បញ្ហាពលរដ្ឋខ្មែរធ្វើចំណាកស្រុកទៅរកការងារធ្វើនៅក្រៅប្រទេស
ដោយ ហ្សាការីយ៉ា
2009-08-12
បញ្ហាខ្វះការងារធ្វើនៅប្រទេសកម្ពុជា បានញុំាងឲ្យប្រជាពលរដ្ឋសម្រេចចិត្តចំណាកស្រុកជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ទៅកាន់ប្រទេស ម៉ាឡេស៊ី ថៃ ជប៉ុន និង កូរ៉េ។
ពលករខ្មែរកំពុងចុះឈ្មោះសុំទៅធ្វើការនៅក្រៅប្រទេសនៅការិយាល័យក្រុមហ៊ុនមួយនាទីក្រុងភ្នំពេញ រូបថត ខែកុម្ភៈ ២០០៩។
ក្នុងចំណោមអ្នកចំណាកស្រុកទំាងនោះ គេសង្កេតឃើញពលរដ្ឋខ្មែរមួយចំនួនបានទៅធ្វើការស្របច្បាប់ និងមិនស្របច្បាប់នៅក្រៅប្រទេសនោះ។
ពលករមួយរូបឈ្មោះ នៅ សុខនឿន នៅភូមិព្រែកប្រសព្វ ខេត្រក្រចេះ មានប្រសាសន៍ថា អ្នកស្រីធ្លាប់បានទៅធ្វើការនៅតាមផ្ទះក្នុងប្រទេសម៉ាឡេស៊ី ចំនួនពីរឆ្នាំមកហើយ ដោយមានប្រាក់ខែសរុប និងប្រាក់លើកទឹកចិត្តពីម្ចាស់ផ្ទះបានជាង ៣ពាន់ដុល្លារ។ ប៉ុន្តែក្រោយពីពេលត្រឡប់ពីប្រទេសម៉ាឡេស៊ី មកនៅភូមិកំណើត ពឹងលើរបរកសិកម្ម ឬធ្វើការរោងចក្រនោះ គឺមិនអាចផ្គត់ផ្គង់គ្រួសារបានទេ ដូច្នេះអ្នកស្រីសម្រេចចិត្តទៅធ្វើការនៅម៉ាឡេស៊ី ទៀត តាមរយៈក្រុមហ៊ុន OSM Group។
ពលករ នៅ សុខនឿន ឲ្យដឹងដូច្នេះ ៖ «នៅទីនេះមានការងារធ្វើតែចាយអត់គ្រាន់ បានប្រាក់ខែបន្តិចបន្តួច ធ្វើការរោងចក្រចាយអត់គ្រប់»។
ក្នុងឯកសណ្ឋានពណ៌ខ្មៅ នៅក្នុងមជ្ឈមណ្ឌលអប់រំភាសាបរទេស និងបញ្ជួនពលករទៅក្រៅប្រទេស អ្នកស្រី ស៊ាង សុណា មកពីខែត្រកំពត មានប្រសាសន៍ទំាងទឹកមុខស្រពោនថា គ្មានអ្នកណាម្នាក់ចង់ឃា្លតឆ្ងាយពីក្រុមគ្រួសារនោះទេ ប៉ុន្តែដោយគ្មានការងារធ្វើនៅស្រុកកំណើត ហើយរកការងារធ្វើនៅតាមរោងចក្រនៅភ្នំពេញ មិនបានទៀតនោះ គួបផ្សំនឹងជីវភាពខ្វះខាត អ្នកស្រីត្រូវបង្ខំចិត្តទៅធ្វើការនៅក្រៅប្រទេស ដើម្បីយកប្រាក់ខែផ្ញើឲ្យកូនរៀន។
អ្នកស្រី ស៊ាង សុណា មានប្រសាសន៍ដូច្នេះ ៖ «នៅស្រុកខ្មែររាល់ថ្ងៃមានការលំបាក ព្រោះរោងចក្របិទច្រើន ស្រ្តីខ្មែរអត់មានការងារធ្វើ ម្ល៉ោះហើយចេញទៅធ្វើការនៅប្រទេសក្រៅ។ សូមឲ្យរដ្ឋាភិបាលជួយរកការងារធ្វើ ដើម្បីកាត់បន្ថយនូវជីវភាពក្រីក្រ»។
កញ្ញា ឯក សុខណាង មានអាយុ ២០ឆ្នាំ នៅភូមិព្រៃតាហូ ស្រុកស្ទឹងសែន ខែត្រកំពង់ធំ បានឲ្យដឹងថា កញ្ញាមករៀនភាសាអង់គ្លេសនៅភ្នំពេញ គឺក្នុងគោលបំណងទៅរកការងារធ្វើក្រៅប្រទេស។ កញ្ញាបានឲ្យដឹងទៀតថា ដោយសាររស់នៅក្នុងគ្រួសារក្រីក្រមិនមានលទ្ធភាពរៀនបានច្រើន គឺកញ្ញបានឈប់រៀនតាំងពីឆ្នាំ ២០០៥ ត្រឹមថ្នាក់ទី៧ តែប៉ុណ្ណោះ។ សុខណា បានដកដង្ហើមធំទាំងនឹកស្តាយការសិក្សាដែលខ្លួនចង់រៀនបានខ្ពង់ខ្ពស់ដូចមិត្តភក្ដិដែរ តែឪពុកម្តាយគ្មានលទ្ធភាពឲ្យសិក្សាបន្ត។
កញ្ញា ឯក សុខណាង បានឲ្យដឹងថា ៖ «ចង់ទៅធ្វើការទីនោះ ព្រោះចង់រកកម្រៃដើម្បីជួយសម្រួលគ្រួសារ ជួយផ្ដល់ឲ្យប្អូនៗ បានរៀនខ្ពស់ជាង»។
ស្រី លក្ខណ៍ មានស្រុកកំណើតនៅស្រុកកំពង់សៀម ខែត្រកំពង់ចាម មានប្រសាសន៍ថា កញ្ញាបានមកធ្វើការរោងចក្រនៅទីក្រុងភ្នំពេញ ជាច្រើឆ្នាំមកហើយ ប៉ុន្តែស្របពេលដែលវិបត្តិសេដ្ឋកិច្ចពិភពធ្លាក់ចុះ បានប៉ះពាល់ដល់ប្រទេសកម្ពុជា រោងចក្រមួយចំនួនបានបិទទ្វារ ដូច្នេះកញ្ញាក៏បានសម្រេចចិត្តមកចុះឈ្មោះជាមួយក្រុមហ៊ុន OSM Group។ កញ្ញាបានបញ្ជាក់ថា កាលពីធ្វើការរោងចក្រនៅក្រុងភ្នំពេញ គឺទទួលបានប្រាក់ខែជាង ៦០ដុល្លារប៉ុណ្ណោះក្នុងមួយខែ។
ប្រធានក្រុមហ៊ុន OSM Group លោក សុះ ម៉ាត់ មានប្រសាសសន៍ថា ក្រុមហ៊ុនរបស់លោកយកពលករទៅធ្វើការនៅប្រទេសម៉ាឡេស៊ី និងប្រទេសថៃ ដែលធ្វើការខាង អេឡិចត្រូនិក សំណង់ និងធ្វើការជាមេផ្ទះជាដើម។ លោកបន្តថា ក្នុងរយៈពេលប៉ុន្មានខែចុងក្រោយនេះ សន្ទុះនៃពលករបានទាក់ទងនិងចុះឈ្មោះដើម្បីធ្វើការនៅប្រទេសក្រៅនោះ កើនឡើងជាងមុន ហើយពួកគេអាចទទួលបានប្រាក់ខែ ១៨០ដុល្លារក្នុងមួយខែ ដោយធ្វើការជាមេផ្ទះនៅប្រទេសម៉ាឡេស៊ី។
លោក សុះ ម៉ាត់ មានប្រសាសន៍ដូច្នេះថា ៖ «បន្ទាប់ពីមានវិបត្តិសេដ្ឋកិច្ចពិភពលោកមកហ្នឹង គឺពលករខ្មែរយើងមានមកចុះឈ្មោះច្រើនទៅធ្វើការនៅបរទេស។ ការដែលទៅហ្នឹងមិនសូវជាមានបញ្ហាអីទេ បញ្ហាគឺបន្តិចបន្តួចតែប៉ុណ្ណោះ គឺបញ្ហាដោយសារពលករយើងភាគច្រើនគ្នាមកពីជនបទ ដល់អ៊ីចឹងអ្នកខ្លះទៅនៅជាមួយគេ ប្រទេសគេទំនើប ប្រើឧបករណ៍ទំនើបស្អីៗ ហើយនិងការស្អាតស្អំរបស់គេហ្នឹង គឺពលករកែទម្លាប់ចាស់វាមិនកើត»។
ប្រធានអង្គការខារ៉ាម កម្ពុជា លោក យ៉ា ណាវុធ បានមានប្រសាសន៍ថា ការធ្វើចំណាកស្រុករបស់ពលករខ្មែរ គឺមានមួយចំនួនបានធ្វើការចំណាកស្រុកមិនស្របច្បាប់ផងដែរ។ ពលករដែលបានទៅធ្វើការនៅក្រៅប្រទេសទាំងស្របច្បាប់ និងមិនស្របច្បាប់ គឺធ្វើការរោងចក្រសំណង់នេសាទ ធ្វើការក្នុងផ្ទះ កម្មសិក្សា និងផ្នែកឧស្សាហកម្មជាដើម។ លោកបានបន្តថា ដោយសារប្រទេសកម្ពុជា មានទីផ្សារចង្អៀត ពលរដ្ឋគ្មានការងារធ្វើច្រើន គឺបានធ្វើឲ្យពលរដ្ឋខ្មែរមួយចំនួនធ្វើការចំណាកស្រុកទៅរកការងារធ្វើនៅប្រទេសជិតខាងដោយខុសច្បាប់។ លោកបន្តថា រដ្ឋាភិបាលគួរតែបង្កើតការងារឲ្យបានច្រើនសម្រាប់ឲ្យពលរដ្ឋខ្មែរ។
លោក យ៉ា ណាវុធ មានប្រសាសន៍ថា ៖ «ប៉ុន្តែទោះបីយ៉ាងណាក៏ដោយ យើងត្រូវព្យាយាមបង្កើតការងារនៅក្នុងស្រុកសម្រាប់ប្រជាពលរដ្ឋយើងបន្ថែមទៀត បើពុំនោះទេប្រជាពលរដ្ឋនៅតែធ្វើចំណាកស្រុកទៅក្រៅប្រទេសដើម្បីស្វែងរកការងារអ៊ីចឹង។ ហើយមួយទៀត ដោយសារប្រទេសកម្ពុជា យើង ជាប្រទេសផ្នែកកសិកម្ម អ៊ីចឹងយើងគួរតែគិតគូរទៅលើផ្នែកវិស័យកសិកម្មឲ្យបានច្រើន ធ្វើយ៉ាងម៉េចធ្វើប្រព័ន្ធធារាសាស្រ្ដ ការរកទីផ្សារផលិតផលសម្រាប់ប្រជាពលរដ្ឋ ការបង្កើតការងារនៅតាមមូលដ្ឋាន ខ្ញុំគិតថាប្រហែលជាអាចជួយប្រជាពលរដ្ឋយើងបានច្រើន ដើម្បីកាត់បន្ថយភាពក្រីក្រ និងវិបត្តិសេដ្ឋកិច្ច»។
រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ លោក ឧស្មាន ហាស្សាន់ ធ្លាប់ឲ្យវិទ្យុអាស៊ីសេរី ដឹងកាលពីពេលថ្មីៗនេះថា ពលករខ្មែរដែលធ្វើការចំណាកស្រុកនោះ មានជាង ៧ម៉ឺននាក់ក្នុងឆ្នាំ ២០០៨ រួមមានទៅប្រទេស ថៃ ម៉ាឡេស៊ី ជប៉ុន និង កូរ៉េ។
លោកបន្តថា ក្រសួងការងារបានធ្វើការផ្សព្វផ្សាយនិងណែនាំដល់ក្រុមហ៊ុននានានោះ ឲ្យយកចិត្តទុកដាក់ដល់ពលករ ជៀសវាងការធ្វើបាបដល់ពលករកម្ពុជា នៅក្រៅប្រទេសផងដែរ។
លោក យ៉ា ណាវុធ បានឲ្យដឹងទៀតថា ពលករខ្មែរនៅតែមានការធ្វើបាបពីម្ចាស់ផ្ទះ ឬថៅកែរបស់ខ្លួននៅក្រៅប្រទេស ដោយសារម្ចាស់ក្រុមហ៊ុនមួយចំនួនបានចុះកិច្ចសន្យាលក្ខខណ្ឌការងារនៅប្រទេសកម្ពុជា ជាមួយពលករផ្សេងតែនៅពេលក្រុមហ៊ុនដៃគូនៅបរទេសនោះ យកពលករឲ្យធ្វើការងារនៅប្រទេសមួយចំនួននោះចុះលក្ខខណ្ឌការងារផ្សេងទៅវិញ ដែលរំលោភទៅលើសិទ្ធិការងាររបស់ពលករកម្ពុជា។ លោកមានប្រសាសន៍ថា ក្នុងចំណោមពលករជាស្រ្តីមួយចំនួន ត្រូវបានគេយកទៅជួញដូរក៏មាន នាពេលកន្លងមក។
លោក យ៉ា ណាវុធ បានបញ្ជាក់ទៀតថា ថ្មីៗនេះ រដ្ឋាភិបាលថៃ បានចាប់បញ្ជួនពលករខ្មែរខុសច្បាប់មកកម្ពុជា វិញ ក្នុងមួយថ្ងៃ ពី ៥០០នាក់ ទៅ ៧០០នាក់។ លោកបញ្ជាក់ថា ចំពោះបញ្ហានេះ គឺដោយសារតែភាពឥតការងារធ្វើនៅកម្ពុជា កើនឡើង បានជាពលករទាំងនោះធ្វើការចំណាកស្រុកទៅរកការងារនៅប្រទេសជិតខាង។
លោកបានលើកឡើងទៀតថា ដើម្បីចៀសវាងនៃការចំណាកស្រុកកាន់តែច្រើនរបស់ពលរដ្ឋខ្មែរនោះ រដ្ឋាភិបាលគួរតែបង្កើនការងារក្នុងស្រុកឲ្យបានច្រើនថែមទៀត ដើម្បីចៀសវាងនៃការធ្វើបាបពលករខ្មែរនៅក្រៅប្រទេសនោះ៕
No comments:
Post a Comment