ខួប ១ ឆ្នាំ នៃសម្ព័ន្ធភាពគណបក្សសមរង្ស៊ី និង គណបក្សសិទ្ធិមនុស្ស, បង្ហាញពីសញ្ញាបែកបាក់?
- Friday, January 15, 2010, 6:12
- ពត៌មានភាសាខ្មែរ, សេដ្ឋកិច្ច & នយោបាយ
- 13 views
- បញ្ចេញមតិផ្ទាល់ខ្លួន
ពិធី ចុះហត្ថលេខា លើ កិច្ចព្រមព្រៀង សម្ព័ន្ធភាព រវាង គណបក្ស សមរង្ស៊ី និង គណបក្ស សិទ្ធិមនុស្ស កាលពី ថ្ងៃ ទី ១៥ មករា ឆ្នាំ ២០០៩ ។ ក៏ប៉ុន្តែ ១ ឆ្នាំ មកនេះ មិន បាន ចេញ ជា លទ្ធផល វិជ្ជមាន ទេ តែ ងាក ទៅរក ការបែកបាក់ ទៅវិញ ។
ភ្នំពេញ: ថ្ងៃ ១៥ មករា ២០១០, ថ្ងៃស្អែកនេះ គឺគម្រប់ខួប ១ ឆ្នាំ នៃថ្ងៃចុះកិច្ចព្រមព្រៀងសម្ព័ន្ធភាព រវាងគណបក្សសមរង្ស៊ី និង គណបក្សសិទ្ធិមនុស្ស ។ ជាសម្ព័ន្ធភាព ដែលមានត្រឹមតែឈ្មោះ ហើយនៅថ្ងៃខួបនេះ បែរជាបង្ហាញសញ្ញា នៃការបែកបាក់ទៅវិញ ។
យោងតាមមន្ត្រីជាន់ខ្ពស់ដ៏មានឥទ្ធិពលម្នាក់ នៅក្នុងគណបក្សសមរង្ស៊ី បានប្រាប់អ្នកកាសែត ក្នុងន័យមិនឲ្យចេញឈ្មោះ ឲ្យដឹងថា ពេលនេះកុំនិយាយពីរឿងសម្ព័ន្ធភាពរវាងបក្សសមរង្ស៊ី និង បក្សសិទ្ធិមនុស្សទៀត ។ គឺគ្មានន័យអ្វីទេ ។
ការមិនឲ្យនិយាយដល់សម្ព័ន្ធភាពគណបក្សដែលអះអាងថា ប្រជាធិបតេយ្យរៀងៗខ្លួននេះ បានត្រូវមន្ត្រីជាន់ខ្ពស់គណបក្ស សមរង្ស៊ី សង្កត់ធ្ងន់ថា គណបក្សសិទ្ធិមនុស្សរបស់លោក កឹម សុខា បានធ្វើការរិះគន់គណបក្សសមរង្ស៊ី តាមរលកវិទ្យុសំបុកឃ្មុំ របស់ លោក ម៉ម សូណង់ដូ ឥតឈប់ឈរ ។ នេះប្រៀបដូចជាពាក្យថា ស្រឡាញ់កូនស្រីគេ ហើយចង់ដណ្តឹងកូនស្រីគេ ក៏ប៉ុន្តែអ្នកនោះ បែរជាជេរឪពុកម្តាយគេទៅវិញ ។ តើគេយល់ព្រមដែរឬទេ? ។ ហេតុនេះ ឈប់និយាយពីសម្ព័ន្ធភាពជាមួយគ្នាតទៅទៀត ។
ទោះជាយ៉ាងណាក៏ដោយ ជាបន្តបន្ទាប់ ពិសេសនៅថ្ងៃដាច់ឆ្នាំ ២០០៩ ចូលឆ្នាំ ២០១០ កាលពីថ្ងៃ ១ មករា លោក កឹម សុខា ក៏បានធ្វើការអំពាវនាវជាចំហរម្តងទៀត ដើម្បីឲ្យមានការរួបរួមរវាងគណបក្សសមរង្ស៊ី ជាមួយនឹងគណបក្សរបស់លោក ។ ក៏ប៉ុន្តែ បក្សសមរង្ស៊ីមិនឆ្លើយតបអ្វីទេ ។
ពិធី ចុះហត្ថលេខា លើ កិច្ចព្រមព្រៀង សម្ព័ន្ធភាព រវាង គណបក្ស សមរង្ស៊ី និង គណបក្ស សិទ្ធិមនុស្ស កាលពី ថ្ងៃ ទី ១៥ មករា ឆ្នាំ ២០០៩ ។ ក៏ប៉ុន្តែ ១ ឆ្នាំ មកនេះ មិន បាន ចេញ ជា លទ្ធផល វិជ្ជមាន ទេ តែ ងាក ទៅរក ការបែកបាក់ ទៅវិញ ។
ទោះជាយ៉ាងណាក៏ដោយ នៅថ្ងៃ១៤ មករានេះ គេមិនអាចទាក់ទងលោក កឹម សុខា ប្រធានគណបក្សសិទ្ធិមនុស្សបានទេ ដោយលោក កំពុងតែបំពេញទស្សនកិច្ចនៅសហរដ្ឋអាមេរិក ។
ក៏ប៉ុន្តែ លោក យ៉ែម ប៊ុញ្ញឫទ្ធិ អគ្គលេខាធិការគណបក្សសិទ្ធិមនុស្ស បាននិយាយពីចំណុចវិជ្ជមានច្រើន លើសម្ព័ន្ធភាព ជាមួយនឹងគណបក្សសមរង្ស៊ី ។ លោកអះអាងថា ក្រុមការងារទាំងពីរគណបក្សកំពុងជជែកបន្តលើការចងសម្ព័ន្ធភាព ហើយលោកសង្ឃឹមថា នឹងទទួលបានលទ្ធផលវិជ្ជមានទៅថ្ងៃមុខ ។
កាលពីថ្ងៃទី ១៥ មករា ឆ្នាំ ២០០៩ នៅទីស្នាក់ការគណបក្សសម រង្ស៊ី លោក សម រង្ស៊ី និង លោក កឹម សុខា បានអង្គុយកាន់ប៊ិច ចុះហត្ថលេខារួមគ្នា ចំពោះមុខអ្នកកាសែត ដើម្បីបង្កើតនូវសម្ព័ន្ធភាពថ្មីមួយ ដែលមានឈ្មោះថា ចលនានយោបាយប្រជាធិបតេយ្យ ដើម្បីការផ្លាស់ប្តូរ ។ ជាកិច្ចព្រមព្រៀង ដែលជាគោលនយោបាយរួម គឺគណបក្សត្រូវរួមគ្នាបង្កើតជាបញ្ជីបេក្ខជនតែមួយសម្រាប់ការ បោះឆ្នោតជ្រើសរើសក្រុមប្រឹក្សាឃុំសង្កាត់ នៅឆ្នាំ២០១២ និង សម្រាប់ការបោះឆ្នោតជាសកលជ្រើសតាំងតំណាងរាស្ត្រ នៅឆ្នាំ២០១៣ ។
ក៏ប៉ុន្តែសម្រេចសម្រួចទៅ គណបក្សដែលតាំងខ្លួនថា ជាគណបក្សប្រជាធិបតេយ្យទាំង២ ព្រមព្រៀងរួបរួម ចងជាសម្ព័ន្ធភាព បានត្រឹមតែលើក្រដាស ហើយរាល់ការចរចារវាងថ្នាក់ដឹកនាំគណបក្សទាំង ២ ជាច្រើនលើកច្រើនសារកន្លងមក មិនទទួលបានលទ្ធផល អ្វីទាល់តែសោះ ដើម្បីឲ្យគណបក្សទាំងពីរ ឈានទៅសម្រេចបាននូវគោលបំណងរួបរួមនេះបានឡើយ ៕
No comments:
Post a Comment