គ.ជ.ប.អំពាវនាវឲ្យអ្នកបោះឆ្នោតពិនិត្យបញ្ជីឈ្មោះចុងក្រោយ
ដោយ អ៊ុក សាវបូរី
2009-08-27
គណៈកម្មាធិការជាតិរៀបចំការបោះឆ្នោត (គ.ជ.ប.) បានអំពាវនាវឲ្យអ្នកមានសិទ្ធិបោះឆ្នោតចូលរួមពិនិត្យបញ្ជីឈ្មោះបោះឆ្នោតចុងក្រោយ និងអ្នកមានអាយុគ្រប់បោះឆ្នោតត្រូវទៅចុះឈ្មោះក្នុងបញ្ជីឈ្មោះបោះឆ្នោតប្រចាំឆ្នាំ២០០៩។
អ្នកបោះឆ្នោតរកមើលឈ្មោះរបស់ខ្លួននៅក្នុងបញ្ជីបោះឆ្នោត នាថ្ងៃទី២៧ កក្កដា ២០០៨។
អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា មានប្រសាសន៍អំពាវនាវនៅថ្ងៃព្រហស្បតិ៍ ទី២៧ ខែសីហា សុំឲ្យប្រជាពលរដ្ឋទាំងអស់ទៅពិនិត្យបញ្ជីឈ្មោះចុងក្រោយដែលនឹងបិទនៅតាមការិយាល័យបោះឆ្នោតឃុំសង្កាត់ចាប់ពីចុងខែកញ្ញាខាងមុខនេះ។ រីឯអ្នកទើបគ្រប់អាយុបោះឆ្នោតសូមចូលរួមចុះឈ្មោះប្រចាំឆ្នាំក្នុងបញ្ជីឈ្មោះបោះឆ្នោតរបស់គ.ជ.ប.ចាប់ពីថ្ងៃ១ ខែតុលា ដល់ថ្ងៃ២០ ខែតុលា ឆ្នាំ២០០៩។
លោក ទេព នីថា បានមានប្រសាសន៍ថា ៖ «ជម្រាបជូនដំណឹងដល់បងប្អូនប្រជាពលរដ្ឋទាំងអស់ ថា ចាប់ពីថ្ងៃទី២៩-៣០ ខែ៩នេះ ទៅគ.ជ.ប.នឹងបិទបញ្ជីឈ្មោះចុងក្រោយ គឺបញ្ជីឈ្មោះឆ្នាំ២០០៨ នៅសាលាឃុំសង្កាត់។ អ៊ីចឹងទេសូមបងប្អូនមេត្តាអញ្ជើញទៅពិនិត្យមើលឈ្មោះនៅក្នុងបញ្ជីនេះ»។
លោក ទេព នីថា ឲ្យដឹងទៀតថា នៅក្នុងឆ្នាំ២០០៩នេះជាឆ្នាំសំខាន់ដែលគ.ជ.ប.ធ្វើការសម្អាតឈ្មោះពីបញ្ជីបោះឆ្នោត គឺលុបឈ្មោះអ្នកស្លាប់ចេញ និងកែតម្រូវឈ្មោះអ្នកបោះឆ្នោតឲ្យបានត្រឹមត្រូវតាមអត្តសញ្ញាណប័ណ្ណជាតិខ្មែរ និងចុះឈ្មោះអ្នកដែលពុំទាន់បានចុះឈ្មោះ។
លោកបានបន្តថា ដើម្បីឲ្យដំណើរការនោះបានប្រសើរគ.ជ.ប.ត្រូវការជ្រើសរើសមន្រ្តីបុគ្គិលកជាប់កិច្ចសន្យារយៈពេលខ្លីដើម្បីបម្រើការងារនៅតាមលេខាធិការដ្ឋាន រាជធានី ខេត្ត រៀបចំការបោះឆ្នោតសម្រាប់ការពិនិត្យបញ្ជីឈ្មោះនិងចុះឈ្មោះបោះឆ្នោតប្រចាំឆ្នាំ២០០៩។
លោក ទេព នីថា បានបញ្ជាក់ថា ៖ «សម្រាប់ការត្រៀមឆ្នាំនេះ យើងចាប់ផ្ដើមពីខែនេះទៅ ដោយជ្រើសរើសមន្រ្តីបុគ្គលិកសម្រាប់ដំណើរការនៅថ្នាក់ជាតិ ហើយនៅបំណាច់ខែនេះយើងនឹងចុះជ្រើសរើសមន្រ្តីបំពេញការងារនៅថ្នាក់ខេត្តមួយចំនួន ហើយបន្ទាប់មកទៀតយើងធ្វើការបណ្ដុះបណ្ដាលមន្រ្តី ទាំងនៅថ្នាក់ជាតិ ទាំងនៅថ្នាក់ខេត្ត ព្រមទាំងក្រុមប្រឹក្សាឃុំសង្កាត់និងស្មៀនឃុំសង្កាត់ដែលជាអ្នកអនុវត្តសម្រាប់បម្រើការបញ្ជីឈ្មោះនិងចុះឈ្មោះប្រចាំឆ្នាំ»។
របាយការណ៍ឆ្នាំ២០០៨ ពីអង្គការឃ្លាំមើលការបោះឆ្នោតនិងគណបក្សនយោបាយដែលចូលរួមបោះឆ្នោតនៅកម្ពុជាខ្លះបានឲ្យដឹងថា មានអ្នកមានអាយុគ្រប់បោះឆ្នោតច្រើនពាន់នាក់បានបាត់ឈ្មោះពីបញ្ជីបោះឆ្នោតចុងក្រោយ និងមិនបានបោះឆ្នោតជាង២លាននាក់ដើម្បីជ្រើសរើសតំណាងរាស្រ្តដែលពួកគេបានគាំទ្រនៅឆ្នាំ២០០៨នោះដែលមានគណបក្សនយោបាយចំនួន១១ចូលរួមបោះឆ្នោតប្រកួតប្រជែងកន្លងមក។
តាមតួលេខរបស់គ.ជ.ប.ឆ្នាំ២០០៨ ឲ្យដឹងថា អ្នកមានសិទ្ធិបោះឆ្នោតជាង៨លាននាក់មានឈ្មោះនៅក្នុងបញ្ជីចុងក្រោយ ប៉ុន្តែអ្នកបានបោះឆ្នោតជាក់ស្តែងមានតែ៦.០១០.២៧៧នាក់ប៉ុណ្ណោះ៕
No comments:
Post a Comment