ពិធីករទូរទស្សន៍លោក ឈួន សុខច័ន្ទ ទទួលមរណភាព
- Friday, January 15, 2010, 7:19
- ពត៌មានភាសាខ្មែរ
- 61 views
- បញ្ចេញមតិផ្ទាល់ខ្លួន
រាជធានីភ្នំពេញ ៖ ពិធីករស្ថានីយទូរទស្សន៍កងយោធពលខេមរភូមិន្ទប៉ុស្ដិ៍លេខ៥ លោកឈួន សុខច័ន្ទ បានទទួលមរណភាពហើយ កាលពីវេលាម៉ោង៦និង៣០នាទីព្រឹកថ្ងៃទី១៤ មករា ឆ្នាំ២០១០ នៅមន្ទីរពេទ្យកាល់ម៉ែត ដោយសារជម្ងឺរលាកទងសួត ។ សពបានតំកល់ទុករៀបចំធ្វើបុណ្យតាមប្រពៃណីនៅវត្ដសារាវន្ដ័តេជោ ហើយនឹង ដង្ហែយកទៅបូជានៅវត្ដសន្សំកុសលនាវេលាម៉ោង៨ព្រឹកថ្ងៃសៅរ៍ទី១៦ មករា ឆ្នាំ ២០១០ ។
ម្ដាយរបស់លោកឈួន សុខច័ន្ទ គឺអ្នកស្រី ហម បានមានប្រសាសន៍ថា កូនប្រុសរបស់អ្នកស្រីមានជម្ងឺនិងយកទៅព្យាបាលបានតែរយៈពេល២ថ្ងៃប៉ុណ្ណោះ ក៏ទទួលមរណភាពតែម្ដង ដែលធ្វើឱ្យបងប្អូនមានការស្រណោះអាឡោះអាល័យយ៉ាងខ្លាំង ។ ក្រុមគ្រូពេទ្យបានប្រាប់ថា កូនរបស់គាត់មានជម្ងឺរលាកទង សួតធ្ងន់ធ្ងរមិនអាចជួយសង្គ្រោះបានទាន់ពេលវេលាទេ ។
លោកឈួន សុខច័ន្ទ គឺជាពិធីករដ៏មានប្រជាប្រិយភាពប្រចាំស្ថានីយទូរទស្សន៍កងយោធពលខេមរភូមិន្ទប៉ុស្ដិ៍លេខ៥ ។ លោកមានសំនួនវោហារឆ្លើយឆ្លងជាមួយពិធីការិនីជាដៃគូយ៉ាងពីរោះក្បោះក្បាយធ្វើឱ្យទស្សនិកជនជក់ចិត្ដដិតអារម្មណ៍ និងពេញចិត្ដយ៉ាងខ្លាំង ។ ក្រៅពីមាននាទីជាពិធីករក្នុងកម្មវិធីអាថ៌កំបាំងនៃចក្រវាល, រាត្រីអស្ចារ្យ និងវិទ្យាសាស្ដ្របច្ចុប្បន្ន លោកសុខច័ន្ទ ក៏ជាអ្នកអានព័ត៌មានដ៏មានថ្វីមាត់ម្នាក់ និងជាអ្នកចម្រៀងម្ដងម្កាលដែរ ។ ទោះបីជាមាន អាជីពច្បាស់លាស់ក្ដី លោកសុខច័ន្ទ នៅតែឆ្លៀតសិក្សាគឺ លោកជានិស្សិតភាសាអង់គ្លេសនៅវិទ្យាស្ថាន ELT ។
លោកសុខច័ន្ទ មានស្រុកកំណើតនៅស្រុកល្វាឯម ខេត្ដកណ្ដាល និងមានបងប្អួន៧នាក់ ក្នុងនោះរូបលោកជាកូនច្បង ។ មរណភាពរបស់លោកឈួន សុខច័ន្ទ គឺជាការបាត់បង់នូវធនធានមនុស្សក្នុងវិស័យសារព័ត៌មានគួរឱ្យសោកស្ដាយយ៉ាងខ្លាំង ។ ការ បាត់ស្រមោលលោកពីលើលោកនេះ ប្រាកដជាធ្វើឱ្យមិនត្រឹមតែក្រុមគ្រួសារប៉ុណ្ណោះទេ គឺប្រិយមិត្ដទូរទស្សនិកជនទូទាំងប្រទេស អាឡោះអាល័យយ៉ាងខ្លាំង ។ តាងនាមអ្នកសារព័ត៌មានទាំងអស់ និងប្រិយមិត្ដទស្សនិកជនទូទាំងប្រទេស យើងសូមបួងសួង និងឧទ្ទិសដល់វិញាណក្ខន្ធលោកឈួន សុខច័ន្ទ បានទៅដល់សុគតិភពចុះ ៕
No comments:
Post a Comment