គណបក្សប្រឆាំងនិងអង្គការសង្គមស៊ីវិលប្រកាសគាំទ្រការលុបចោលក្រុមហ៊ុនមិនធ្វើសកម្មភាព
ដោយ គី សុខលីម, www.rfi.fr
អត្ថបទចុះផ្សាយកាលពីថ្ងៃទី 09/01/2010 កែប្រែលើកចុងក្រោយកាលពីថ្ងៃទី 09/01/2010 13:57 ម៉ោងសកល
គណបក្សប្រឆាំងសមរង្ស៊ី គណបក្សសិទ្ធិមនុស្សនិងអង្គការសង្គមស៊ីវិលបានប្រកាសគាំទ្រចំពោះការលុបចោលក្រុមហ៊ុនចំនួន៥០ដែលមិនធ្វើសកម្មភាពបន្ទាប់ពីទទួលបានសិទ្ធិវិនិយោគពីរដ្ឋាភិបាល។ក្រុមហ៊ុនដែលលុបចោលទាំងអស់នេះត្រូវបានគេចោទប្រកាន់ថាបានកាប់បំផ្លាញព្រៃឈើជាច្រើន។
សូមចុចខាងក្រោមដើម្បីស្តាប់ ៖
គណបក្សប្រឆាំងនិងអង្គការសង្គមស៊ីវិលប្រកាសនៅថ្ងៃសៅរ៍នេះគាំទ្រសេចក្តីសម្រេចលុបចោលក្រុមហ៊ុនវិនិយោគកសិឧស្សាហកម្មចំនួន៥០នៅក្នុងខេត្តមណ្ឌលគីរី។
ប្រតិកម្មរបស់គណបក្សប្រឆាំងនិងអង្គការសង្គមស៊ីវិលបានធ្វើឡើងបន្ទាប់ពីអាជ្ញាធរខេត្តមណ្ឌលគីរីបានប្រកាសលុបចោលក្រុមហ៊ុនចំនួន៥០ដែលទទួលបានដីសម្បទានពីរដ្ឋប៉ុន្តែមិនបានធ្វើអ្វីទាំងអស់។
លោកយ៉ែមប៉ុញ្ញរិទ្ធិអគ្គលេខាធិការនៃគណបក្សសិទ្ធិមនុស្សនិងជាតំណាងរាស្ត្របានប្រកាសនៅថ្ងៃសៅរ៍ទី៩ខែមករាឆ្នាំ២០១០នេះថាការលុបចោលក្រុមហ៊ុនវិនិយោគទាំងនេះគឺជារឿងត្រឹមត្រូវបំផុតពីព្រោះក្រុមហ៊ុនទាំងនេះទទួលបានសិទ្ធិវិនិយោគពីរដ្ឋហើយប៉ុន្តែពួកគេមិនធ្វើអ្វីទាំងអស់។
លោកតំណាងរាស្រ្តរូបនេះបានបញ្ជាក់បន្ថែមថាកាលុបចោលគឺជារឿងល្អប៉ុន្តែលោកសម្តែងការសោកស្តាយថារដ្ឋអាចយកដីបានមកវិញមែនប៉ុន្តែក្រុមហ៊ុនបានកាប់ព្រៃឈើអស់ហើយ។
លោកយឹមសុវណ្ណតំណាងរាស្រ្តនិងជាអ្នកនាំពាក្យគណបក្សសមរង្ស៊ី បានថ្លែងថាដីសម្បទានសេដ្ឋកិច្ចដែលប្រមូលយកមកវិញនេះត្រូវបែងចែកជូនប្រជាជនក្រីក្រអត់ដីធ្លីធ្វើស្រែចម្ការ។លោកអំសំអាតមន្ត្រីស៊ើបអង្កេតរបស់អង្គការលីកាដូបាននិយាយដូចគ្នាទៅនឹងតំណាងយឹមសុវណ្ណដែរ។
លោកសំអាត អំពាវនាវអោយរាជរដ្ឋាភិបាលផ្ទេរដីសម្បទានសេដ្ឋកិច្ចដែលប្រមូលបានទៅជាដីសម្បទានសង្គមកិច្ចដើម្បីជួយដល់ប្រជាជនក្រីក្រខ្វះខាតដីធ្លីនិងផ្ទះសម្បែង។
លោកឆាយធីមន្រ្តីអង្កេតរបស់អង្គការអាដហុកប្រចាំនៅក្នុងខេត្តមណ្ឌលគីរីបានថ្លែងតាមទូរស័ព្ទមកថាការលុបចោលក្រុមហ៊ុនមិនធ្វើសកម្មភាពគឺជាការល្អបំផុតប៉ុន្តែលោកអំពាវនាវអោយមានស៊ើបអង្កេតចំពោះក្រុមហ៊ុនដែលបានកាប់បំផ្លាញព្រៃឈើអស់ពីលើដីតែមិនបានធ្វើអ្វីទាំងអស់។ លោក ឆាយ ធីបានបន្តទៀតថាក្រុមហ៊ុនមួយចំនួនមិនបានអភិវឌ្ឍន៏អ្វីទេប៉ុន្តែពួកគេកាប់ព្រៃឈើ។
មន្ត្រីអង្គការសិទ្ធិមនុស្សបានពន្យល់ថានាពេលកន្លងមកការផ្តល់ដីសម្បទានសេដ្ឋកិច្ចពីរដ្ឋាភិបាលទៅអោយក្រុមហ៊ុនឯកជនតែងតែបង្កអោយមានភាពចម្រូងចម្រាសរវាងក្រុមហ៊ុននិងប្រជាជននៅតំបន់នោះពីព្រោះការផ្តល់ដីសម្បទានសេដ្ឋកិច្ចមួយចំនួនបានប៉ះពាល់ដល់ដីចម្ការវិលជុំរបស់ជនជាតិភាគតិចនិងជាន់លើដីអារក្សអ្នកតារបស់ជនជាតិភាគតិច៕
No comments:
Post a Comment