សាកសពពលរដ្ឋខ្មែរ២នាក់ត្រូវបូជាលើទឹកដីសៀម ព័ត៌មានស្លាប់៣នាក់ទៀត មិនមានប្រភពអះអាងផ្លូវការ
- Friday, January 15, 2010, 14:23
- ពត៌មានភាសាខ្មែរ, សេដ្ឋកិច្ច & នយោបាយ
- 12 views
- បញ្ចេញមតិផ្ទាល់ខ្លួន
ខេត្ដឧត្ដរមានជ័យ ៖ កាលពីវេលាម៉ោង៤រសៀលថ្ងៃទី១០ មករា ឆ្នាំ២០១០ កន្លងទៅនេះប្រជាពលរដ្ឋចំនួន៣០នាក់ ដែលបានឡើងទៅលើកំពូលភ្នំដងរែកដើម្បីស៊ីឈ្នួលកាប់ និងអូសឈើគ្រញូងត្រូវបានទាហានឈុតខ្មៅសៀមបាញ់ស្លាប់ចំនួន២នាក់បាត់ខ្លួន៨នាក់រត់រួច២០នាក់នោះ រហូតមកទល់ពេលនេះអ្នកដែលបាត់ខ្លួនបានវិលមកដល់លំនៅឋានវិញ៧នាក់ រីឯសាកសព២នាក់នោះត្រូវបានគេស្គាល់ពីអត្ដសញាណហើយ ទី១-ឈ្មោះអឿន អេង អាយុ១៩ឆ្នាំ ត្រូវ ចំនួន១គ្រាប់ចំដើមដោះខាងឆ្វេងស្លាប់ ចំណែកឪពុកឈ្មោះអឿន អុល ភេទប្រុស អាយុ៤៣ឆ្នាំ ត្រូវបានបាត់ខ្លួនមកដល់ពេលនេះពុំទាន់បានដឹងថាស្លាប់ឬរស់នៅឡើយទេ ។ ឪពុកនិងកូននេះរស់នៅភូមិមណ្ឌល៣ សង្កាត់ស្លក្រាម ក្រុងសៀមរាប ខេត្ដសៀមរាប ។ ទី២-ឈ្មោះចេង សុជាតិ ភេទប្រុស អាយុ៣២ឆ្នាំ ត្រូវទាហានសៀមបាញ់ចំនួន១គ្រាប់ចំសៀតផ្កាខាងឆ្វេងស្លាប់ ។ អ្នករងគ្រោះទី២ នេះរស់នៅភូមិអូរ ស្វាយ ឃុំអូរស្វាយ ស្រុកត្រញំងប្រាសាទ ខេត្ដឧត្ដរមានជ័យ ។ សាកសពទាំង២នាក់ នេះបានធ្វើពិធីបូជាក្នុងប្រទេសសៀមបន្ដ បន្ទាប់គ្នាហើយក្រុមគ្រួសារបានត្រឹមតែយក អដ្ឋិធាតុត្រឡប់មកប្រទេសវិញប៉ុណ្ណោះ។
ក្រុមគ្រួសាររបស់សពឈ្មោះអឿន អេង បានរៀបរាប់ឱ្យកោះសន្ដិភាពដឹងថា ប្ដីរបស់គាត់ឈ្មោះអឿន អុល ដែលបាត់ខ្លួននៅឡើយបានដឹងឮពីការផ្សព្វផ្សាយរបស់អាជ្ញាធរ និងបានដឹងបានឮថា ទាហានសៀមតែងតែបានបាញ់សម្លាប់ជីវិតប្រជាពលរដ្ឋដែលឡើងទៅនៅលើកំពូលភ្នំដងរែកតាមខ្សែ បន្ទាត់ព្រំដែនជាញឹកញាប់ ហើយក៏បានស្លាប់បាត់បង់ជីវិតជាច្រើននាក់មកហើយដែរ តែតាមរយៈក្រុមឈ្មួញឈើដែលមកជួលប្ដីរបស់គាត់ គេបាននិយាយអះអាងថា ពួកគេបានទាក់ទងជាមួយទាហានសៀម និងបានត្រូវរ៉ូវគ្នាបង់លុយឱ្យអស់ហើយ គ្មានបញ្ហាអ្វីទៀតទេ ។ ដោយសារមានការធានាពីសុវត្ថិភាព ទើបគ្រួសារគាត់ព្រមទាំងអ្នកភូមិ ឯទៀតសុខចិត្ដឡើងភ្នំ។
គ្រួសារសពដដែលបាននិយាយបន្ដទៀតថា ពេលប្ដីរបស់គាត់ឡើងទៅលើភ្នំបានចំនួន២ទៅ៣យប់ ស្រាប់តែទាហានសៀមបាញ់ប្រហារមកលើបណ្ដាលឱ្យស្លាប់ក្រៅពីនេះ បានរត់រួចត្រឡប់មកភូមិវិញ គឺនៅតែម្នាក់ទេ ដែលបាត់ខ្លួនមិនដឹងថាស្លាប់ឬរស់នោះ គឺ ប្ដីរបស់គាត់។ ទោះបីជាបែបណា ពុំឃើញ មានថៅកែដែលជាអ្នកធានាអះអាងចេញមុខទទួលខុសត្រូវឡើយ សូម្បីតែរូបគាត់ទៅសុំលុយថ្លៃឈ្នួលពលកម្មអូសឈើ ក៏មិន បានផង ឯការសុំលុយយកមកធ្វើបុណ្យក៏មិនបានដែរ ពួកគាត់សុំឱ្យរដ្ឋាភិបាលចាត់វិធានការទៅលើក្រុមឈ្មួញទាំងនោះទៅតាម នីតិវិធីច្បាប់ផង។
លោកវរសេនីយ៍ទោតូច រ៉ា ប្រធានក្រុម ការងារទំនាក់ទំនងច្រកទ្វារអន្ដរជាតិជាំសាងាំបានឱ្យកោះសន្ដិភាពដឹងថា សាកសពពីរនាក់នោះ ត្រូវបានក្រុមទាហានសៀមដឹកយកទៅដល់ខេត្ដអ៊ូប៊ុន ។ បន្ទាប់ពីបានសមត្ថកិច្ចខ្មែររកឃើញក្រុមគ្រួសារជនរងគ្រោះនោះ គឺសាកសពបានស្អុយទៅហើយ ហើយក្រុមគ្រួសារសពក៏ជួបការលំបាក ពីព្រោះសុទ្ធតែជាអ្នកក្រីក្រ ទើបអាជ្ញាធរសៀម និងទាហានសៀមបានដឹកសពយកមកដាក់នៅ វត្ដហួយតាម៉ន ក្នុងភូមិហួយតាម៉ន ឃុំហួយ តាម៉ន ស្រុកភូស៊ីង ខេត្ដស៊ីសាកេតដើម្បីធ្វើ ពិធីបូជាសពទៅតាមប្រពៃណីរបស់ខ្មែរ ដោយខាងអាជ្ញាធរសៀមជាអ្នកចេញថវិកា ចំណែកក្រុមគ្រួសារសពចាំតែយកឆ្អឹងមកប្រទេសវិញតែប៉ុណ្ណោះ ។ លោកបញ្ជាក់ថា សពឈ្មោះអឿន អេង បូជានៅថ្ងៃទី១២ មករា លុះដល់ថ្ងៃទី១៣ មករា ទើបបូជាសពឈ្មោះចេង សុជាតិបន្ដទៀត ។
ប្រភពព័ត៌មានដែលល្បីមុននេះថា មានខ្មែរ៣នាក់ទៀតបានស្លាប់ដោយការបាញ់ប្រហារក្រោយនេះ គឺរកប្រភពបំភ្លឺបញ្ជាក់ជាផ្លូវការមិនទាន់បានឡើយ ហេតុនេះវាបានស្ថិតក្នុងករណីស្រាវជ្រាវបន្ដ និងអាចចាត់ទុកថា មិនទាន់ជាព័ត៌មានផ្លូវការទេ គិតត្រឹមថ្ងៃទី១៤ មករា ។ ក្រុមទាហានការពារព្រំដែនសៀមដែលគេតែងនិយមហៅថា “ទាហានឈុតខ្មៅ” នោះគួរតែបញ្ឈប់នូវការប្រើប្រាស់ចុងអាវុធកាត់ទោសប្រជាជនខ្មែរក្រីក្រ និងស្លូតត្រង់ ដែលឆ្លងកាត់តំបន់ព្រៃតាមខ្សែក្រវាត់ព្រំដែននៃប្រទេសទាំងពីរដើម្បីស្វែងរកផលានុផលព្រៃឈើដើម្បីចិញ្ចឹមជីវិត ឬដោយគ្រាន់តែជាអ្នកចាញ់បោកគេនោះ ។
អំពើបាញ់សំលាប់ក្រៅច្បាប់ពីសំណាក់ទាហានឈុតខ្មៅសៀមនេះតែងបានកើតឡើងជារឿយៗ ហើយយ៉ាងអមនុស្សធម៌មកលើជនក្រីក្រកម្ពុជារស់នៅតាមបណ្ដោយព្រំដែនកម្ពុជា-សៀម ។ ជាអាទិ៍ កាលពីថ្ងៃទី៣ មករា កន្លងទៅនេះ មានប្រជាជនកម្ពុជាពីរនាក់ មានម្នាក់ត្រូវបានក្រុមឃាតកឈុតខ្មៅបាញ់សំលាប់ក្នុងចំណុចលូ៤ ក្នុងស្រុកខ្លងហាត នៃខេត្ដស្រះកែវ ប្រទេសថៃ ហើយមិនតែប៉ុណ្ណោះ ពួកគេថែមទាំងបានបដិសេធមិនព្រមប្រគល់សាកសពបុរសខ្មែររូបនោះមកឱ្យប្រទេសកម្ពុជាវិញទេ ដោយចោទថា បុរសនោះពាក់ព័ន្ធនឹងអំពើប្លន់។ រីឯជនក្រីក្រខ្មែរ មួយរូបទៀតដែលចូលព្រៃដាក់អន្ទាក់សត្វ និងបេះស្លឹកច្រេះ និងស្លឹកព្រិចដើម្បីយកមកលក់ចិញ្ចឹមជីវិតក្នុងភូមិសាស្ដ្រទឹកដីខ្មែរត្រង់ចំណុចភូមិថ្មី ឃុំបន្ទាយឆ្មារ ខេត្ដបន្ទាយមានជ័យជាប់ព្រំប្រទល់ខេត្ដស្រះកែវ ប្រទេសថៃ ក៏ត្រូវក្រុមទាហានសៀមទាំងនោះបាញ់ឱ្យរងរបួសជើងជាទម្ងន់ផងដែរ ហើយអ្វីដែលធ្ងន់ធ្ងរនោះ គឺលើខ្នងភ្នំដងរែកខេត្ដឧត្ដរមានជ័យដែលការកើតមានអំពើបាញ់រះពីសំណាក់ទាហានឈុតខ្មៅសៀមតែងបានកើត ឡើងជាបន្ដបន្ទាប់ ។ ទាំងនេះវាជាទង្វើដ៏អមនុស្សធម៌ ឃោរឃៅ ព្រៃផ្សៃ បាញ់សំលាប់ជនស្លូតត្រង់កម្ពុជាក្រៅប្រព័ន្ធច្បាប់តាមអំពើចិត្ដ ដែលហាក់ដូចប្រទេសគ្មានច្បាប់។ តើឯណាទៅសេចក្ដីថ្លៃថ្នូរដែលប្រទេសសៀមធ្លាប់អួតខ្លួនថា ជាប្រទេសមានអរិយធម៌ខ្ពស់នោះបាត់ទៅណាអស់ ហើយ? សកម្មភាពទាំងឡាយដែលក្រុមទាហានឈុតខ្មៅបានធ្វើមកលើប្រជាពលរដ្ឋ កម្ពុជានាពេលបច្ចុប្បន្ន គឺជាអំពើអមនុស្ស ធម៌ និងថោកទាបបំផុត ហើយរូបភាពទាំង នេះបានបង្ហាញយ៉ាងច្បាស់ប្រាប់ដល់អន្ដរ ជាតិថា ក្រុមទាហានព្រំដែនសៀមសព្វថ្ងៃ កំពុងឈានចូលដល់ដំណាក់កាលសាហាវ ឃោរឃៅ មិនគោរពសិទ្ធិមនុស្ស និងគោរព គោលការណ៍ច្បាប់អន្ដរជាតិ ។
ដោយឡែកយោធាកម្ពុជានៅតាមព្រំ ដែននានា ជានិច្ចកាលតែងតែមានវិន័យ និង ព្រហ្មវិហារធម៌ខ្ពស់ មិនប្រព្រឹត្ដអំពើអមនុស្ស ធម៌ ដូចជាក្រុមឆ្មាំឃោរឃៅសៀមនោះទេ ។ ជាអាទិ៍ នៅពេលដែលក្រុមសង្ឃ តាជី ដូនជីបង្ករឿងសៀមបីនាក់ដែលជាដើមចម នៃទំនាស់ព្រំដែនកម្ពុជា-សៀមក្នុងតំបន់ ប្រាសាទព្រះវិហារកាលពីខែកក្កដា ឆ្នាំ ២០០៨ គឺពិតជាបានរំលោភព្រំដែនមកស្នាក់ នៅក្នុងវត្ដកែវសិក្ខាគិរីស្វារៈនៃប្រាសាទ ព្រះវិហារ ត្រូវបានអាជ្ញាធរកម្ពុជាចាប់ បញ្ជូនទៅឱ្យរដ្ឋាភិបាលសៀមវិញដោយ សន្ដិវិធី ក្នុងន័យគោរពយ៉ាងខ្ជាប់ខ្ជួននូវ គោលការណ៍សិទ្ធិមនុស្សខ្ពស់របស់ប្រមុខរាជ រដ្ឋាភិបាលកម្ពុជា ។ ជាពិសេសអ្វីដែលមិនអាច បំភ្លេចបានរបស់ប្រជារាស្ដ្រសៀមរាប់លាន នាក់ ដែលស្រលាញ់សន្ដិភាព និងសេចក្ដីថ្លៃថ្នូរ នោះ គឺកាយវិការមនុស្សធម៌ពិតៗរបស់ព្រះ ករុណាព្រះមហាក្សត្រកម្ពុជាព្រះបាទបរមនាថ នរោត្ដម សីហមុនី បានសន្ដោសលើកលែង ទោសដល់វិស្វករជនជាតិថៃស៊ីវ៉ារ៉ាក់ ជុធិពង្ស ដែលត្រូវតុលាការកម្ពុជាកាត់ទោសជាប់គុក ប្រាំពីរឆ្នាំពីបទចារកម្ម ។ នេះជាកាយវិការមនុស្សធម៌ដ៏ថ្លៃថ្លារបស់ព្រះរាជាខ្មែរ និងសម្ដេចអគ្គមហាសេនាបតីតេជោ ហ៊ុន សែន ក្នុងការសន្ដោសលើកលែងទោសដល់វិស្វករថៃរូបនេះ ពីព្រោះព្រះអង្គនិងសម្ដេចនាយករដ្ឋមន្ដ្រីជាមេដឹកនាំកម្ពុជាដែលមានគុណធម៌ និងព្រហ្មវិហារធម៌ យល់ពីតំលៃមនុស្សជាតិ។ តាមព័ត៌មានចុងក្រោយថា ឈ្មោះអឿន អុល ដែលបាត់ខ្លួនបានត្រលប់មកដល់ដីខ្មែរវិញ ហើយនៅម៉ោងជាង៥ល្ងាចថ្ងៃទី១៤ មករា៕
No comments:
Post a Comment