ដោយ : ជំនិត
ថ្ងៃទី 11 មករា 2010
CEN by: camnews.org
នាង វ៉ាង ស្រីណូ
ភ្នំពេញ: “ចប់ត្រឹមនេះចុះក៏មិនអីដែរ ព្រោះនាងខ្ញុំមិនទាន់ជ្រុលជ្រួសអ្វីៗជាមួយបុរសនោះផង” ។ នេះជាសម្តីរបស់តារាសម្តែង វ៉ាង ស្រីណូ ដែលបានលាតត្រដាងពីជម្រៅស្នេហារបស់នាងជាមួយនឹងយុវនិស្សិតខ្មែរអាយុជាង២០ឆ្នាំ ទើបបញ្ចប់ការសិក្សានៅសហរដ្ឋអាមេរិក ។
វ៉ាង ស្រីណូ ជាតារាសម្តែងដែលសំបូររឿងអាស្រូវ ។ នាងមានរូបរាងតូចច្រឡឹង ប៉ុន្តែដើមទ្រូងធំព្រហើន ពោរពេញទៅដោយភាពសិចស៊ីសម្បើមណាស់ ។
ចំណងស្នេហារវាងនាង ជាមួយនឹងយុវនិស្សិតខ្មែរដែលទើបនឹងបញ្ចប់ការសិក្សានៅសហរដ្ឋអាមេរិកនោះ នាងបានលាតត្រដាងជាសាធារណៈ នៅមុនពេលដែលនាងចាកចេញទៅសម្តែងនៅសហរដ្ឋអាមេរិកកាលពីពាក់កណ្តាលខែសីហា ឆ្នាំ២០០៩ ។ កាលនោះពេលនាងបានថ្លែងសរសើរពីយុវនិស្សិតថា ជាបុរសដំបូងបំផុតដែលបានទាក់ទាញទឹកចិត្តរបស់នាងឱ្យព្រមទទួលយកការស្នើសុំស្រឡាញ់របស់គេ ។ វ៉ាង ស្រីណូ នៅបានសរសើរត្រង់ៗថា បុរសនោះមិនត្រឹមតែមានចំណេះដឹងខ្ពង់ខ្ពស់ និងជាកូនអ្នកមានទ្រព្យសម្បត្តិស្តុកស្តម្ភប៉ុណ្ណោះទេ ថែមទាំងចេះផ្តល់តម្លៃដល់នារីភេទ ពិសេសសម្រាប់រូបនាងដែលជាអ្នកសិល្បៈ គឺគេបានយកចិត្តទុកដាក់លើរូបនាងខ្លាំងណាស់ ស្ទើរតែនឹកស្មានមិនដល់ពីទង្វើដ៏ល្អរបស់គេ ។ ចាប់ពីនោះមកពួកគេទាំងពីរនាក់បានសាងមិត្តភាពនិងស្នេហា ដែលស្រីណូអះអាងថាជាដំណាក់កាលនៃការស្វែងយល់ចិត្តគ្នាទៅវិញទៅមក ។
ឥឡូវនេះ ការបែកបាក់គ្នាត្រូវបាននាង វ៉ាង ស្រីណូ ប្រាប់ទៅទស្សនាវដ្តីក្នុងស្រុកថា បានធ្វើឡើងបន្ទាប់ពីនាងបានវិលត្រឡប់មកពីសម្តែងនៅសហរដ្ឋអាមេរិកវិញកាលពីថៃ្ងទី១០ ខែធ្នូ ឆ្នាំ២០០៩កន្លងមកនេះ ព្រោះត្បិតនាងគ្មានក្តីសង្ឃឹមក្នុងការធ្វើដំណើរលើផ្លូវស្នេហាដ៏វែងឆា្ងយ និងគ្មានគោលដៅបន្តទៅទៀតបាន ។ ស្រីណូបន្តថា “បុរសនោះគេមិនសូវអើពើ យកចិត្តទុកដាក់លើរូបនាងខ្ញុំដូចពីមុនទៀតទេ ដូចជានៅពេលខ្ញុំចាកចេញទៅសម្តែងនៅសហរដ្ឋអាមេរិក គេមិនបានសួរនាំអ្វីទាំងអស់ ហើយក៏មិនស្វះស្វែង រកប្រភពដើម្បីធ្វើទំនាក់ទំនងជាមួយខ្ញុំដែលនៅទីនោះដែរ” ។នាងបន្តថា គិតៗទៅរហូតមកទល់ពេលនេះ មានរយៈពេលជិតបួនខែហើយ “នាងខ្ញុំពុំដែលមានទំនាក់ទំនងជាមួយគ្នា នាងខ្ញុំគិតថានឹងបញ្ចប់ ហើយមិនអាចបន្តទៅមុខទៀតរួចឡើយ” ។
អ្នកនៅក្នុងពិភពសិល្បៈបានបញ្ជាក់ថា បើតាមសម្តីរបស់នាងស្រីណូបានឱ្យដឹងថា “ចិត្តខ្ញុំក៏រឹង ចិត្តគេក៏រឹង” ដែលនេះ គឺមូលហេតុធ្វើឱ្យអ្នកទាំងពីរងាកមុខចេញពីគ្នា ត្បិតអ្នកទាំងពីរប្រកាន់យកត្រូវទៅតាមឆន្ទៈរៀងៗខ្លួន រហូតធ្វើឱ្យ វ៉ាង ស្រីណូ ពុំអាចទ្រាំបានក៏ទម្លាយរឿងរ៉ាវអាថ៌កំបាំងស្នេហាបែកបាក់នេះប្រាប់ដល់ទស្សនិកជនតែម្តង ។
តារាសិចស៊ី វ័យ ២២ឆ្នាំ វ៉ាង ស្រីណូ បានបញ្ជាក់ថាបច្ចុប្បន្ននេះនាងប្រឹងប្រែងប្រមូលប្រាក់ចំណូលពីវិស័យសិល្បៈឱ្យបានច្រើនជាងនេះ ។ នាងកំពុងរៀបចំគម្រោងដើម្បីចេញទៅសម្តែងនៅប្រទេសបារាំង និងនៅប្រទេសកាណាដារយៈពេលបីខែ នាអំឡុងខែកុម្ភៈ ឆ្នាំ២០១០ខាងមុខជាបន្តទៀត ៕
No comments:
Post a Comment