បក្សសមរង្ស៊ីប្រមូលអ្នកគាំទ្រដើម្បីសុំឲ្យលើកលែងទោសប្រធានបក្ស
- Monday, January 11, 2010, 13:26
- ពត៌មានពិសេស, ពត៌មានភាសាខ្មែរ, សេដ្ឋកិច្ច & នយោបាយ
- 2 views
- បញ្ចេញមតិផ្ទាល់ខ្លួន
ដោយ ម៉ៅ សុធានី
2010-01-11
វិទ្យុអាស៊ីសេរី
គណបក្សសមរង្ស៊ីប្រមូលអ្នកគាំទ្របានជាង ២០ម៉ឺននាក់ ដើម្បីទូលសុំព្រះមហាក្សត្រខ្មែរនិងរដ្ឋសភាលើកលែងការចោទប្រកាន់ដល់លោកប្រធានគណបក្សសមរង្ស៊ី។
ប្រធាន គណបក្ស សមរង្ស៊ី លោក សម រង្ស៊ី (RFA/AYUTHYEA)
លោកតំណាងរាស្ត្រ ហូ វ៉ាន់ នៃគណបក្សសមរង្ស៊ី បានមានប្រសាសន៍ថា គណបក្សលោកបានប្រមូលស្នាមមេដៃប្រជាពលរដ្ឋគាំទ្រប្រមាណជាង ២០ម៉ឺននាក់ហើយដើម្បីដាក់ថ្វាយព្រះមហាក្សត្រខ្មែរ សម្តេចព្រះនរោត្តម សីហមុនី និងសភាជាតិ ដើម្បីសុំលើកលែងការចោទប្រកាន់លោក សម រង្ស៊ី ពីបទថាបានបំផ្លាញទ្រព្យសម្បត្តិសាធារណៈ និងបទញុះញង់ឲ្យមានការរើសអើងជាតិសាសន៍ចំពោះការដកតម្រុយបង្គោលព្រំដែនកម្ពុជា-វៀតណាម កាលពីថ្ងៃទី២៥ ខែតុលា ឆ្នាំ២០០៩កន្លងមកនេះ។
កាសែតភ្នំពេញប៉ុស្តិ៍បានឲ្យដឹងថា លោកតំណាងរាស្ត្រ ហូ វ៉ាន់ បានមានប្រសាសន៍បញ្ជាក់ផងដែរថា ញតិ្តដែលដាក់ថ្វាយព្រះមហាក្សត្រនោះពុំមែនសុំឲ្យលើកលែងទោសឡើយ ពីព្រោះលោក សម រង្ស៊ី នៅមិនទាន់បានត្រូវតុលាការខេត្តស្វាយរៀងកាត់ទោសនៅឡើយទេ។
លោកតំណាងរាស្ត្រ ជាម យៀប នៃគណបក្សប្រជាជនកម្ពុជា និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសនវកម្ម នៃសភាជាតិ បានមានប្រតិកម្មថា ញត្តិដែលគណបក្សសមរង្ស៊ី បម្រុងថ្វាយព្រះមហាក្សត្រនោះ គឺពុំត្រឹមត្រូវឡើយ ពីព្រោះថា មានតែតុលាការខេត្តស្វាយរៀងប៉ុណ្ណោះទេដែលអាចលើកលែងការចោទប្រកាន់ទោសឧក្រិដ្ឋលើរូបលោក សម រង្ស៊ី បាន។
តាមការអះអាងរបស់លោក ជូង ជូងី មេធាវីការពារក្តីឲ្យលោក សម រង្ស៊ី បានថ្លែងថា តុលាការខេត្តស្វាយរៀងគ្រោងនឹងបើកសវនាការកាត់ទោសលោក សម រង្ស៊ី កំបាំងមុខនៅថ្ងៃទី២៧ ខែមករា ខាងមុខនេះហើយ។
លោក សម រង្ស៊ី ប្រធានគណបក្សសមរង្ស៊ី ដែលកំពុងស្នាក់នៅក្រៅប្រទេស បានមានប្រសាសន៍ប្រាប់វិទ្យុអាស៊ីសេរីកាលពីពេលថ្មីៗនេះថា លោកនឹងវិលត្រឡប់ទៅកម្ពុជាវិញដើម្បីប្រឈមមុខជាមួយនឹងតុលាការខេត្តស្វាយរៀង ប៉ុន្តែគឺក្នុងលក្ខខណ្ឌដែលតុលាការត្រូវតែដោះលែងប្រជាពលរដ្ឋ ២នាក់ និងប្រគល់ដីស្រែចម្ការដល់ពលរដ្ឋដែលបាត់បង់ជាមុនសិន។
លោក សម រង្ស៊ី បានបញ្ជាក់ថា ៖ «ខ្ញុំនឹងទៅ ខ្ញុំចង់ឲ្យតុលាការកាត់ទោសខ្ញុំ កាត់យ៉ាងម៉េចកាត់ទៅ តែមុននឹងខ្ញុំត្រឡប់ទៅវិញឲ្យគេកាត់ទោសបែបហ្នឹង ខ្ញុំសុំឲ្យគេដោះលែងប្រជារាស្ត្រខ្មែរដែលត្រូវគេចាប់ដាក់គុក ហើយបន្ទាប់ពីដោះលែង ខ្ញុំសុំឲ្យប្រគល់ដីធ្លីសងពួកគាត់វិញ តែដោះស្រាយបញ្ហាប្រជារាស្ត្រខ្មែរសិន ព្រោះបញ្ហានេះមិនមែនបញ្ហា សម រង្ស៊ី ទេ គឺបញ្ហាប្រជារាស្ត្រខ្មែររងគ្រោះដោយអំពើអយុត្តិធម៌ ហើយបន្ទាប់ពីអ្នកដែលជាប់ឃុំឃាំងត្រូវបានដោះលែង ហើយត្រូវបានប្រគល់ដីស្រែជូនគាត់វិញ ពេលនោះខ្ញុំវិលត្រឡប់ទៅប្រទេសកម្ពុជាវិញ ឲ្យគេយកខ្ញុំទៅធ្វើអីធ្វើទៅ!»។
សូមជម្រាបជូនផងដែរថា តំណាងរាស្ត្រគណបក្សសមរង្ស៊ីទាំង ២៥រូប មានគម្រោងចុះសួរសុខទុក្ខអ្នកស្រី មាស ស្រី និងលោក ព្រំ ជា នៅថ្ងៃទី១៩ ខែមករាខាងមុខនេះ ដែលអ្នកទាំងពីរកំពុងជាប់ក្នុងពន្ធនាគារនៅក្នុងខេត្តស្វាយរៀង ពីបទចោទប្រកាន់ថា បានបំផ្លាញទ្រព្យសម្បត្តិសាធារណៈ ដោយបានដកតម្រុយបង្គោលព្រំដែនកម្ពុជាវៀតណាមនៅថ្ងៃជាមួយលោក សម រង្ស៊ី៕
No comments:
Post a Comment