កិច្ចសហប្រតិបត្តិការកម្ពុជា-ចិនកាន់តែស៊ីជម្រៅ
- Monday, January 11, 2010, 10:28
- ពត៌មានភាសាខ្មែរ, សេដ្ឋកិច្ច & នយោបាយ
- 18 views
- បញ្ចេញមតិផ្ទាល់ខ្លួន
ដោយ ប៉ែន បូណា
អត្ថបទ RFI
ថ្ងៃទី 10/01/2010
បើទោះបីជាកម្ពុជានិងចិនមានទំនាក់ទំនងការទូតជាមួយគ្នាយ៉ាងស្អិតល្មួតហើយក៏ដោយ ក៏ប្រទេសទាំងពីរនេះនៅតែបន្តពង្រឹងចំណងទាក់ទងការទូតរបស់ខ្លួនឲ្យកាន់តែរឹងមាំថែមទៀតឥតឈប់ឈរ។
ការអនុម័តសេចក្តីព្រាងអនុសញ្ញាកុងស៊ុលកម្ពុជាចិនពីសំណាក់គណៈរដ្ឋមន្ត្រីកម្ពុជាកាលពីថ្ងៃសុក្រគឺជាភស្តុតាងថ្មីទៀតដែលបង្ហាញពីការបង្កើនទំនាក់ទំនងនិងកិច្ចសហប្រតិបត្តិការឲ្យកាន់តែស៊ីជម្រៅថែមទៀតរវាងប្រទេសទាំងពីរ។
កម្ពុជា និង ចិន ចុះ ហត្ថលេខា លើ កិច្ច ប្រតិបត្តិ ការ ទ្វេភាគី
រដ្ឋាភិបាលកម្ពុជាទើបតែបានអនុម័តសេចក្តីព្រាងអនុសញ្ញាកុងស៊ុលកម្ពុជាចិនកាលពីថ្ងៃសុក្រទី៨មករាចុងសប្តាហ៍នេះនៅក្នុងអង្គប្រជុំគណៈរដ្ឋមន្ត្រីដែលតែងតែប្រព្រឹត្តទៅនៅរៀងរាល់ចុងសប្តាហ៍។
អនុសញ្ញាកុងស៊ុលកម្ពុជាចិន គឺជាលិខិតបទដ្ឋានគតិយុត្តថ្មីមួយទៀតក្នុងក្របខណ្ឌនៃកិច្ចសហប្រតិបត្តិការទ្វេភាគីរវាងប្រទេសទាំងពីរដែលកំពុងតែបពង្រឹងនិងបង្កើនល្បឿនចំណងទាក់ទងការទូតរបស់ខ្លួនយ៉ាងលឿនស្លេវគួរឲ្យកត់សម្គាល់នារយៈពេលចុងក្រោយនេះ។
បើយោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីដែលត្រូវបានគេផ្សព្វផ្សាយជាសាធារណៈនៅចុងសប្តាហ៍នេះ ការបង្កើតអនុសញ្ញាកុងស៊ុលកម្ពុជា-ចិនគឺដើម្បីឆ្លើយតបទៅនឹងការរីកចម្រើនជាលំដាប់នៃទំនាក់ទំនងសេដ្ឋកិច្ចពាណិជ្ជកម្ម ការវិនិយោគនិងទេសចរណ៍រវាងប្រទេសទាំងពីរ។
អនុសញ្ញាកុងស៊ុលនេះមាន គោលដៅជាចម្បងសម្រាប់ការពារផលប្រយោជន៍របស់ពលរដ្ឋនៃប្រទេសទាំងពីរ។
អនុសញ្ញាកុងស៊ុលកម្ពុជាចិននេះមានខ្លឹមសារគ្របដណ្តប់លើវិស័យជាច្រើន ដូចជាអត្រានុកូលដ្ឋាន សារការីកម្ម នីត្យានុកូលកម្ម ការស្នងមរតករហូតដល់បញ្ហានាវានិងយន្តហោះថែមទៀត។ គឺជាអនុសញ្ញាដែលមានលំនាំដូចជាអនុសញ្ញាទីក្រុង វីយែនឆ្នាំ ១៩៦៣ដោយមានការតាក់តែងលម្អិតបន្ថែមទៅតាមសេចក្តីត្រូវការជាក់ស្តែងរបស់ប្រទេសទាំងពីរ។
សូមបញ្ជាក់ថាបច្ចុប្បន្ននេះ កម្ពុជាមានស្ថានអគ្គកុងស៊ុលរបស់ខ្លួនចំនួន ៧នៅក្នុងប្រទេសចិនដែលមានទីតាំងនៅក្នុងក្រុង ហុងកុង ម៉ាកាវ សៀងហៃ ក្វាងចូវ ចុងគីង ណាននីងនិងទីក្រុង គួនមិង។ កម្ពុជាគ្រោងនឹងបង្កើនចំនួនអគ្គកុងស៊ុលរបស់ខ្លួនបន្ថែមទៀតនៅក្នុងមហាប្រទេសចិន។
ទំនាក់ទំនងចាក់ទឹកមិនលិចរវាងរដ្ឋាភិបាលក្រុងប៉េកាំងនិងភ្នំពេញបានស្តែងឡើងតាមរយៈការផ្តល់ជំនួយដ៏ច្រើនសន្ធឹកសន្ធាប់របស់ចិនដល់ប្រទេសកម្ពុជា។ គឺជាជំនួយដែលគ្មានភ្ជាប់ដោយល័ក្ខខ័ណ្ឌអ្វីទាំងអស់ហើយដែលលោកនាយករដ្ឋមន្ត្រីហ៊ុនសែន តែងតែកោតសរសើរមិនដាច់ពីមាត់និងបានតបវិញដោយការគាំទ្រឥតងាករេនយោបាយចិនតែមួយ។
ទំនាក់ទំនងបេះមិនដាច់នេះហើយដែលនាំឲ្យកម្ពុជាសម្រេចចិត្តចាប់បញ្ជូនជនភៀសខ្លួនជាតិអ៊ុយហ្គួរចំនួន ២០នាក់ត្រឡប់ទៅប្រទេសចិនវិញកាលពីថ្ងៃ ១៩ធ្នូឆ្នាំ ២០០៩ទៅតាមសំណើរបស់ទីក្រុងប៉េកាំង។ ទង្វើនេះបាននាំឲ្យមានការរិះគន់យ៉ាងខ្លាំងពីសំណាក់អ្នកការពារសិទ្ធិមនុស្សនិងពីសហគមន៍អន្តរជាតិ៕
No comments:
Post a Comment