តុលាការបាត់ដំបងឃុំខ្លួនស្ត្រីម្នាក់ពីបទសង្ស័យថានាំក្មេង២នាក់ទៅលក់នៅថៃ
ដោយ សុផលមុន្នី
2009-08-12
ក្រុមប៉ូលិសបានចាប់ស្ត្រីមានផ្ទៃពោះ៥ខែម្នាក់ ប្រគល់ឲ្យតុលាការខេត្តបាត់ដំបងឃុំខ្លួនបណ្តោះអាសន្ន បន្ទាប់ពីស្រ្តីរូបនោះរងការចោទថា បាននាំយកក្មេងប្រុសក្មេងស្រីពីរនាក់ ទៅអំពាវនាវលក់ក្នុងតំលៃប្រាក់១ម៉ឺនបាតនៅផ្សារមួយក្នុងទឹកដីថៃ។
រូបសំណាកតាដំបងគ្រញូងនៅក្នុងទីរួមខែត្របាត់ដំបង។
ប្រធានប៉ុស្តិ៍នគរបាលច្រកអូររំដួល នៅស្រុកភ្នំព្រឹក ខេត្តបាត់ដំបង លោក មួយ លាងសេង បានមានប្រសាសន៍ថា ស្រ្តីមានផ្ទៃ៥ខែ មកពីស្រុកត្រាំកក់ខេត្តតាកែវ ត្រូវបានក្រុមប៉ូលិសចាប់ខ្លួនកាលពីថ្ងៃទី៨ ខែសីហា ឆ្នាំ២០០៩ ដោយចោទពីបទជួញដូរមនុស្ស។
លោកបន្តថា ស្រ្តីឈ្មោះ សេង អូន អាយុ ៣០ឆ្នាំ ខាងលើនេះ បានលួចយកកូនស្រីអ្នកស្រុកកំរៀងម្នាក់ អាយុ ៤ឆ្នាំ និងកូនប្រុសផ្ទាល់ខ្លួនម្នាក់ អាយុ ៣ឆ្នាំ ទៅអំពាវនាវលក់ឲ្យប្រជាជនថៃនៅផ្សារសុខសាលី ក្នុងទឹកដីថៃ ទល់មុខច្រកអូររំដួល ស្រុកភ្នំព្រឹក ខេត្តបាត់ដំបង។
លោក មួយ លាងសេង មានប្រសាសន៍ដូច្នេះ ៖ «យើងទទួលដំណឹងពីថៃមកវិញ ថាមានគេយកក្មេងទៅលក់ អ៊ីចឹងយើងទៅឃាត់ខ្លួនគាត់មក។ ក្មេងហ្នឹងតែមួយទេ កូនវា១។ ក្មេងស្រីអាយុ៤ឆ្នាំ កូនអាយុ៣ឆ្នាំ កូនប្រុស ហើយមានផ្ទៃពោះ ៥ខែទៀត។ យកលក់នៅថៃហ្នឹងតែម្ដង»។
អធិការនគរបាលស្រុកកំរៀង លោក ឈឹម គឹមហុង បានថ្លែងថា ក្រោយពីនគរបាលស្រុកភ្នំព្រឹក បញ្ជូនជនសង្ស័យមក នគរបាលស្រុកកំរៀង ស្រ្តីជាជនសង្ស័យនោះ បានឆ្លើយថា មូលហេតុដែលយកក្មេងទាំងពីរទៅអំពាវនាវលក់ឲ្យថៃ គឺដោយសារខ្លួនក្រីក្រអត់លុយ។
លោក ឈឹម គឹមហុង មានប្រសាសន៍ដូច្នេះថា ៖ «គាត់យកក្មេងពីឃុំអូរដាលើ ឃុំបឹងរាំង យកទៅស្រុកភ្នំព្រឹក ដើរអំពាវនាវលក់កូន ដោយសារគាត់អត់មានលុយ តែកូនគេទេ ទៅឆបោកអ៊ីចឹង ហើយដល់ខាងម្តាយខាងជនរងគ្រោះ គ្នារវល់លក់នំនៅស្រុកខ្ញុំនេះ»។
នាយប៉ុស្តិ៍នគរបាលឃុំបឹងរាំង លោក សេន សុផាន បានថ្លែងថា ក្មេងស្រីរងគ្រោះដែលត្រូវបានជនសង្ស័យលួចយកទៅលក់នោះ អាយុ ៤ឆ្នាំ រស់នៅភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង ត្រូវបានប៉ូលិសប្រគល់ឲ្យលោកស្រី យ៉ាំ ចាន់ ជាម្តាយវិញ។ ចំណែកស្ត្រីជាជនសង្ស័យនិងកូនប្រុស អាយុបីឆ្នាំ ត្រូវបានប៉ូលិសកសាងសំណុំរឿងបញ្ជូនឲ្យតុលាការចាត់ការតាមផ្លូវច្បាប់។
ព្រះរាជអាជ្ញាតុលាការខេត្តបាត់ដំបង លោក ស យសថាវរៈ បានថ្លែងនៅព្រឹកថ្ងៃអង្គារ ទី១១ ខែសីហា ថា ស្រ្តីជាម្តាយនិងកូន ត្រូវតុលាការសម្រចឃុំខ្លួនបណ្តោះអាសន្ន ៖ «ខ្ញុំអត់ដឹងថា គេចោទពីបទអីទេ លោកព្រះរាជអាជ្ញារងគាត់កាន់ ប៉ុន្តែយកទៅឃុំបាត់ហើយ»។
មន្ត្រីស៊ើបអង្កេតនៃសមាគមការពារសិទ្ធិមនុស្ស អាដហុក ដែលមានមូលដ្ឋាននៅខេត្តបាត់ដំបង លោក យិន ម៉េងលី បានថ្លែងថា ផ្អែកតាមច្បាប់ប្រឆាំងការជួញដូរមនុស្សនិងអំពើធ្វើអាជីវកម្មផ្លូវភេទ ដែលរដ្ឋសភាបានអនុម័តកាលពីឆ្នាំ២០០៨ ជនល្មើសត្រូវតែទទួលទោស។
លោកបន្តថា ប្រសិនបើករណីអនីតិជនខាងលើនេះ តាមផ្លូវច្បាប់ ជនសង្ស័យអាចត្រូវតុលាការផ្តន្ទាទោសដាក់ពន្ធនាគាររយៈពេលពី ១៥ឆ្នាំ ទៅ ២០ឆ្នាំ៕
No comments:
Post a Comment