សហគមន៍២៧ស្នើសុំឲ្យអាជ្ញាធរដោះស្រាយបញ្ហាផលប៉ះពាល់ចំពោះជីវភាព
ដោយ រដ្ឋា វិសាល
2009-08-11
អ្នកភូមិប្រហែល២០០នាក់នៃសហគមន៍ចំនួន២៧មកពីខេត្តក្រុងចំនួន១៩ បានធ្វើការជួបជុំគ្នានៅទីក្រុងភ្នំពេញ នៅថ្ងៃអង្គារ ទី១១ សីហា ឆ្នាំ២០០៩ ដើម្បីដាក់ញតិ្តជូនស្ថាប័នសំខាន់ៗចំនួន៩នៃប្រទេសកម្ពុជា ប្រយោជន៍ស្វែងរកការដោះស្រាយស្តីពីបញ្ហារំលោភដីធ្លី ការកាប់ព្រៃឈើខុសច្បាប់ ការធ្វើអាជីវកម្មរ៉ែធម្មជាតិនិងការបំផ្លាញមច្ឆាជាតិ។
ពិធីដង្ហែក្បួនទាមទារឲ្យបញ្ឈប់ការកាប់រានព្រៃឈើនិងការរំលោភយកដីធ្លីនៅខែត្ររតនគិរី កាលពីថ្ងៃ២៥ មិថុនា ២០០៩។
ប្រភពពីមន្ត្រីសិទ្ធិមនុស្សបញ្ជាក់ថា ក្រុមអ្នកភូមិដែលបំបែកគ្នាជាក្រុមតូចៗនិងក្រុមធំ ក្រុមខ្លះមានគ្នាពី៤ទៅ៦នាក់ ក្រុមខ្លះមានគ្នា៤០ទៅ៦០នាក់ជិះម៉ូតូឌុបឬរ៉ឺមកបាននាំញតិ្តតាមខេត្តនីមួយៗទាមទារឲ្យមានការដោះស្រាយនោះ។
តំណាងសហគមន៍ជនជាតិដើមចារាយមកពីខេត្តរតនគិរី លោក សេវ ហ្វែល បញ្ជាក់ ៖ «សំខាន់ជាងគេគឺបញ្ហាដីធ្លីជនជាតិដើមភាគតិចនៅខេត្តរតនគិរី ពឹងផ្អែកទៅលើចម្ការវិលជុំរបស់ពួកគាត់»។
ចំណែកតំណាងសហគមន៍ជនជាតិដើមព្នងមកពីខេត្តមណ្ឌលគិរី លោក ព្រឹម វណ្ណៈ បន្ថែម ៖ «វាមានប៉ះពាល់ដល់ដីចម្ការ ដីកប់ខ្មោច អារក្ខ ហើយដីត្រណម»។
ប្រភពពីអ្នកឃ្លាំមើលសិទ្ធិមនុស្សដដែលអះអាងថា ពុំមានការរារាំងឬហាមឃាត់ណាមួយត្រូវបានធ្វើឡើងចំពោះការនាំញត្តិរបស់អ្នកភូមិនោះទេ ប៉ុន្តែនៅមុខទីស្តីការគណៈរដ្ឋមន្ត្រី ប៉ូលិសចរាចរណ៍បានបិទការធ្វើចរាចរណ៍ពីម៉ោងជាង៨ព្រឹករហូតម៉ោងជិត១១ថ្ងៃត្រង់ ធ្វើឲ្យមានការកកស្ទះចរាចរណ៍តាមវិថីនៅក្បែរៗនេះ។
មន្ត្រីដដែលមានប្រសាសន៍ថា ក្រុមអ្នកនាំញត្តិគ្រប់ក្រុមត្រូវបានស្ថាប័នទាំង៩ មានសភាជាតិ ក្រសួងមហាផ្ទៃ ក្រសួងកសិកម្ម ខុទ្ទកាល័យលោកនាយករដ្ឋមន្ត្រី ហុន សែន ទីស្តីការគណៈរដ្ឋមន្ត្រី អាជ្ញាធរជាតិដោះស្រាយវិវាទដីធ្លី ក្រសួងបរិស្ថាន ក្រសួងឧស្សាហកម្ម និងឧត្តមក្រុមប្រឹក្សាអង្គចៅក្រម អនុញ្ញាតឲ្យចូលជួប ក៏ប៉ុន្តែញត្តិទាក់ទងបណ្តឹអ្នកភូមិគងយុ ខេត្តរតនគិរី ប្តឹងចោទអ្នកស្រី គាត កុលណី ភរិយាមន្ត្រីជាន់ខ្ពស់ក្នុងរាជរដ្ឋាភិបាល គឺលោក ឆាន់ សាផាន់ ស្ថាប័នអាជ្ញាធរជាតិដោះស្រាយវិវាទដីធ្លីបដិសេធមិនទទួល។
មន្ត្រីឃ្លាំមើលសិទ្ធិមនុស្សអង្គការលីកាដូ លោក សម សំអាត បញ្ជាក់ ៖ «គងយុហ្នឹងខ្ញុំជួបគាត់នៅពេលដែលគាត់ចេញមកវិញ ថាអត់ព្រមទទួលពាក្យគាត់»។
ចំណែកមន្ត្រីឃ្លាំមើលសិទ្ធិមនុស្សពីសមាគមអាដហុក លោក ប៉ែន ប៊ុណ្ណារ៍ បន្ថែម ៖ «ទីបំផុតយើងឃើញថា គេក៏បានទទួលចាត់ឲ្យតំណាងចូលបានដាក់ពាក្យប្ដឹងហ្នឹង»។
តំណាងអ្នកភូមិគងយុ ឈ្មោះ សេវ ខែម ប្រតិកម្មថា ៖ «ករណីនេះអយុត្តិធម៌ ស្ដីឲ្យអ្នកភូមិអ៊ីចឹង»។
វិទ្យុអាស៊ីសេរីមិនអាចទាក់ទងប្រធានអាជ្ញាធរជាតិដោះស្រាយវិវាទដីធ្លី លោក ប៊ិន ឈិន បានទេដោយទូរស័ព្ទមិនអាចភ្ជាប់បាន។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បដិសេធមិនធ្វើអត្ថាធិប្បាយ ដោយសំអាងថាជាភារកិច្ចរបស់អាជ្ញាធរជាតិដោះស្រាយវិវាទដីធ្លី។
រហូតមកពេលនេះ ប្រភពអ្នកភូមិដែលនាំញតិ្តបញ្ជាក់ថា មិនទាន់មានការឆ្លើយតបណាមួយពីស្ថាប័នទាំង៩នោះទេ បើទោះបីជាស្ថាប័នខ្លះទទួលពាក្យបណ្តឹងហើយក៏ដោយ៕
No comments:
Post a Comment