អាជ្ញាធរកំណត់បានអត្តសញ្ញាណខ្មែរ២នាក់ដែលថៃបាញ់ស្លាប់
- Thursday, January 14, 2010, 14:44
- ពត៌មានភាសាខ្មែរ, សេដ្ឋកិច្ច & នយោបាយ
- 18 views
- បញ្ចេញមតិផ្ទាល់ខ្លួន
ដោយ ហង្ស សាវយុត
2010-01-13
វិទ្យុអាស៊ីសេរី
មន្ត្រីព្រំដែនខ្មែរនៃខេត្តឧត្តរមានជ័យបានអះអាងថា រហូតមកដល់រសៀលថ្ងៃពុធ ទី១៣ ខែមករានេះ គេបានស្គាល់ឈ្មោះប្រជាពលរដ្ឋខ្មែរ ២នាក់ដែលស្លាប់ និងម្នាក់ទៀតដែលកំពុងបាត់ខ្លួនដោយសារក្រុមមេព្រៃនិងប៉ូលិសថៃនៃស្រុកឃុនហាន ខេត្តស៊ីសាកេត បាញ់រះនោះហើយ។
លោកវរសេនីយ៍ទោ តូច រ៉ា អនុប្រធានទំនាក់ទំនងព្រំដែនខ្មែរ-ថៃប្រចាំច្រកជាំសាង៉ាំនៃស្រុកអន្លង់វែង បានមានប្រសាសន៍កាលពីរសៀលថ្ងៃពុធថា អាជ្ញាធរថៃបានសុខចិត្តអនុញ្ញាតឲ្យមន្ត្រីទំនាក់ទំនងព្រំដែនខ្មែរនិងប្រជាពលរដ្ឋខ្មែរដែលសង្ស័យថាសាច់ញាតិរបស់ខ្លួនស្លាប់នោះ បានចូលទៅកាន់ខេត្តអ៊ូប៊ុនរ៉ាតថានី ប្រទេសថៃ កាលពីព្រឹកមិញដើម្បីឲ្យមានការបញ្ជាក់ច្បាស់លាស់ពីឈ្មោះអ្នកស្លាប់និងអ្នកបាត់ខ្លួននៅឡើយនោះ។
លោក តូច រ៉ា បានបញ្ជាក់ថា នៅពេលនេះអាជ្ញាធរខ្មែរបានស្គាល់ឈ្មោះប្រជាពលរដ្ឋខ្មែរ ២នាក់ដែលស្លាប់នោះគឺឈ្មោះ ចេង សុជាតិ អាយុ ២៧ឆ្នាំ និងឈ្មោះ អឿន អេង អាយុ ១៩ឆ្នាំ។ ចំណែកបុរសម្នាក់ទៀតកំពុងបាត់ខ្លួន គាត់ឈ្មោះ អឿន អុល ដែលជាឪពុករបស់ឈ្មោះ អឿន អេង ដែលបានស្លាប់ក្នុងការបាញ់រះនោះ។
លោក តូច រ៉ា បានឲ្យដឹងថា ៖ «អ្នកស្លាប់ដឹងឈ្មោះពិតហើយបង ឈ្មោះ ចេង ជាតិ ហើយនិង អឿន អេង ហើយឥឡូវហ្នឹងគេខាងណោះគេសម្រេចបូជាសពកូនគេនោះណា៎ បន្តិចទៀតបែបចេញមកវិញហើយ។ ឯសពរបស់ ចេង ជាតិ ហ្នឹង គឺនៅឯហ្នុងឯង ដល់គ្រួសារគេទៅធានាទទួលមកទៀតទើបបាន។ បាត់ អឿន អុល រកអត់ឃើញ។ រកតែខាងយើងទេបងអើយ ខាងគេចូលជ្រៅពេក។ ខ្ញុំបានជម្រាបខាងកងកម្លាំងខាងថៃហើយឲ្យជួយរុករកឲ្យផង»។
ការរកឃើញឈ្មោះប្រជាពលរដ្ឋខ្មែរដែលស្លាប់និងបាត់ខ្លួននេះ គឺនៅក្រោយពេល ៣ថ្ងៃបន្ទាប់ពីក្រុមមេព្រៃនិងប៉ូលិសស្រុកឃុនហានរបស់ថៃ បានប្រើអាវុធបាញ់រះទៅលើក្រុមប្រជាពលរដ្ឋខ្មែរដែលបានឆ្លងដែនចូលទៅក្នុងទឹកដីថៃដើម្បីជញ្ជូនឈើមកឲ្យក្រុមឈ្មួញនៅជាប់ភូមិសាស្ត្រឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ របស់ខ្មែរនោះមក។
មេបញ្ជាការយោធាខ្មែរវរការពារព្រំដែនដែលកំពុងប្រចាំការនៅតាមបន្ទាត់ព្រំដែនខ្មែរ-ថៃលើខ្នងភ្នំដងរែក ចាប់ពីជាំស្រង៉ាំរហូតដល់ភូមិសាស្ត្រស្រុកត្រពាំងប្រាសាទ បានឲ្យដឹងថា ទាហានខ្មែរជាច្រើននាក់បានធ្វើសកម្មភាពជាង ៤០ម៉ោងមកហើយនៅក្នុងព្រៃតាមព្រំដែនដើម្បីតាមរកអ្នកបាត់ខ្លួន។
មេបញ្ជាការកងការពារព្រំដែនខ្មែរលេខ៤០៣ លោកវរសេនីយ៍ឯក ធឿង ធា បានមានប្រសាសន៍ថា រហូតមកដល់រសៀលថ្ងៃពុធ ទាហានរបស់លោកនៅតែបន្តការរុករកអ្នកបាត់ខ្លួន ហើយបានសុំថៃចូលទៅរកក្នុងទឹកដីថៃទៀតផង ក៏ប៉ុន្តែមិនបានរកឃើញនៅឡើយទេ។
លោកវរសេនីយ៍ឯក ធឿង ធា បានបញ្ជាក់ថា ៖ «បទបញ្ជារបស់ឯកឧត្តមមេបញ្ជាការទិសហ្នឹងឲ្យខ្ញុំជួយរុករកប្រជាជនដែលបាត់។ ខ្ញុំកំពុងតែរុករកបន្តស្រាវជ្រាវតំបន់ចំបក់កោង។ តាំងពីម្សិលមិញមកកងទ័ពរបស់ខ្ញុំជួយរុករកចូលដីគេទៀត សុំសហការជាមួយគេទៀត។ គេអត់ជួយយើងទេ ប៉ុន្តែយើងសុំផ្លូវដើរ គេថា យើងរុកទៅណេះៗ គេអនុញ្ញាតឲ្យយើងរុករក ប៉ុន្តែវាអត់ឃើញ»។
អាជ្ញាធរខេត្តឧត្តរមានជ័យបានឲ្យដឹងថា ចាប់តាំងពីអំឡុងខែកញ្ញា ឆ្នាំ២០០៩ រហូតមកដល់ពេលនេះចំនួនប្រជាពលរដ្ឋខ្មែរដែលទាហានថៃបាញ់ស្លាប់បានកើនឡើងដល់ ៨នាក់។ ម្នាក់កំពុងបាត់ខ្លួន ២នាក់បានរងរបួស និងម្នាក់ទៀតត្រូវទាហានថៃនៃស្រុកកាប់ជើង ខេត្តសុរិន្ទ ចាប់ខ្លួនយកទៅកាត់ទោសមិនទាន់ដោះលែងនៅឡើយ៕
No comments:
Post a Comment