សង្ឃ២អង្គបិណ្ឌបាតក្នុងផ្សារខុសពីសង្ឃដទៃម្នាក់អត់កោររោមចិញ្ចើម ម្នាក់ស្លៀកលីអូ
- Friday, January 15, 2010, 14:44
- ពត៌មានភាសាខ្មែរ
- 37 views
- បញ្ចេញមតិផ្ទាល់ខ្លួន
ខេត្ដតាកែវ ៖ សមត្ថកិច្ចប៉ូលិសប៉ុស្ដិ៍រដ្ឋបាលឃុំត្រាំកក់ ស្រុកត្រាំកក់ បានឃាត់សង្ឃ២អង្គយកមកសាកសួរ ខណៈពេលដែលសង្ឃទាំង២អង្គនោះបានធ្វើសកម្មភាពនិមន្ដបិណ្ឌបាតលុកលុយពេញក្នុងផ្សារត្រាំកក់ ដែលខុសប្លែកពីការនិមន្ដបិណ្ឌបាតរបស់ព្រះសង្ឃដទៃទៀត ។ ហេតុការណ៍នេះបានកើតឡើងកាលពីថ្ងៃទី១៣ មករា ២០១០ វេលាម៉ោង៨និង៣០នាទីព្រឹកនៅក្នុងផ្សារត្រាំកក់ ខេត្ដតាកែវ ។
ទាក់ទិននឹងករណីខាងលើនេះ លោកមេប៉ុស្ដិ៍រដ្ឋបាលឃុំត្រាំកក់បានឱ្យដឹងថា នៅព្រឹកថ្ងៃទី១៣ មករា មានប្រជាពលរដ្ឋមករាយការណ៍ប្រាប់លោកថា មានសង្ឃ២អង្គកំពុងតែនិមន្ដបិណ្ឌបាតពេញក្នុងផ្សារតាមកន្លែងលក់ត្រី លក់សាច់ លក់បន្លែ និងកន្លែងផ្សេងៗទៀត ដោយមានមួយអង្គអត់កោរចិញ្ចើមទេ ។ ពេលឮប្រជាពលរដ្ឋប្រាប់ដូច្នេះ រូបលោកនិងសហការី២នាក់ទៀតបានចូលទៅក្នុងផ្សារដើម្បីឃាត់សង្ឃទាំង២អង្គនោះ យកមកសាកសួរនៅប៉ុស្ដិ៍ និងឆែកឆេរមើលឆាយា ហើយបានឃើញថាមានសង្ឃ១អង្គគ្រងស្បង់ចីវរត្រឹមត្រូវ ប៉ុន្ដែស្លៀកខោស្លីបនៅខាងក្នុង និងពុំមានលិខិតស្នាមបញ្ជាក់ថា ជាសង្ឃបួសនៅវត្ដណានោះទេ ។ ដោយមានការសង្ស័យរូបលោកបានរាយការណ៍ជូន លោកមេឃុំ និងក្រុមប្រឹក្សាមកជួយពិនិត្យមើលបន្ថែម ។ ក្រោយពីធ្វើការសាកសួរ និងត្រួតពិនិត្យមើលសព្វគ្រប់ហើយ អាជ្ញាធរមូលដ្ឋានក៏បានបញ្ជូនសង្ឃទាំង២អង្គនោះទៅវត្ដអង្គតាសោម ដើម្បីប្រគល់ឱ្យព្រះមេគណស្រុកធ្វើការដោះស្រាយទៅតាមផ្លូវព្រះពុទ្ធសាសនា ។
ព្រះតេជគុណព្រះនាមខែម សុខ ព្រះមេគណស្រុកត្រាំកក់ និងជាព្រះចៅអធិការវត្ដអង្គតាសោមបានមានថេរដីកាថា លោកសង្ឃទាំង២អង្គនេះធ្វើខុសទៅនឹងវិន័យសង្ឃយ៉ាងខ្លាំង ពីព្រោះព្រះសង្ឃមិនត្រូវស្លៀកខោខ្លីទេ។ បើសង្ឃអង្គណាស្លៀកខោខ្លី ហើយអត់កោរចិញ្ចើមទៀតនោះ គឺខុសទាំង ស្រុងទៅនឹងវិន័យព្រះពុទ្ធសាសនាដែលជាសាសនារបស់រដ្ឋ ។
សង្ឃទាំង២អង្គនោះមួយអង្គនាមអ៊ុក ញ៉ក់ ព្រះជន្ម២៧ឆ្នាំ មានស្រុកកំណើតនៅឃុំពោធិអង្ក្រង ស្រុកបសេដ្ឋ ខេត្ដកំពង់ស្ពឺ បច្ចុប្បន្នគង់នៅក្នុងមណ្ឌលវិបស្សនាធុរៈភ្នំតូច ឃុំត្រញំងសាប ស្រុកបាទី ខេត្ដតាកែវ សង្ឃអង្គនេះគ្រងស្បង់ចីវរនិងកោរចិញ្ចើម ត្រឹមត្រូវព្រះមេគណស្រុកអត់ចាប់ផ្សឹកទេ។ ចំណែក១អង្គទៀតនាមមឿន បូរី ព្រះជន្ម២១ឆ្នាំ មានស្រុកកំណើតនៅភូមិស្ពានជ័យ ឃុំសេនារាជឧត្ដម ស្រុកព្រះស្ដេច ខេត្ដព្រៃវែង តែបានមកគង់នៅជាមួយសង្ឃអ៊ុក ញ៉ក់ នៅភ្នំតូច ។ សង្ឃនេះស្លៀកខោស្ល៉ីបពីក្នុង និងអត់កោរចិញ្ចើមទេ ត្រូវបានព្រះមេគណចាប់ផ្សឹក រួចប្រគល់ឱ្យប៉ូលិសស្រុកជាអ្នកចាត់ការ រីឯវត្ថុតាងមានលុយដែលបានពីការបិណ្ឌបាតចំនួន៤០.៤០០រៀល បាត្រ២ឆត្រ១ ។ ព្រះមេគណស្រុកបានមានថេរដីកាបន្ដទៀតថា បន្ទាប់ពីមានការឃាត់ខ្លួនសង្ឃ២អង្គនេះមកមានព្រះសង្ឃជាច្រើនបានទូរស័ព្ទមកសុំការលើកលែងទោសកំហុសឱ្យសង្ឃ ទាំង២ ប៉ុន្ដែព្រះអង្គមិនយល់ព្រមទេគឺម្នាក់ត្រូវតែផ្សឹកប្រគល់ឱ្យប៉ូលិសចាត់ការ និងម្នាក់ទៀតនាំយកទៅពិតទូលថ្វាយសម្ដេច ព្រះសង្ឃរាជដើម្បីមានព្រះតំរិះដោះស្រាយ ៕
No comments:
Post a Comment