ថ្ងៃទី០១ ខែ០១ ឆ្នាំ២០១១ ជា​ថ្ងៃ​ចាប់​ផ្ដើម​ប្រ​កាស​ទ្រព្យ​សម្បត្តិ។ លោក កែវ រ៉េមី ​ ​បាន​ប្រាប់ Sabay​តាម​រយៈ​ទូរស័ព្ទ​​ថា​ មាន​មន្ត្រី​ជាង​មួយ​សែន​​នាក់​ដែល​មាន​​​ឈ្មោះ​ត្រូវ​ប្រកាស​ទ្រព្យសម្បត្តិ​ចាប់​ពី​ថ្ងៃទី១​ខែ​មករា ឆ្នាំ​ ២០១១​នេះ​ត​ទៅ។ លោក កែវ រ៉េមី អ្នក​នាំ​ពាក្យ​អង្គភាព​ប្រឆាំង​អំពើ​ពុក​រលួយ​សង្កត់​ធ្ងន់​ថា ក្នុង​ករណី​ដែល​បណ្ដា​មន្ត្រី​ជាប់​កាតព្វកិច្ច​ណា​មិន​ព្រម​ប្រកាស​នឹង​ត្រូវ​ប្រឈម​មុខ​នឹង​ផ្លូវ​ច្បាប់។

ចំណាប់​អារម្មណ៍​ចំពោះ​ការ​ចាប់​ផ្ដើម​ប្រកាស​ទ្រព្យសម្បត្តិ​ស្អែក​នេះ សុខ ជា និស្សិត​ផ្នែក​ច្បាប់​ឆ្នាំ​ទី៤​ នៃ​សាកលវិទ្យាល័យ​នីតិសាស្ត្រ​និង​វិទ្យាសាស្ត្រ​សេដ្ឋកិច្ច​​​ បាន​សំដែង​ការ​សាទរ​ថា​ លោក​សប្បាយ​ចិត្ត​នៅ​ពេល​ដែល​បាន​ដឹង​ថា ថ្ងៃ​ស្អែក​នេះ មន្ត្រី​មួយ​ចំនួន​ចាប់​ផ្ដើម​ប្រកាស​ទ្រព្យសម្បត្តិនោះ។ ​លោក​លើក​ឡើង​ថា នេះ​ជា​សញ្ញាណ​វិជ្ជា​មាន​មួយ ដែល​ជួយ​ពញ្ញាក់​ដល់​អ្នក​ប្រព្រឹត្ត​អំពើ​ពុករលួយ​ទាំង​ឡាយ​​ឲ្យ​ខ្លបខ្លាច។
ក្នុង​ច្បាប់​ប្រ​ឆាំង​អំពើ​ពុក​រលួយ​ការ​ប្រកាស​ទ្រព្យ​សម្បត្តិ​ជា​ការ​សម្ងាត់។ ប៉ុន្តែ​សម្រាប់​និស្សិត​រូប​នេះ​វិញ បើ​ការ​ប្រកាស​នេះ​ អាច​ឲ្យ​អ្នក​ផង​ទាំង​ពួង​ដឹង​ថា មន្ត្រី​ណា​មាន​ប៉ុន្មាន​នោះ​ទើប​ជាការ​​ល្អ។ ធ្វើ​បែប​នេះ ក្នុង​ន័យ​ថា ងាយ​ស្រួល​ផ្ទៀងផ្ទាត់​រវាង​ទ្រព្យ​មុន​ចូល​កាន់​តំណែង​និង​ទ្រព្យ​ក្រោយ​ពី​កាន់​តំណែង។
ជា​ការ​ឆ្លើយ​តប​នឹង​ការ​លើក​ឡើង​ខាង​លើ លោក ​ជា ប៉ូច ​តំណាង​រាស្ត្រ​មក​ពី​គណបក្ស​សមរង្ស៊ី​ បាន​ឲ្យ​ដឹងថា រូប​លោក​ផ្ទាល់​ ព្រម​ទាំង​តំណាងរាស្ត្រ​គណបក្ស​សមរង្ស៊ី​ទាំង​អស់​នឹង​ប្រកាស​ទ្រព្យសម្បត្តិ​របស់​ខ្លួន​ឲ្យ​ប្រជាជន​ដឹង​ឭ​ជា​សាធារណៈ ដោយ​គ្មាន​ការ​លាក់លៀម​អ្វី​ទាំង​អស់​។
លោក​បន្ថែម​ថា ​លោក​ត្រៀម​ខ្លួន​រួច​ជា​ស្រេច​ក្នុង​នាម​ជា​អ្នក​ជាប់​កាតព្វកិច្ច​ក្នុង​ការ​ប្រកាស​ទ្រព្យ​សម្បត្តិ​នេះ។ លោក​បាន​បញ្ជាក់​ថា​ នៅ​ពេល​អង្គភាព​ប្រឆាំង​អំពើ​ពុករលួយ​ជូន​ដំណឹង​មក​រដ្ឋសភា​នោះ​​ លោក​នឹង​ប្រកាស។
ក្រុម​អ្នក​ឃ្លាំ​មើល​អំពើ​ពុក​រលួយ​ក្នុង​ប្រទេស​កម្ពុជា​ក៏​សាទរ​ដែរ​ចំពោះ​ថ្ងៃ​ស្អែក​ដែល​ជា​ការ​បើក​ទំព័រ​ដំបូង​នៃ​ការ​ប្រកាស​ទ្រព្យសម្បត្តិ​របស់​មន្ត្រីៗ។ លោក​ សន ជ័យ អ្នក​សម្រប​សម្រួល​បណ្ដាញ​ដើម្បី​គណនេយ្យ​ភាព​សង្គម​​ប្រចាំ​ប្រទេស​កម្ពុជា បាន​សាទរ​ចំពោះយន្តការ​នេះ។ លោក​មិន​បាន​ចាប់​អារម្មណ៍​ទេ ចំពោះ​ការ​ចង់​ឲ្យ​មន្ត្រី​ប្រកាស​ជា​សាធារណៈ​អី​នោះ​។ ប៉ុន្តែ​លោក​បែរ​ជា​ចាប់​អារម្មណ៍​ចំពោះ​ការ​ដែល​អង្គភាព​នេះ មិន​រឹត​បណ្ដឹង​ការ​ប្រកាស​ទ្រព្យសម្បត្តិ​ក្នុង​ធនាគារ​របស់​មន្ត្រី​ទៅ​វិញ។“…ប្រសិន​បើ​មន្ត្រី​ដែល​​​​ប្រព្រឹត្ត​អំពើ​ពុករលួយ​គាត់​យក​លុយ​ពុករលួយ​នោះ​​ទៅ​ផ្ញើ​នៅ​ធនាគារ​ តើ​យើង​អាច​ដឹង​ទេ​ថា​គាត់​មាន​លុយ​ប៉ុន្មាន ហើយ​ធនាគារ​នោះ​ទៀត​សោត​នឹង​សហការ​ជា​មួយ​អង្គភាព​ប្រឆាំង​អំពើ​ពុករលួយ​ជា​លក្ខណៈ​អន្តរ​ជាតិ​កម្រិត​ណា​នៅ​ពេល​អង្គភាព​មួយ​នេះ​ចុះ​ស៊ើប​អង្កេត?…”
តាម​ការ​អះអាង​ពី​លោក កែវ រ៉េមី អ្នក​នាំ​ពាក្យ​អង្គភាព​ប្រឆាំង​អំពើ​ពុក​រលួយ​ឲ្យ​ដឹង​ថា ទ្រព្យសម្បត្តិ​ដែល​ត្រូវ​ប្រកាស​សំដៅ​សំខាន់​លើ​អចលនទ្រព្យ និង​ចលនទ្រព្យ​ដែល​មាន​តម្លៃ​ក្នុង​១ឯកតា​ចាប់ពី​៤លានរៀល​ឡើង​ទៅ ។
វិធានការណ៍​នេះ​ក៏​ផ្ដោត​លើ​កម្មសិទ្ធិ​អាជីវកម្ម ពាណិជ្ជកម្ម ខ្នាត​តូច ធំ គ្រប់​ប្រភេទ​របស់​មន្ត្រី​ទាំង​នោះ។ ប៉ុន្តែ​មិន​តម្រូវ​ឲ្យ​ប្រកាស​ទ្រព្យសម្បត្តិ​នៅ​ក្នុង​ធនាគារ​ទេ។
លោក កែវ រ៉េមី បាន​ប្រាប់ Sabay តាម​រយៈ​ទូរស័ព្ទ​​ថា​ មន្ត្រី​ដែល​ត្រូវ​ប្រកាស​ទ្រព្យសម្បត្តិ​ រួម​មាន​សមាជិក​ព្រឹទ្ធសភា រដ្ឋសភា រដ្ឋាភិបាល​មន្ត្រី​សាធារណៈ ដែល​មាន​អាណត្តិ​ជ្រើស​តាំង​មន្ត្រី​រាជការ​ស៊ីវិល ​យោធា នគរបាល និង​អ្នក​រាជការ សាធារណៈ ផ្សេងទៀត ដែល​ត្រូវ​បាន ​​ តែងតាំង​ដោយ​ ព្រះ​រាជក្រឹត្យ​ឬ អនុក្រឹត្យ ចៅ​ក្រម​អាសនៈ ​ចៅក្រម​អយ្យការ ​សារការី ក្រឡាបញ្ជី និង​អាជ្ញាសាលា។ល។
បន្ថែម​ពី​នោះ​លោក​ប៉ូលិស ប៉េអិម​​​កង​យោធ​ពល​ខេមរភូមិន្ទ ឋានៈចាប់ពីស័ក្តិ៥ ឬ​​បាន​ការ​តែង​តាំង​ដោយ​ព្រះរាជក្រឹត្យ អនុក្រឹត្យ ជា​ទីប្រឹក្សា ស្ថាប័ន​ណាមួយ ក៏​ត្រូវ​ប្រកាស​ទ្រព្យសម្បត្តិ​ដូច​គ្នា​ដែរ ។ លោក​បាន​បន្ត​ទៀត​ថា ចំពោះ​អង្គភាព​ប្រឆាំង​អំពើ​ពុក​រលួយ​របស់​លោក​វិញ​​ក៏​ត្រូវ​ប្រកាស​ផង​ដែរ​ គឺ​ត្រូវ​ប្រកាស​ទ្រព្យសម្បត្តិ​ចាប់​ពី​ថ្នាក់​លើ​រហូត​ដល់​អ្នក​យាម​ទ្វា។
លោក​បាន​សង្កត់​ធ្ងន់​ថា​ប្រសិន​បើ​​​​មន្ត្រី​ដែល​ត្រូវ​ប្រកាស​ទ្រព្យសម្បត្តិ​បែរ​ជា​ មិន​ព្រម​ប្រកាស​វិញ​អង្គភាព​ប្រឆាំង​អំពើ​ពុក​រលួយ​របស់​លោក​​នឹង​ចេញ​លិខិត​មួយ​ជូន​​ទៅ​មន្ត្រី​រូប​នោះ​ ហើយ​ប្រសិន​បើ​មន្ត្រី​រូប​នោះ​​នៅ​តែ​រឹង​ទទឹង​មិន​ព្រម​ធ្វើ​តាម​ទៀត​មន្ត្រី​នោះ​នឹង​ត្រូវ​ទទួល​ទោស​តាម​ច្បាប់​។
ការបើកទំព័រ​ប្រកាស​ទ្រព្យសម្បត្តិ​នេះ បានចាប់ផ្ដើមចំថ្ងៃសៅរ៍ដែលជាចូលឆ្នាំសកលត្រូវគេឈប់សម្រាកទូទាំងពិភពលោក៕
អត្ថបទៈខុត សីហា