ចាប់ផ្តើមស្ថាបនាខ្សែយោងឡើងទៅប្រាសាទតាក្របី
- Friday, January 15, 2010, 6:26
- ពត៌មានភាសាខ្មែរ
- 21 views
- បញ្ចេញមតិផ្ទាល់ខ្លួន
ការស្ថាបនា ខ្សែ យោង ឡើងទៅ ប្រាសាទ តា ក្របី កំពុង ចាប់ផ្តើម
ព្រំដែនកម្ពុជា-សៀម: ខ្សែយោងដែលកាត់ត្រង់ចំណោតភ្នំដងរែក ឡើងឆ្ពោះទៅកាន់ប្រាសាទតាក្របី ដែលកាន់កាប់ទាំងស្រុងដោយកងកម្លាំង កម្ពុជា និងស្ថិតក្នុងដែនដីកម្ពុជានោះ ត្រូវបានបើកការដ្ឋានស្ថាបនាហើយកាលពីថ្ងៃទី១២ ខែមករា ឆ្នាំ២០១០ ។
លោក ប៉ិច សុខិន អភិបាលខេត្តឧត្តរមានជ័យ និងជាទីប្រឹក្សាសម្តេចនាយករដ្ឋមន្ត្រី ហ៊ុន សែន និងលោកឧត្តមសេនីយ៍ឯក កែវ ពង្ស មន្ត្រីជាន់ ខ្ពស់កងយោធពលខេមរភូមិន្ទបានចូលរួមជាអធិបតីក្នុងពិធីបើកការដ្ឋាននោះ ។
លោកឧត្តមសេនីយ៍ឯក កែវ ពង្ស និយាយចំពោះមុខកងកម្លាំងមន្ត្រីរាជការ និងពលរដ្ឋជាច្រើនក្នុងពិធីនោះថា ការស្ថាបនាផ្លូវខ្សែយោងពីជើងភ្នំ ឡើងកាត់ត្រង់ទៅលើខ្នងភ្នំនាចំណុចប្រាសាទតាក្របី ស្ថិតក្នុងឃុំគោកខ្ពស់ ស្រុកបន្ទាយអម្ពិល ខេត្តឧត្តរមានជ័យនោះ គឺមានប្រវែង ៤០០ ម៉ែត្រ ។ ការ ស្ថាបនាត្រូវមាន ៣ ដំណាក់កាល និងបត់បែនដ៏ស្មុគស្មាញផង ។ ការស្ថាបនាបណ្តើរៗមានរយៈពេល ១ខែមកហើយ និងទើបរកថ្ងៃមានឫក្សល្អ បើកសម្ពោធការដ្ឋាននាពេលនេះ ។ គឺដំណាក់កាលទី១ បានចាក់គ្រឹះបំពាក់ដែករ៉ៃប្រវែង ១៨០ម៉ែត្រ ។ ឥឡូវបន្តស្ថាបនាដំណាក់កាលទី២ និងទី៣ ។
កងទ័ព ឈុតខ្មៅ សៀម ដែល ឈ្លានពាន ចូល ប្រាសាទ តា ក្របី នា ពេលកន្លងមក
លោកឧត្តមសេនីយ៍ឯក កែវ ពង្ស និយាយថា កងកម្លាំងវិស្វកម្ម និងជាងមានការលំបាកស្មុគស្មាញខ្លាំង ពេលស្ថាបនាកាត់ចំណោតភ្នំខ្ពស់បត់បែន និងព្រៃក្រាស់ៗ ។ ពោលគឺលំបាកទាំងដឹកសម្ភារៈ ការស្ថាបនាឱ្យរឹងមាំ ។ គេបានប្រើខ្សែកាបដែកយោងសម្រាប់ទាញកន្ត្រកឡើងលើភ្នំនៅប្រាសាទតា ក្របីនេះមានទំហំមុខកាត់ធំជាងខ្សែយោងនៅភ្នំត្រប់ តំបន់ប្រាសាទព្រះ វិហារទៅទៀត ។
ទោះយ៉ាងណា ដោយការគាំទ្រឧបត្ថម្ភពីថ្នាក់ដឹកនាំកម្ពុជា ការងារនេះបានដំណើរការទៅមុខជាលំដាប់ ។ កងកម្លាំងជាមុខអាជ្ញាធរដែនដីនៅខេត្ត ឧត្តរមានជ័យបានសហការជ្រោមជ្រែងខ្លាំងណាស់ ។ វាជាសមិទ្ធផលគមនាគមន៍ទៅប្រាសាទតាក្របីដ៏សំខាន់ បន្ទាប់ពីមានការយាយីប៉ុនប៉ងរំលោភឈ្លាន ពានយកពីសំណាក់កងកម្លាំងសៀម និងបន្ទាប់ពីកងកម្លាំងមន្ត្រីរាជការ ពលរដ្ឋកម្ពុជា រហូតដល់លោក សាយ ឈុំ ប្រធានគណៈប្រចាំការគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានទី២ រដ្ឋសភាបានទៅកាន់ប្រាសាទនេះ ។
លោក ប៉ិច សុខិន អភិបាលខេត្តឧត្តរមានជ័យ និងជាទីប្រឹក្សាផ្ទាល់ សម្តេចនាយករដ្ឋមន្ត្រី ហ៊ុន សែន និយាយថា កងកម្លាំងយើងទ្រោលបាន សភាពការណ៍ព្រំដែន និងការពាររឹងមាំបូរណភាពទឹកដី ហើយគោរពបទបញ្ជាអត់ធ្មត់ខ្ពស់ និងដោះស្រាយបញ្ហាប្រឈមដោយសន្តិវិធី ។
លោក ប៉ិច សុខិន និយាយថា ខ្សែយោងឡើងទៅប្រាសាទតាក្របីនេះ បានទទួលការឧបត្ថម្ភថវិកាពីលោក សាយ ឈុំ ដើម្បីលើកកម្ពស់ប្រព័ន្ធ គមនាគមន៍ទំនាក់ទំនង និងកិច្ចការពារព្រំដែន ។ វាក៏ជួយលើកកម្ពស់ជីវភាពប្រជាពលរដ្ឋ និងវិស័យទេសចរណ៍ ៕
No comments:
Post a Comment