ធ្វើឲ្យជីវភាពប្រជាជនក៏វាធូរធារតាមហ្នឹងដែរ ខ្ញុំក៏ស្រណុករកម៉ូយ គ្នាក៏ស្រណុករកលុយជិះដែរ!»។
ស្ថានីយប្រេងឥន្ធនៈនៅប្រទេសកម្ពុជាដែលគេនិយមចូលចិត្តមានកាល់តិច, តូតាល់, តេលា និងសូគីម៉ិច ចំពោះតម្លៃខុសគ្នាបន្តិចបន្តួចទៅតាមគុណភាពប្រេង។
វិទ្យុអាស៊ីសេរីមិនទាន់អាចទាក់ទងមន្រ្តីរដ្ឋាភិបាលដើម្បីពន្យល់ពីបញ្ហាសាំងចាប់ផ្តើមឡើងថ្លៃបានទេ នៅថ្ងៃទី១២ មករា។ ប៉ុន្តែអ្នកគ្រប់គ្រងស្ថានីយប្រេងឥន្ធនៈនីមួយៗបានពន្យល់ដោយលើកហេតុផលថា តម្លៃប្រេងឥន្ធនៈឡើងថ្លៃគឺវាអាស្រ័យទៅលើតម្លៃប្រេងនៅក្រៅប្រទេសមានការប្រែប្រួលឡើងថ្លៃដែរ៕
No comments:
Post a Comment