នាយករដ្ឋមន្ត្រី៖ ការឈ្នះក្ដីលើ មូរ សុខហួរ គឺជារឿងយុត្តិធម៌
ដោយ ហ្សាការីយ៉ា
2009-08-12
លោកនាយករដ្ឋមន្រ្តី ហ៊ុន សែន បានលើកឡើងថា តុលាការសាលាដំបូងរាជធានីភ្នំពេញ បានប្រកាសសាលក្រមឲ្យលោកឈ្នះក្តីរវាងលោកស្រី មូរ សុខហួរ នោះ ជារឿងមួយយុត្តិធម៌ ហើយថា នេះមិនមែនលោកជាអ្នកប្តឹងមុនទេ គឺលោកស្រី មូរ សុខហួរ ទេ ដែលនាំអាទិ៍ប្តឹងលោកមុននោះ។
លោកនាយករដ្ឋមន្ត្រី ហ៊ុន សែន នៃប្រទេសកម្ពុជា។
ការថ្លែងដូច្នេះនៅក្នុងឱកាសចែកសញ្ញាបត្រជូននិស្សិតនៅសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ចនៅព្រឹកថ្ងៃទី១២ សីហា។
លោកនាយករដ្ឋមន្រ្តី ហ៊ុន សែន មានប្រសាសន៍ថា លោកនឹងតបតតាមបានទាំងអស់គឺលោកស្រី មូរ សុខហួរ អាចប្តឹងតាមផ្លូវច្បាប់ ផ្លូវនយោបាយ ឬផ្លូវយោធា ក៏ដោយ។
លោកនាយករដ្ឋមន្រ្តីបានថ្លែងថា ៖ «មិនមែន អង់សាន ស៊ូជី ទេណា៎ កុំសង្ឃឹម។ ឥឡូវនិយាយប៉ុណ្ណឹងប្ដឹងទៀតទៅ! ប្ដឹង ខ្ញុំប្ដឹងទៀត ហើយដល់គេប្ដឹងតាមផ្លូវតុលាការ ល្អណាស់ហើយ ប៉ះពាល់គេ គេមិនប្រើអំណាចគេនោះ។ ខ្ញុំជានាយករដ្ឋមន្ត្រីសុខចិត្តប្រើតុលាការ កងទ័ពគេសុខចិត្តប្រើតុលាការ ហើយចុះបើមិនឲ្យគេប្រើតុលាការ ឲ្យគេប្រើកាំភ្លើងឬអី? និយាយគ្នាឲ្យច្បាស់ ខ្ញុំបញ្ជាត្រូវការតែ២ម៉ោងទេភ្នំពេញយកអស់ សាកលមើល៍។ បើខ្ញុំប្រើអំណាចផ្ដាច់ការ រត់ទៅណាក៏វាមិនរួចដែរ ឃ្លុំបេយកទាំងអស់»។
លោកនាយករដ្ឋមន្រ្តី ហ៊ុន សែន បានបញ្ជាក់ថា គួរតែប្រជែងគ្នាតាមផ្លូវអភិវឌ្ឍន៍ប្រទេសជាតិវិញប្រសើរជាង។
ប្រធានគណបក្សប្រឆាំង គឺលោក សម រង្ស៊ី មានប្រសាសន៍ប្រតិកម្មថា តុលាការក្នុងប្រទេសកម្ពុជាបច្ចុប្បន្នគ្រាន់តែជាឧបករណ៍បម្រើអ្នកដឹកនាំប្រទេសតែប៉ុណ្ណោះ មិនមែនបម្រើយុត្តិធម៌ជូនប្រជារាស្រ្តនោះទេ។ ប៉ុន្តែលោក សម រង្ស៊ី បានយល់ស្របទៅនឹងការលើកឡើងរបស់លោកនាយករដ្ឋមន្រ្តី ហ៊ុន សែន ដែលថា បើចង់យកឈ្នះគ្នាគឺយកឈ្នះតាមផ្លូវអភិវឌ្ឍន៍វិញនោះ ដើម្បីឲ្យប្រទេសជាតិមានការរីកចម្រើន។
លោក សម រង្ស៊ី បានបញ្ជាក់ថា ៖ «ឃ្លាចុងក្រោយនេះគឺសមរម្យ ត្រឹមត្រូវ គឺថា បើយើងយកចាញ់ឈ្នះ ចាញ់ឈ្នះផ្លូវអភិវឌ្ឍន៍ គឺថា យើងប្រមូលគំនិតឲ្យប្រជារាស្ត្រប្រៀបធៀបថា គំនិតណាល្អប្រសើរជាងសម្រាប់ប្រទេសជាតិធ្វើឲ្យជីវភាពប្រជារាស្ត្រមានការរីកចម្រើនបានឆាប់»។
មន្រ្តីស៊ើបអង្កេតសមាគមសិទ្ធិមនុស្ស អាដហុក លោក ចាន់ សូវ៉េត មានប្រសាសន៍ថា ការលើកឡើងរបស់លោកនាយករដ្ឋមន្រ្តីខាងលើគឺគួរឲ្យព្រួយបារម្ហ ព្រោះនេះជាការសម្ដែងនូវឫទ្ធិអំណាចរបស់លោក។
លោក ចាន់ សូវ៉េត បានមានប្រសាសន៍ថា ៖ «ការប្រើកម្លាំងប្រដាប់អាវុធក្ដី គឺខ្ញុំគិតថា គ្មាននរណាមួយនៅក្នុងស្រុកខ្មែរមានអាវុធជាតិផ្ទុះឬជាកងកម្លាំងអីទៀតទេ គឺមានតែច្បាប់ទេ។ ដូច្នេះអ្វីដែលជាការកត់សម្គាល់ ខ្ញុំគិតថា ប្រសាសន៍សម្ដេចនាយករដ្ឋមន្ត្រីគឺធ្វើឲ្យមានការព្រួយបារម្ភទៅវិញទេ ព្រួយបារម្ភថា ទោះជាមានការប្ដឹងផ្ដល់យ៉ាងណាក៏មិនអាចឈ្នះសម្ដេចបានដែរ»។
សូមជម្រាបថា តុលាការសាលាដំបូងរាជធានីភ្នំពេញបានប្រកាសសាលក្រមកាលពីថ្ងៃទី៤ សីហា ដោយផ្តន្ទាទោសលោកស្រី មូរ សុខហួរ តំណាងរាស្រ្តគណបក្សសមរង្ស៊ី ឲ្យលោកស្រីបង់ប្រាក់ផាកពិន័យចំនួនសរុប១៦លាន៥សែនរៀល ក្រោមបទបរិហារកេរ្តិ៍លោកនាយករដ្ឋមន្រ្តី ហ៊ុន សែន។
ទោះជាយ៉ាងណា លោក ចាន់ សូវ៉េត មន្ត្រីអង្គការសិទ្ធិមនុស្ស ហៅកាត់ថា អាដហុក បានទទូចថា សូមបញ្ចប់ទៅការប្តឹងផ្តល់គ្នាអំពីបទបរិហារកេរ្តិ៍ និងការផ្សាយព័ត៌មានមិនពិតនោះ គួរតែដោះស្រាយតាមផ្លូវសន្តិវិធីវិញប្រសើរជាង ដែលស្របនឹងប្រទេសកម្ពុជាជាប្រទេសប្រកាន់នូវលិទ្ធិប្រជាធិបតេយ្យ៕
No comments:
Post a Comment