កម្ពុជាបដិសេធការលើកឡើងរបស់ក្រសួងការបរទេសថៃពីរឿងព្រះវិហារ
ដោយ ដែន អយុធ្យា
2010-01-13
វិទ្យុអាស៊ីសេរី
អាជ្ញាធរកម្ពុជាបដិសេធការលើកឡើងរបស់ក្រសួងការបរទេសថៃ ដោយកម្ពុជាបញ្ជាក់ច្បាស់ថា ប្រាសាទព្រះវិហារនិងដីបរិវេណប្រាសាទគឺពិតជារបស់កម្ពុជា។
ប្រាសាទ ព្រះវិហារ របស់ ខ្មែរ នៅ លើ កំពូល ភ្នំ ដងរែក នៃ ខេត្ត ព្រះវិហារ។ (RFA FILE PHOTO/UY SOPHEA)
ទីស្តីការគណៈរដ្ឋមន្ត្រីនៃប្រទេសកម្ពុជានៅថ្ងៃទី១២ ខែមករា បានចេញសេចក្តីបំភ្លឺមួយដោយបានច្រានចោលទាំងស្រុងនូវការលើកឡើងប្រសាសន៍របស់លោក វីម៉ុន ឃីតឆប (Vimon Kidchob) អគ្គនាយកនៃនាយកដ្ឋានព័ត៌មានរបស់ក្រសួងការបរទេសថៃ ដែលបានចុះផ្សាយក្នុងសារព័ត៌មានថៃ The Nation កាលពីថ្ងៃទី៩ ខែមករា ឆ្នាំ២០១០ ដែលថា “ប្រាសាទព្រះវិហារនិងដីជុំវិញបរិវេណប្រាសាទព្រះវិហារ និងវត្តកែវសិខាគិរីស្វរៈ ជារបស់ថៃ“។
បន្ថែមលើសេចក្តីបំភ្លឺ លោក ផៃ ស៊ីផាន រដ្ឋលេខាធិការនិងជាមន្ត្រីនាំពាក្យទីស្តីការគណៈរដ្ឋមន្ត្រី នៅថ្ងៃទី១២ ខែមករានេះ មានប្រសាសន៍ដោយបានចាត់ទុកការលើកឡើងរបស់អគ្គនាយកដ្ឋានរបស់ក្រសួងការបរទេសថៃ បាននិយាយនៅលើទំព័រកាសែត The Nation ទាក់ទងទៅនឹងបញ្ហាប្រាសាទព្រះវិហារ ថាជាការបំភ្លៃមតិសាធារណជន និងមានបំណងធ្វើឲ្យទំនាក់ទំនងប្រទេសកម្ពុជាថៃកាន់តែមានភាពតានតឹងនិងអាក្រក់ទៅៗ។
លោក ផៃ ស៊ីផាន បញ្ជាក់ឲ្យដឹងថា ៖ «អំពីការចុះផ្សាយរបស់កាសែតរបស់ថៃ The Nationហ្នឹង យើងសុំជម្រាបថា នេះគ្រាន់តែជាការផ្សព្វផ្សាយនៃគំនិតរបស់អ្នកធ្វើឲ្យគេយល់ច្រឡំ ហើយបង្កើតឲ្យមានការញុះញង់ រឹតតែធ្វើឲ្យមានភាពតានតឹងរវាងកម្ពុជាថៃ»។
លោក ផៃ ស៊ីផាន បានបំភ្លឺទៅសាធារណជនជាតិនិងអន្តរជាតិ ពិសេសប្រជាជនថៃទាំងអស់ឲ្យបានជ្រាបថា តុលាការយុត្តិធម៌ទីក្រុងឡាអេបានចេញសាលដីកាសម្រេចកាលពីថ្ងៃទី១៥ ខែមិថុនា ឆ្នាំ១៩៦២ យ៉ាងច្បាស់ថា ប្រាសាទព្រះវិហារនិងបរិវេណជុំវិញប្រាសាទស្ថិតនៅក្នុងទឹកដីកម្ពុជាទាំងស្រុង។ សេចក្តីសម្រចនេះផ្អែកទៅលើផែនទីឧបសម្ព័ន្ធ១ ដែលជាលទ្ធផលនៃអនុសញ្ញាចុះថ្ងៃទី១៣ ខែកុម្ភៈ ឆ្នាំ១៩០៤ ដែលបានចែងយ៉ាងច្បាស់ពីព្រំដែននៅតំបន់ភ្នំដងរែកខាងកើត និងសន្ធិសញ្ញាថ្ងៃទី២៣ ខែមីនា ឆ្នាំ១៩០៧ រវាងបារាំងនិងសៀមក្នុងការកំណត់ខ្សែបន្ទាត់ព្រំដែន។
លោក ផៃ ស៊ីផាន បានអះអាងថា ៖ «តុលាការបានចេញជាសាលក្រមដេញកងទ័ពថៃឬកងទ័ពសៀម ឆ្មាំកាំភ្លើង ឬអ្នកថែរក្សាដទៃទៀត និងអ្នកដែលពាក់ព័ន្ធនៅក្នុងតំបន់ប្រាសាទព្រះវិហារនេះ ចេញពីកន្លែងហ្នឹង។ អាហ្នឹងជាសាលក្រមរបស់សាលាក្ដីយុត្តិធម៌ …បានបណ្ដេញពួកនោះចេញពីតំបន់នោះតាំងពីឆ្នាំ១៩៦២»។
លោកបន្តថា ដោយសំអាងទៅលើសេចក្តីសម្រេចរបស់តុលាការយុត្តិធម៌អន្តរជាតិនិងការពិនិត្យពិច័យយ៉ាងហ្មត់ចត់របស់ក្រុមប្រឹក្សាអន្តរជាតិសម្រាប់បូជនីយដ្ឋាននិងតំបន់ប្រាសាទ គណៈកម្មាធិការបេតិកភណ្ឌពិភពលោកបានសម្រេចចុះបញ្ជីប្រាសាទព្រះវិហារជាបេតិកភណ្ឌពិភពលោកកាលពីថ្ងៃទី៧ ខែកក្កដា ឆ្នាំ២០០៨ នៅទីក្រុងកេប៊ិច ប្រទេសកាណាដា។
គួររំឭកឲ្យដឹងផងដែរថា មួយសប្តាហ៍ក្រោយពេលប្រាសាទព្រះវិហាររបស់កម្ពុជាត្រូវបានចុះក្នុងបញ្ជីបេតិកភណ្ឌពិភពលោក ប្រទេសថៃបានដាក់បញ្ជូនកម្លាំងទ័ពចូលមកឈ្លានពានទឹកដីកម្ពុជានៅតាមព្រំដែនតំបន់ប្រាសាទព្រះវិហារ និងនៅបរិវេណវត្តកែវសិខាគិរីស្វរៈ នៅថ្ងៃទី១៥ ខែកក្កដា ឆ្នាំ២០០៨ ដែលរហូតមកដល់ឆ្នាំ២០១០នេះ កងទ័ពទាំងនោះនៅពុំទាន់ដកថយនៅឡើយ៕
No comments:
Post a Comment