ស្ថានភាពជម្លោះដីធ្លីនៅខេត្តកោះកុងក្នុងឆ្នាំ២០០៩
ដោយ មុំ សុផុន
2010-01-12
វិទ្យុអាស៊ីសេរី
មន្ត្រីសម្របសម្រួលសមាគមការពារសិទ្ធិមនុស្សនិងអភិវឌ្ឍន៍នៅកម្ពុជា(អាដហុក) ប្រចាំនៅឯខេត្តកោះកុង បានមានប្រសាសន៍នៅល្ងាចថ្ងៃ១២ ខែមករា ឆ្នាំ២០១០ថា ករណីទំនាស់ដីធ្លីនៅឯខេត្តកោះកុង ក្នុងឆ្នាំ២០០៩កន្លងមកនេះ បានថយចុះចំនួន៥ករណីបើធៀបទៅឆ្នាំ២០០៨។
លោក អ៊ុន ថាណន់ អ្នកសម្របសម្រួលអង្គការអាដហុកប្រចាំនៅខេត្តកោះកុង បានមានប្រសាសន៍ថា ឆ្នាំ២០០៩កន្លងទៅ ករណីជម្លោះដីបានកើតឡើងចំនួន៥ករណី ដែលកាលពីឆ្នាំ២០០៨ មាន១០ករណី។
លោក អ៊ុន ថាណន់ មានប្រសាសន៍ដូច្នេះ ៖ «កាលមុនដីវាច្រើន ឥឡូវវាកាន់តែថយដែរ ក្រៅពីដីភោគៈអី វានៅសល់ដីព្រៃដីអីអ៊ីចឹងទៅ ទំនាស់ដីហ្នឹង ដីមាត់សមុទ្រអី។ ណាមួយទៀត ដូចរបាយការណ៍ទូទាំងខេត្តដែរអះអាងថា វាអាចទាក់ទងទៅនឹងការអត់មានការកក្រើកដោយសារឈ្មួញទិញអី ហាងឆេងដីចុះ ក៏បញ្ឈប់ដែរការរំលោភ…»។
លោកបានថ្លែងទៀតថា ទំនាស់ទាំង៥ករណីនោះបានធ្វើឲ្យប៉ះពាល់ដល់ប្រជាពលរដ្ឋជាង៤០០គ្រួសារ ហើយភាគីដែលមានទំនាស់ជាមួយប្រជាពលរដ្ឋនោះមានអាជ្ញាធររដ្ឋបាលព្រៃឈើ អង្គការការពារបរិស្ថានមួយឈ្មោះ CI (Conservation International) អាជ្ញាធរប៉ូលិសនិងឈ្មួញទិញលក់ដីជាដើម។ លោកបញ្ជាក់ទៀតថា អាជ្ញាធរមូលដ្ឋានហាក់ព្រងើយកន្តើយក្នុងការដោះស្រាយ ដោយគ្រាន់តែយកលេសថា នឹងរកដំណោះស្រាយតែប៉ុណ្ណោះ។
ប្រជាពលរដ្ឋអ្នករងគ្រោះក្នុងករណីជម្លោះដីធ្លីនៅក្នុងឃុំជីខក្រោម ស្រុកស្រែអំបឹល ខេត្តកោះកុង លោក ញ៉ែម អាន អាយុ៤៣ឆ្នាំ បានមានប្រសាសន៍ថា ពួកគាត់មានទំនាស់ដីធ្លីដែលបានអូសបន្លាយច្រើនឆ្នាំមកហើយ ប៉ុន្តែនៅតែមិនទាន់មានដំណោះស្រាយទេ។
លោក ញ៉ែម អាន មានប្រសាសន៍ថា ៖ «ច្បាប់ភូមិបាលច្បាប់អីថា ការពារប្រជាជន ដល់ពេលបង្កើតច្បាប់ហ្នឹងមកហើយ បែរជាយកដីប្រជាជនវិញ ខ្ញុំអត់ដឹងដែរអាហ្នឹង។ ប្ដឹងតវ៉ាទៀត គ្មាននរណាគេដឹងឮទេ គ្មាននរណាគេមកជួយដោះស្រាយឲ្យទេ ទោះបីប្ដឹងទៅណាក៏អត់មាននរណាគេដោះស្រាយឲ្យដែរ។ ខ្ញុំសូមសំណូមពរទៅសម្ដេច ហ៊ុន សែន ម្ដងទៀត សូមឲ្យសម្ដេចជួយមកមើលប្រជាជន កូនចៅនៅភូមិព្រែកជីក ឃុំជីខក្រោមនេះផង កូនចៅសុទ្ធតែក្រ ពិបាកវេទនាណាស់ ហើយថៅកែ សុខ ហុង និងថៅកែ ហ៊ឹម ហ៊ុយ នេះ គាត់មកគាបសង្កត់ សូម្បីតែធ្វើផ្ទះក៏មិនបាន ហើយចេញទៅរកស៊ីឯណាក៏គ្មានដែរ។ គាត់គំរាមបោះពាក្យមកថា សូម្បីតែទ្រុងមាន់ក៏គាត់មិនឲ្យធ្វើដែរ ហើយដូចផ្ទះខ្ញុំអីបាក់បែកអស់ហើយ អត់មានធ្វើវិញបានទេ»។
សមាជិកក្រុមប្រឹក្សាខេត្តកោះកុង លោក ជិន សុផល ធ្លាប់បានមានប្រសាសន៍ឲ្យដឹងថា រដ្ឋាភិបាលគួរតែពិចារណាឲ្យបានល្អិតល្អន់មុនពេលដែលប្រគល់ដីសម្បទានផ្សេងៗទៅឲ្យក្រុមហ៊ុនឯកជនវិនិយោគ ហើយក៏ត្រូវតែគិតពីនយោបាយដីធ្លីជូនដល់ប្រជាពលរដ្ឋឲ្យបានគ្រប់គ្រាន់ សម្រាប់ប្រកបរបរធ្វើស្រែចម្ការ។
អ្នកសម្របសម្រួលអង្គការអាដហុក ប្រចាំនៅខេត្តកោះកុង លោក អ៊ុន ថាណន់ បានមានប្រសាសន៍ថា ដំណោះស្រាយដើម្បីកុំឲ្យបន្តជម្លោះដីរវាងអ្នកមានអំណាច ឬឈ្មួញជាមួយនឹងប្រជាពលរដ្ឋនោះ គឺគួរតែមានដំណោះស្រាយដែលអាចទទួលយកបានទាំងពីរភាគី៕
No comments:
Post a Comment