អាជ្ញាធររៀបចំបង្កើត "កម្មវិធីព្រៃឈើជាតិ"
ដោយ កែវពេជ្រ មេត្តា
2009-08-22
មន្ដ្រីក្រុមការងារបច្ចេកទេសស្ដីពីព្រៃឈើនិងបរិស្ថាននិងរដ្ឋបាលព្រៃឈើរបស់ក្រសួងកសិកម្ម រុក្ខាប្រមាញ់និងនេសាទ បានឲ្យដឹងនៅថ្ងៃ២១ សីហា ២០០៩ ថា គេកំពុងរៀបចំចងក្រងនូវសេចក្ដីព្រាងមួយហៅថា "កម្មវិធីព្រៃឈើជាតិ" ដើម្បីធ្វើឲ្យសម្រេចបាននូវការគ្រប់គ្រងព្រៃឈើនៅកម្ពុជាប្រកបដោយនិរន្ដរភាពឬភាពយូរអង្វែង។
ព្រៃសហគមន៍នៅឃុំព្រែកព្រលូង ស្រុកព្រែកប្រសព្វ ខេត្តក្រចេះដែលរងការកាប់ទន្ទ្រាន។ រូបថតថ្ងៃទី១២ សីហា ២០០៩។
លោក សុខ ហេង អ្នកសម្របសម្រួលកម្មវិធីព្រៃឈើជាតិ បានបញ្ជាក់ថា ការចងក្រងនូវកម្មវិធីនេះឡើង គឺជាគំនិតផ្ដួចផ្ដើមរបស់បណ្ដាប្រទេសនានាក្នុងសកលលោក បន្ទាប់ពីមានការអំពាវនាវរបស់អង្គការសហប្រជាជាតិសុំឲ្យប្រទេសជាសមាជិក ដែលក្នុងនោះរួមមានទាំងកម្ពុជាផង នាំគ្នាចាប់ផ្ដើមធ្វើកម្មវិធីនេះ។
លោកបានបន្ដថា ការអំពាវនាវនេះដោយសារគេបានឃើញមានសកម្មភាពកាប់បំផ្លាញព្រៃឈើបាននិងកំពុងតែកើតមានសព្វថ្ងៃ ដែលធ្វើឲ្យប៉ះពាល់យ៉ាងខ្លាំងដល់បរិស្ថាននិងការរស់នៅរបស់មនុស្ស ដែលអាចឈានទៅរកការវិនាសអន្ដរាយធនធានព្រៃឈើសម្រាប់មនុស្សជំនាន់ក្រោយ។
លោក សុខ ហេង បានមានប្រសាសន៍ថា ៖ «ជាទូទៅក្នុងសង្គមជាតិទាំងមូលហ្នឹង ព្រៃឈើមិនមែនជារបស់រដ្ឋតែម្នាក់ឯងទេ។ អ៊ីចឹងយើងចងក្រងហ្នឹងយ៉ាងណាសំដៅឲ្យមានការឯកភាពជាតិទាំងមូល ថា ព្រៃឈើយើងគួរគ្រប់គ្រងរបៀបម៉េចដើម្បីផ្ដល់ផលប្រយោជន៍ជាអតិបរមា សំដៅធ្វើយ៉ាងណាឲ្យព្រៃឈើហ្នឹងគង់រង្សរហូតសម្រាប់មនុស្សជំនាន់ក្រោយ»។
លោក ថម អ៊ីវិន មន្ដ្រីអង្គការអភិរក្សសត្វព្រៃនៅកម្ពុជា (WCS) បានមានប្រសាសន៍ដែរថា កម្មវិធីព្រៃឈើជាតិ បើតាមដែលលោកបានដឹងគឺផ្ដល់ប្រយោជន៍សំខាន់ ដូចជាជួយឲ្យមានការទទួលខុសត្រូវ ចូលរួមចែករំលែកបទពិសោធន៍ឲ្យគ្នាទៅវិញទៅមក ធ្វើការគ្រប់គ្រងព្រៃឈើយ៉ាងដូចម្ដេចឲ្យបានត្រឹមត្រូវ ហើយនិងការចូលរួមក្នុងការកាត់បន្ថយភាពក្រីក្រ។
មន្ដ្រីក្រុមការងារបច្ចេកទេសស្ដីពីព្រៃឈើនិងបរិស្ថានបានឲ្យដឹងដែរថា ចំពោះស្ថិតិព្រៃឈើកាលពីមិនទាន់កើតសង្គ្រាមគឺមានចំនួន៧០% នៃផ្ទៃដីសរុបរបស់កម្ពុជា ប៉ុន្តែក្រោយពីសង្គ្រាមរហូតមកដល់ឆ្នាំ២០០៦ មានចំនួនជាង៥៩%ប៉ុណ្ណោះ ហើយដល់ឆ្នាំ២០០៨ គេឃើញព្រៃឈើបានកើនឡើងប្រមាណ៦០%។
លោកបានបន្ដថា ដូច្នេះការបង្កើតកម្មវិធីព្រៃឈើជាតិដែលគេរំពឹងថា នឹងចងក្រងចប់សព្វគ្រប់នៅពេលឆាប់ៗនោះ សំខាន់តម្រូវឲ្យមានការចូលរួមជួយការពារព្រៃឈើពីគ្រប់មជ្ឈដ្ឋាននិងស្ថាប័នពាក់ព័ន្ធ ព្រមទាំងអង្គការក្រៅរដ្ឋាភិបាលផងដែរ។
សូមជម្រាបជូនដែរថា សេចក្ដីព្រាងកម្មវិធីនៃព្រៃឈើជាតិត្រូវគេបានលើកយកទៅធ្វើការពិគ្រោះយោបល់កាលពីខែមិថុនាកន្លងទៅថ្មីៗនៅថ្នាក់មូលដ្ឋានចំនួន៥ ហើយក្រៅពីនេះគេគ្រោងនឹងយកទៅពិគ្រោះយោបល់នៅថ្នាក់ជាតិ ដែលនឹងធ្វើនៅថ្ងៃទី១៥និងទី១៦ ខែកញ្ញាខាងមុខនេះ ដើម្បីប្រមូលយកនូវមតិកែលម្អពីអ្នកចូលរួម ប្រយោជន៍ឲ្យកម្មវិធីព្រៃឈើជាតិមានខ្លឹមសារគ្រប់គ្រាន់និងធ្វើការអនុវត្តប្រកបដោយប្រសិទ្ធភាព៕
No comments:
Post a Comment