មេដឹកនាំខ្មែរអ៊ិស្លាមនិយាយពីការប្រើប្រាស់ជំនួយថវិការបស់គុយវ៉េត
ដោយ ហ្សាការីយ៉ា
2009-08-12
រដ្ឋលេខាធិការក្រសួងការងារនិងជាប្រធានអង្គការមូលនិធិអភិវឌ្ឍន៍មូស្លឹមកម្ពុជា លោក អូស្មាន ហាស្សាន់ មានប្រសាសន៍ឲ្យដឹងនៅថ្ងៃទី១១ សីហា ថា ថវិកាចំនួន៥លានដុល្លារសហរដ្ឋអាមេរិកត្រូវគណៈកម្មាធិការគ្រប់គ្រងប្រើប្រាស់អស់ប្រមាណ១០ម៉ឺនដុលា្លរសហរដ្ឋអាមេរិកហើយក្នុងការសាងសង់វិហារអ៊ិស្លាមចំនួនបីជូនជនជាតិចារាយនៅក្នុងស្រុកអូរយ៉ាដាវ ខែត្ររតនគិរី។
ខ្មែរអ៊ិស្លាមចូលរួមស្ដាប់មតិសំណេះសំណាលរបស់ឯកអគ្គរដ្ឋទូតសហរដ្ឋអាមេរិក នៅឯស្ថានទូតសហរដ្ឋអាមេរិក កាលពីខែតុលា ឆ្នាំ២០០៧ ។
លោក ឧស្មាន ហាស្សាន់ បានបញ្ជាក់ដូច្នេះ ៖ «ហើយយើងនឹងបង្កើតឲ្យមានសាលប្រជុំមួយ សម្រាប់ចំណុះពី១០០០ ទៅ ១៥០០ គឺអាចឈានទៅដល់២០០០នាក់ដើម្បីធ្វើការប្រជុំសម្រាប់សហគមន៍អ៊ិស្លាមនៅរាជធានីភ្នំពេញ ដើម្បីជាប្រយោជន៍សម្រាប់សហគមន៍អ៊ិស្លាមផង ឬក៏ជាប្រយោជន៍សម្រាប់សង្គមជាតិផង»។
លោក អូស្មាន ហាស្សាន់ បានបញ្ជាក់ទៀតថា ថវិកាដែលនៅសល់ជាង៤លានដុល្លារទៀតគឺនៅក្នុងគម្រោងសាងសង់មជ្ឈមណ្ឌលអ៊ិស្លាម អន្តេវាសិកដ្ឋាន សាកលវិទ្យាល័យ សាលប្រជុំនិងការជួសជុលវិហារធំបឹងកក់ឬការសាងសង់វិហារថ្មី ហើយការសាងសង់នេះគឺស្ថិតនៅក្នុងទីតាំងតែមួយក្នុងបរិវេណវិហារអ៊ិស្លាមធំបឹងកក់បច្ចុប្បន្ន ដែលមានផ្ទៃដីប្រមាណ២ហិកតារ។
លោក អូស្មាន ហាស្សាន់ បានមានប្រសាសន៍ថា ៖ «បន្ទាប់មកគឺយើងនឹងសម្រេចគ្នាក្នុងពេលឆាប់ៗខាងមុខ ២-៣ថ្ងៃនេះ ថា យើងត្រូវធ្វើយ៉ាងណាដើម្បីឲ្យ ទី១ ជំហានវិហារឲ្យបានទៅមុខសិន»។
អ្នកស្រាវជ្រាវឯករាជ្យលើជនជាតិចាម គឺលោក អ៊ីសា អូស្មាន បានសម្ដែងនូវសុទិដ្ឋិនិយមចំពោះជំនួយពីប្រទេសគុយវ៉េត ដែលបានផ្តល់សម្រាប់សហគមន៍ខ្មែរអ៊ិស្លាម។ លោក អ៊ីសា អូស្មាន បានបញ្ជាក់ទៀតថា ប្រការដែលសំខាន់បំផុតនោះ គឺរាល់សមិទ្ធិផលទាំងឡាយក្នុងគម្រោងនៃជំនួយនេះ គឺថ្នាក់ដឹកនាំមិនត្រូវប្រកាន់និន្នាការនយោបាយគណបក្សឬសាសនាណាមួយនោះទេ។
លោក អ៊ីសា អូស្មាន បានបញ្ជាក់ថា ៖ «គឺជាមជ្ឈមណ្ឌលមួយដែលមានលក្ខណៈជាអព្យាក្រឹត្យ មិនប្រកាន់និន្នាការសាសនាមកពីប្រទេសផ្សេងៗពីគ្នា។ ថ្នាក់ដឹកនាំសាសនាអ៊ិស្លាមនៅកម្ពុជា ហ្នឹងគួរដែរ គឺយកចិត្តទុកដាក់ទៅលើការអភិវឌ្ឍនៅក្នុងសហគមន៍ ពីព្រោះនៅក្នុងប្រទេសមួយដែលក្រីក្រ រឿងចំណូលសម្រាប់ចិញ្ចឹមជីវិតខ្លួនគាត់ជារឿងចាំបាច់បំផុត។ មុននឹងយើងសម្លឹងទៅមើលឃើញអ្វីផ្សេង គឺថា ទី១ ចាំបាច់បំផុតគឺធ្វើម៉េចឲ្យគាត់មានអង្ករហូប មានទីកន្លែងរស់នៅ»។
សូមជម្រាបថា ជំនួយពីប្រទេសគុយវ៉េតដែលបានផ្តល់ជូនរដ្ឋាភិបាលកម្ពុជានេះតាំងពីខែសីហា ឆ្នាំ២០០៨មកម៉្លេះ។
លោក អូស្មាន ហាសាន់ បានឲ្យដឹងទៀតថា ក្នុងជំនួយទាំង៥លានដុល្លារនេះ គឺគណៈកម្មាធិការគ្រប់គ្រងថវិកាទទួលពីម្ចាស់ជំនួយបានតែ៦សែនដុល្លារទេ នៅជាង៤លានទៀត ម្ចាស់ជំនួយសន្យាថានឹងផ្តល់ឲ្យជាបន្តបន្ទាប់។
ជាមួយនឹងជំនួយនេះ អ្នកស្រាវជ្រាវលើជនជាតិចាមដដែលទទូចថា ប្រសិនបើជំនួយនេះសល់ថវិកាខ្លះពីគម្រោងខាងលើ ឬក៏ប្រទេសគុយវ៉េត ផ្តល់ប្រាក់ឲ្យបន្ថែមទៀតនោះ គណៈកម្មាធិការគ្រប់គ្រងថវិកាគួរតែយកចិត្តទុកដាក់បណ្តុះបណ្តាលជំនាញណាមួយដល់ប្រជាពលរដ្ឋនៅតាមសហគមន៍ដែលប្រជាពលរដ្ឋទូទៅជាច្រើននាក់កំពុងចោទអំពីបញ្ហាអត់ការងារធ្វើនាពេលបច្ចុប្បន្ន៕
No comments:
Post a Comment