ករណីរំលោភផ្លូវភេទលើកុមារីនៅខេត្តសៀមរាបកើនឡើង
ដោយ សាវយុត
2009-08-12
មន្រ្តីអង្គការក្រៅរដ្ឋាភិបាល បានឲ្យដឹងថា ស្ថិតិនៃការចាប់រំលោភផ្លូវភេទលើកុមារីក្រោមអាយុ១៨ឆ្នាំនៅខេត្តសៀមរាប ក្នុងរយៈពេល៦ខែឆ្នាំ២០០៩នេះ មានការកើនឡើងខ្ពស់ បើប្រៀបធៀបគ្នាទៅនឹងតួលេខនៅខេត្តបន្ទាយមានជ័យនិងក្រុងភ្នំពេញក្នុងរយៈពេលដូចគ្នា។
ក្រុមអង្គការក្រៅរដ្ឋាភិបាល បានមើលឃើញថា អំពើចាប់រំលោភផ្លូវភេទមកលើកុមារនៅខេត្តសៀមរាប មិនបានថយចុះទេ បើប្រៀបធៀបទៅនឹងឆ្នាំមុនក្នុងរយៈពេល៦ខែដូចគ្នា ដោយសង្គមស៊ីវិលកំពុងបង្ហាញការព្រួយបារម្ភអំពីសុវត្ថិភាពនិងការបាត់បង់ធនធានស្ត្រីនៅក្នុងសង្គម ដោយសារឪពុកម្តាយមួយចំនួន មានការខ្លាចរអែងមិនបញ្ជូនកូនទៅសាលារឿននិងនៅពេលដែលសាលារៀននៅឆ្ងាយពីផ្ទះជាដើម។
អ្នកសម្របសម្រួលរបស់អង្គការកម្ពុជាដើម្បីជួយស្រ្តីមានវិបត្តិ (CWCC) ប្រចាំខេត្តសៀមរាប អ្នកស្រី កេត នឿន បានមានប្រសាសន៍ថា ករណីរំលោភផ្លូវភេទទៅលើកុមារីមិនទាន់គ្រប់អាយុផ្លូវច្បាប់ គឺមានច្រើនជាងការរំលោភទៅលើស្ត្រីគ្រប់អាយុ គិតក្នុងរយៈពេល៦ខែនៃឆ្នាំ២០០៩។
អ្នកស្រី កេត នឿន បានមានប្រសាសន៍ទៀតថា ការរំលោភផ្លូវភេទលើកុមារីមិនទាន់គ្រប់អាយុនៅខេត្តសៀមរាប មានការកើនឡើងមិនថយចុះទេ ដែលតាមការស្រាវជ្រាវរបស់អង្គការក្រៅរដ្ឋាភិបាល រកឃើញថា ជនប្រព្រឹត្តអំពើរំលោភផ្លូវភេទមកលើកុមារ ភាគច្រើនគឺជាសាច់ញាតិនិងអ្នកជិតខាងដែលស្និទ្ធស្នាល ហើយមូលហេតុបណ្តាលពីអ្នកប្រព្រឹត្តខ្លះបានមើលវីដេអូអាសអាភាស និងខ្លះទៀត បានសេពគ្រឿងស្រវឹង។
អ្នកស្រី កេត នឿន ថ្លែងដូច្នេះថា ៖ «ដែលពាក់ព័ន្ធករណីរំលោភ មានពីសាច់ញាតិ ពីឪពុកខ្លួនឯង ប៉ុន្តែគ្រាន់តែថាឪពុកទី២ អ្នកដទៃ។ បើរំលោភទៅលើកុមារក្រោមអាយុ ១៨ឆ្នាំវិញ យើងឃើញថា មនុស្សហ្នឹងធ្លាប់បានទំនាក់ទំនងជិតដិត ហើយក្រុមគ្រួសារហ្នឹងទុកចិត្ត។ វាពាក់ព័ន្ធ ដូចថាការមើលវីដេអូ ហើយអ្នកខ្លះទៀតក៏គាត់ប្រើគ្រឿងស្រវឹង»។
របាយការណ៍របស់អង្គការកម្ពុជាដើម្បីជួយស្រ្តីមានវិបត្តិប្រចាំខេត្តសៀមរាប ឲ្យដឹងថា ក្នុងរយៈពេល៦ខែ ឆ្នាំ២០០៩នេះ ការរំលោភផ្លូវភេទលើកុមារមានចំនួន ១៤៩ករណី ដែលមានកុមាររងគ្រោះជាង ២៦០នាក់។ តួលេខនេះគឺខ្ពស់ជាងចំនួនកុមាររងគ្រោះដោយការរំលោភផ្លូវភេទនៅទីក្រុងភ្នំពេញ ដែលមានតែ ៧១ករណី និងនៅខេត្តបន្ទាយមានជ័យ មានតែ ៥៣ករណីប៉ុណ្ណោះ ក្នុងរយៈពេលពេញមួយឆ្នាំ២០០៨ កន្លងមក។
ប្រជាពលរដ្ឋនៅតាមជនបទខ្លះ ត្រូវទទួលរងគ្រោះដោយសារគេចាប់រំលោភកូនស្រី នៅពេលដែលទុកកូននៅផ្ទះ ហើយឪពុកម្តាយរវល់ធ្វើការងារចិញ្ចឹមជីវិតជាដើម។
ស្ត្រីម្នាក់ដែលសុំមិនបញ្ចេញឈ្មោះ រស់នៅភូមិប្រិយ ឃុំខ្នារសណ្តាយ ស្រុកបន្ទាយស្រី ខេត្តសៀមរាប បាននាំកូនមកសុំការជួយជ្រោមជ្រែងផ្លូវច្បាប់ពីអង្គការសិទ្ធិមនុស្ស លីកាដូ កាលពីពេលថ្មីៗ បានមានប្រសាសន៍ថា កូនស្រីរបស់គាត់ម្នាក់អាយុ ៦ឆ្នាំ ត្រូវបានបុរសម្នាក់ អាយុជាង ២០ឆ្នាំ ជាអ្នកជិតខាងចាប់រំលោភបានសម្រេចចំនួន២ដង នៅពេលដែលកូនគាត់ទៅលេងផ្ទះជនជាប់ចោទនោះ ៖ «ខ្ញុំសង្ស័យជាមួយកូនខ្ញុំ កូនខ្ញុំវារាងស្លេកស្លាំងខ្លាំង។ សួរទៅថា ចាប់ប៉ុន្មានដង ចាប់ ២ដង នៅកន្លែងណាៗ វាប្រាប់អស់ទៅ។ ឪវាទៅដាក់ពាក្យប្ដឹងនៅកន្លែងប៉ុស្តិ៍ឯណេះ»។
បុគ្គលិកអង្គការសិទ្ធិមនុស្ស លីកាដូ ខេត្តសៀមរាប បានឲ្យដឹងថា ចាប់តាំងពីខែមករា រហូតដល់ខែសីហា ឆ្នាំ២០០៩ គេបានទទួលពាក្យបណ្តឹងពីគ្រួសារកុមាររងគ្រោះដោយការចាប់រំលោភចំនួន ៦ករណី ប៉ុន្តែគេជឿថា ចំនួនករណីរំលោភផ្លូវភេទលើកុមារអាចនឹងមានច្រើនជាងករណីដែលគេបានទទួល ពីព្រោះគ្រួសារក្រីក្រខ្លះមិនបានមកដាក់ពាក្យប្ដឹង និងខ្លះ ត្រូវគេសម្របសម្រួលនៅតាមមូលដ្ឋានដោយចេញសំណងជំងឺចិត្តជាលុយខ្លះៗ។
អនុប្រធានផ្នែកស៊ើបអង្កេតការងារស្រ្តីរបស់សមាគមការពារសិទ្ធិមនុស្ស អាដហុក អ្នកស្រី លឹម មុនី បានមានប្រសាសន៍ទទួលស្គាល់ថា តួលេខនៃករណីរំលោភផ្លូវភេទលើកុមារនៅខេត្តសៀមរាប គឺពិតជាមានការកើនឡើងមែន។
អ្នកស្រី លឹម មុនី បានមានប្រសាសន៍ទៀតថា តាមការសង្កេត អ្នកស្រីយល់ថា ហេតុផលនៃការកើនឡើងនូវអំពើរំលោភផ្លូវភេទលើកុមារី គឺដោយសារស្ថាប័នដែលជាអ្នកអនុវត្តច្បាប់និងអាជ្ញាធរមូលដ្ឋានខ្លះ ធ្វើមិនបានត្រឹមត្រូវតាមតួនាទី ដូចជាករណីព្រហ្មទណ្ឌ មកសម្របសម្រួលដោះស្រាយតាមរឿងស៊ីវិលជាដើម។
អ្នកស្រី លឹម មុនី មានប្រសាសន៍ដូច្នេះថា ៖ «របាយការណ៍នៅសៀមរាបកើនអ៊ីចឹងពិតមែន ហេតុផលដោយសារតែការអនុវត្តច្បាប់ហ្នឹងមិនបានត្រឹមត្រូវតាមតួនាទី ដោយសារតែតុលាការ ឬអ្នកសម្របសម្រួលមានភូមិឃុំ ក៏ដូចជាប៉ូលិសអ៊ីចឹង ចេះតែសម្រួលកិច្ចការព្រហ្មទណ្ឌទៅជារឿងស៊ីវិល ធ្វើការផ្សះផ្សាសម្របសម្រួលឲ្យភាគីដើមបណ្ដឹងហ្នឹង និងចុងចោទហ្នឹង ស៊ីសងគ្នាជាសំណងរដ្ឋប្បវេណីហ្នឹង គឺជាមូលហេតុធំណាស់ដែលជនល្មើសចេះតែប្រព្រឹត្តដដែលៗ»។
អ្នកស្រី លឹម មុនី បានសម្ដែងការព្រួយបារម្ភថា កុមារដែលទទួលរងការរំលោភផ្លូវភេទ គឺមានស្មារតីទន់ខ្សោយនិងបញ្ហាមួយទៀត គឺប៉ះពាល់ដល់សុវត្ថិភាព ដែលឪពុកម្តាយខ្លះរស់នៅភូមិឆ្ងាយពីសាលារៀន មិនហ៊ានបញ្ជូនកូនស្រីទៅរៀន ដែលវាអាចនឹងបាត់ធនធានស្រ្តីនៅក្នុងការងារនិងសង្គមសម្រាប់អនាគត។
ចំណែកប្រធានផ្នែកនគរបាលការពារអនីតិជនរបស់ស្នងការនគរបាលខេត្តសៀមរាប លោក ជា ហេង បានអល់អែកក្នុងការទទួលស្គាល់តួលេខរបស់អង្គការក្រៅរដ្ឋាភិបាល ដែលអះអាងពីការកើនឡើងនូវអំពើចាប់រំលោភលើកុមារនោះ។
លោក ជា ហេង បានមានប្រសាសន៍ថា ចំពោះតួលេខដែលខាងលោកបានធ្វើផ្ទាល់លើករណីនោះ ឃើញថា មិនមានចំនួនកើនឡើងខ្ពស់ដូចតួលេខរបស់អង្គការទេ ៖ «ខាងអង្គការគាត់ច្រើនតែយកខាង ១៧(អាយុ)អីហ្នឹង វាស្រលាញ់គ្នា ទៅដេក ដល់ចុងក្រោយមក មនុស្សប្រុសដោះដៃ ខាងស្រ្តីមិនសុខចិត្ត គេមកប្ដឹងគាត់ ក៏គាត់ថា រំលោភលើកុមារដែរ ដល់អ៊ីចឹង ទិន្នន័យវាកើនឡើងខ្ពស់។ ចំណែកខាងខ្ញុំដែលអ្នកស៊ើបផ្ទាល់នេះ វាដូចជាមិនខ្ពស់ទេ ព្រោះខាងខ្ញុំខំទប់ស្កាត់គ្រប់រូបភាពដែរ»។
មន្ត្រីប៉ូលិសដដែលបានបញ្ជាក់ថា ទោះយ៉ាងណា ក្រុមប៉ូលិសរបស់លោកបាននិងកំពុងប្រឹងប្រែងការពារនិងទប់ស្កាត់ការរំលោភផ្លូវភេទលើកុមារយ៉ាងខ្លាំង តាមការផ្សព្វផ្សាយច្បាប់និងមានការដើរបិទបដានៅតាមតំបន់នានា រួមនិងប្រាប់លេខទូរស័ព្ទរបស់សមត្ថកិច្ចនៅតាមមូលដ្ឋាន ឲ្យរាយការណ៍ផង ប្រសិនបើមានជួបករណីចាប់រំលោភលើកុមារនោះ។
របាយការណ៍របស់សមាគមការពារសិទ្ធិមនុស្ស អាដហុក ក្នុងឆ្នាំ២០០៨ កន្លងមក បានឲ្យដឹងថា ការចាប់រំលោភលើស្រ្តីនិងកុមារ ពីបណ្តាខេត្តក្រុងទូទាំងប្រទេសមានចំនួន ៤១៩ករណី ដែលគេជឿថា ចំនួននៃករណីរំលោភអាចមានច្រើនជាងតួលេខនេះ ប៉ុន្តែករណីខ្លះបានកើតឡើងនៅទីជនបទដាច់ស្រយាល ដែលអង្គការមិនបានទទួលព័ត៌មាន។
របាយការណ៍របស់សមាគមការពារសិទ្ធិមនុស្ស អាដហុក បានឲ្យដឹងទៀតថា ក្នុងចំណោមករណីរំលោភផ្លូវភេទលើស្ត្រីនិងកុមារ ចំនួនជាង ៤០០ករណី កាលពីឆ្នាំ២០០៨នោះ គឺស្រ្តីនិងកុមារចំនួន៣៤ករណី ត្រូវគេសម្លាប់យ៉ាងឃោរឃៅក្រោយពីរំលោភរួចរាល់ហើយ៕
No comments:
Post a Comment