អាជ្ញាធរខេត្តមណ្ឌលគិរីប្រកាសលុបឈ្មោះក្រុមហ៊ុនចំនួន៥០
- Thursday, January 14, 2010, 14:54
- ពត៌មានភាសាខ្មែរ, សេដ្ឋកិច្ច & នយោបាយ
- 19 views
- បញ្ចេញមតិផ្ទាល់ខ្លួន
ដោយ ឱ ភារិទ្ធ
2010-01-13
វិទ្យុអាស៊ីសេរី
អាជ្ញាធរខេត្តមណ្ឌលគិរីបានចេញសេចក្តីប្រកាសលុបឈ្មោះក្រុមហ៊ុនចំនួន៥០ ក្នុងចំណោម ៦៣ក្រុមហ៊ុនដែលបានស្នើសុំការអភិវឌ្ឍក្នុងខេត្ត បន្ទាប់ពីមិនមានសកម្មភាពអភិវឌ្ឍន៍តាមកិច្ចសន្យា។
លោកស្រី អាយស៊ី សុគន្ធារី អភិបាលរងខេត្តមណ្ឌលគិរី ទទួលគ្រប់គ្រងលើការអភិវឌ្ឍនេះបានបញ្ជាក់ពីមូលហេតុនៃការលុបឈ្មោះក្រុមហ៊ុននោះថា ក្រុមហ៊ុនទាំងនោះមិនព្រមចូលខ្លួនមកស្រាយបំភ្លឺចំពោះការអសកម្មក្នុងការអភិវឌ្ឍរបស់ខ្លួន នៅពេលដែលអាជ្ញាធរខេត្តអញ្ជើញឲ្យចូលរួមរយៈពេលដល់ ៤០ថ្ងៃ។
លោកស្រី អាយស៊ី សុគន្ធារី បានមានប្រសាសន៍ថា ៖ «គឺឈ្មោះថាក្រុមហ៊ុនហ្នឹង ខេត្តនីមួយៗគឺសប្បាយចិត្តណាស់ គ្មានអ្នកណាចង់ធ្វើអ៊ីចឹងៗទេ។ មិនដឹងជាក្រុមហ៊ុនពិតប្រាកដ ឬមួយគេគ្រាន់មកបង្កក់ដី តែដាក់ដល់ទៅ ៥០ក្រុមហ៊ុន នៅស្ងៀម រហូតមកដល់ថ្ងៃនេះអត់មានប្រតិកម្មផងហ្នឹង។ បើមានប្រតិកម្ម គឺមានប្រតិកម្មទៅលើអ្នកដែលរត់ការច្បាប់ហ្នឹងណា៎! អ្នកគួកជេរដី គួកជេរអីអ៊ីចឹងទេ!»។
លោកស្រី អាយស៊ី សុគន្ធារី បានមានប្រសាសន៍បន្តទៀតថា ការលំបាករបស់អាជ្ញាធរដែរគឺក្រុមហ៊ុនមិនមានទីស្នាក់ការនៅក្នុងខេត្ត ដែលជាការលំបាកក្នុងការទាក់ទង។
លោក កឺត ជ្រែង តំណាងសហគមន៍ឃុំដាក់ដាំ ស្រុកអូររាំង បានផ្តល់សម្ភាសន៍ថា មានក្រុមហ៊ុនបីដែលបោះទីតាំងក្នុងឃុំរបស់លោក គឺមានតែក្រុមហ៊ុនមួយទេដែលអភិវឌ្ឍដាំដើមស្រល់ដោយមិនបំផ្លាញព្រៃឈើ។
លោក កឺត ជ្រែង បានបញ្ជាក់ថា ៖ «ក្រុមហ៊ុនពីរ… អាហ្នឹងកាប់ព្រៃ គាត់កាប់ប្លង់ៗអ៊ីចឹង ហើយកន្លែងខ្លះអត់ទេ ក៏ចោលអ៊ីចឹងទៅ តាំងពី ២០០៥ អត់ទាន់ឃើញដាំអីទេ។ ក្រុមហ៊ុនពីរហ្នឹងគាត់មកសុំដី ២ពាន់ហិកតា បើក្រុមហ៊ុនមួយទៀត ១២០០ជាងហិកតា…»។
ផ្អែកទៅលើការស៊ើបអង្កេតនិងផ្អែកទៅលើការសម្រេចរបស់អាជ្ញាធរខេត្តក្នុងការលុបឈ្មោះក្រុមហ៊ុនមួយចំនួនធំនេះ ត្រូវបានលោក ឆាយ ធី មន្ត្រីស៊ើបអង្កេតនៃសមាគមសិទ្ធិមនុស្ស អាដហុក បានទទួលស្វាគមន៍លើចំណាត់ការនេះ ដោយថា វានឹងអាចផ្តល់យុត្តិធម៌ឲ្យដល់ក្រុមហ៊ុនក្រោយៗទៀត។
លោក ឆាយ ធី បានអះអាងថា ៖ «ជាគំរូល្អមួយសម្រាប់ក្រុមហ៊ុនវិនិយោគដទៃទៀតដែលមានបំណងមកដាក់វិនិយោគដីសម្បទានសេដ្ឋកិច្ចលើកក្រោយ ដើម្បីឲ្យមានការគោរពនិងអនុវត្តតាមកិច្ចព្រមព្រៀងរវាងរដ្ឋាភិបាលនិងក្រុមហ៊ុនដទៃទៀត។ ក្រុមហ៊ុនដែលសព្វថ្ងៃកំពុងតែកាប់ឆ្ការហើយ មិនបានធ្វើការអភិវឌ្ឍអីលេចជាទ្រង់ទ្រាយធំដុំនៅឡើយទេ គ្រាន់តែធ្វើព្រំហ៊ុមព័ទ្ធដីព្រៃ ហើយខ្លះមានការកាប់រានដីព្រៃ ហើយទុកចោលទំនេរ ដូចជានៅស្រុកពេជ្រាដា… និងចំណុចឃុំពូទ្រី»។
ទោះបីជាមានការសម្រេចលុបក្រុមហ៊ុនចំនួន ៥០ ក្នុងចំណោម ៦៣ក្រុមហ៊ុនក៏ដោយ ក៏លោកស្រី អាយស៊ី សុគន្ធារី អភិបាលរងខេត្ត បានបញ្ជាក់ថា នឹងអាចផ្តល់សិទ្ធិឲ្យបន្តសកម្មភាពទៀតបាន ចំពោះក្រុមហ៊ុនណាដែលមានបំណងសុំបន្តដោយឲ្យបំពេញលក្ខណៈច្បាប់និងបែបបទគ្រប់គ្រាន់។ ហេតុនេះហើយក៏មានក្រុមហ៊ុនចាស់ចំនួនបីបានដាក់ពាក្យសុំបន្ត តែលោកស្រីមិនបានបញ្ជាក់ឈ្មោះក្រុមហ៊ុននោះឡើយ៕
No comments:
Post a Comment