តំកល់រូបសំណាកមេទ័ព “ឌី” នៅប្រាសាទព្រះវិហារ
- Friday, January 15, 2010, 14:34
- ពត៌មានភាសាខ្មែរ, សេដ្ឋកិច្ច & នយោបាយ
- 24 views
- បញ្ចេញមតិផ្ទាល់ខ្លួន
ខេត្ដព្រះវិហារ ៖ កាលពីព្រឹកថ្ងៃទី១២ មករា កន្លងទៅថ្មីៗនេះ ក្រុមការងារពិសេសថ្នាក់ជាតិបានរៀបចំពិធីសែនព្រេនមួយឈុត ដើម្បីលើករូបសំណាកមេទ័ពឌីជិះសេះកាន់ ព្រះខ័ន តម្កល់ក្នុងបុស្បុក តំណាងឱ្យការ ប្រយុទ្ធតតាំងជាមួយទ័ពសៀមឈ្លានពានទឹកដីខ្មែរកាលពីសម័យដ៏យូរលង់មកហើយ។
ពិធីនេះប្រារឰធ្វើឡើងក្រោមអធិបតី ភាពលោកឧត្ដមសេនីយ៍ទោ ស ថាវី អភិ បាលរងខេត្ដព្រះវិហារ និងជាប្រធានលេខាធិការដ្ឋានក្រុមការងារពិសេសថ្នាក់ជាតិ និងវត្ដមានចូលរួមនាព្រឹកនោះដែរមានលោក ឧត្ដមសេនីយ៍ទោ យូ សិរីវុឌ្ឍ ជំនួយការ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នាយរងទីចាត់ការកល្យយុទ្ធអគ្គបញ្ជាការ និងជាគណៈប្រចាំការសមរភូមិទី១ប្រាសាទព្រះវិហារ ព្រមទាំងមន្ដ្រីអ្នកមុខអ្នកការក្នុង ក្រុមការងារពិសេសថ្នាក់ជាតិ ព្រមទាំងអាជ្ញា ធរមូលដ្ឋានជាច្រើនរូបផងដែរ ។
សំណង់បុស្បុកសំរាប់តម្កល់រូបសំណាកអតីតមេទ័ពឌីប្រចាំប្រាសាទព្រះវិហារ ទើបសាងសង់រួចហើយត្រូវបាននាំយករូបសំណាកមកតម្កល់ ទុកក្នុងបរិវេណនៃសារមន្ទីរសម្ដេចអគ្គមហាសេនាបតីតេជោ ហ៊ុន សែន ដែលស្ថិតត្រង់ ចំណុចស្រះក្ដុល ក្នុងភូមិធម្មជាតិសម្ដេច តេជោ ។
លោកឧត្ដមសេនីយ៍ទោ ស ថាវី អភិបាល រងខេត្ដបានមានប្រសាសន៍ប្រាប់អ្នកយកព័ត៌មានកោះសន្ដិភាពឱ្យដឹងថា ពិធីដែលបានរៀបចំធ្វើឡើងនាព្រឹកនោះ គឺពុំទាន់បានគ្រប់លក្ខណៈទំនៀមទំលាប់ព្រហ្មមញសាសនានៅឡើយទេ ដោយសារសារមន្ទីរសម្ដេចតេជោ សាងសង់មិនទាន់រួច ។
នៅពេលដែលសារ មន្ទីរសាងសង់រួចនិងធ្វើការបើកសម្ពោធនាពេលខាងមុខនិងអាចប្រារឰធ្វើឡើងព្រមគ្នា ឬក៏យ៉ាងណានោះលោកមិនទាន់កំណត់ ច្បាស់នៅឡើយទេ ។
ប៉ុន្ដែការដែលរៀបចំ ធ្វើឡើងនាព្រឹកថ្ងៃទី១២ មករា ឆ្នាំ២០១០ នេះ គឺជាលក្ខណៈចាំបាច់បំផុតក្នុងការលើក រូបសំណាកលោកតាឌី តម្កល់ក្នុងបុស្បុកបែប នេះត្រូវតែមានរៀបចំពិធីសែនព្រេនបួងសួងសុំម្ចាស់ទឹកម្ចាស់ដី និងសុំឱ្យព្រលឹងនៃវិញាណក្ខន្ធ បុព្វបុរសទាំងអស់ឱ្យជួយដឹងឮ និងជួយតាមថែរក្សាប្រជាជាតិខ្មែរទាំងអស់ បានប្រកបតែសេចក្ដីសុខ ពិសេសជួយនាំមក នូវសេចក្ដីចំរុងចំរើនបន្ថែមទៀតដល់នគរ កម្ពុជា ។
សូមបញ្ជាក់ថា ការសាងសង់សារមន្ទីរ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជានេះឡើង គឺក្នុងគោលបំណងដើម្បីរក្សាទុកនូវ រាល់សម្បត្ដិវប្បធម៌ទាំងឡាយដែលរកឃើញ ពីបណ្ដាប្រាសាទបុរាណនានា សំរាប់តាំង បង្ហាញជាសាកលដល់ភ្ញៀវជាតិ និងអន្ដរជាតិ ដែលធ្វើដំណើរចូលទៅទស្សនាប្រាសាទព្រះ វិហាររបស់ខ្មែរ ។
ជាក់ស្ដែងដូចជាការតម្កល់ រូបសំណាកមេទ័ពឌី ជាមេទ័ពដែលមានវីរ ភាពក្នុងការប្រយុទ្ធទប់ទល់ជាមួយសត្រូវ និងបានបណ្ដេញចោរសៀមឈ្លានពានពី ប្រាសាទព្រះវិហារខ្មែរឱ្យវិនាសផុតអស់រហូតមកទល់សព្វថ្ងៃនេះ ។
ដូច្នេះការតម្កល់ឡើង នូវនិមិត្ដរូបនៃវីរភាពរបស់លោកតាឌី នៅក្នុងសារមន្ទីរសម្ដេចតេជោ គឺក្នុងគោលបំណង ចង់បញ្ជាក់ពីវីរភាពនៃបុព្វបុរសខ្មែរក្នុងបុព្វ ហេតុការពារកេរមរតកនៃវប្បធម៌របស់ខ្មែរ និងការពារបូរណភាពទឹកដី ។
ម្យ៉ាងទៀតនោះ ការតម្កល់រូបសំណាកមេទ័ពឌី នៅក្នុង បរិវេណនៃសារៈមន្ទីរសម្ដេចតេជោ នៅតាមដងផ្លូវជាតិលេខ៦២ មានចំងាយតែ១០គីឡូ ម៉ែត្រចូលទៅកាន់ប្រាសាទព្រះវិហារនេះ គឺក្នុងគោលបំណងឱ្យភ្ញៀវដែលធ្វើដំណើរទៅកាន់ប្រាសាទព្រះវិហារបានឃើញ និងបានចូលអុជធូបគោរពបួងសួងរំលឹកដល់គុណបុណ្យបារមីដ៏ខ្លាំងពូកែស័ក្ដិសិទ្ធិនៃលោកមេទ័ព ក្នុងការការពារប្រាសាទព្រះវិហាររបស់ខ្មែរលើកំពូលភ្នំដងរែក ។
No comments:
Post a Comment