មឿង សុន អំពាវនាវសុំការលើកលែងទោសពីព្រះមហាក្សត្រ
ដោយ កែវ និមល
2009-08-18
លោក មឿង សុន ប្រធានមូលនិធិទ្រទ្រង់អរិយធម៌ខ្មែរ ដែលត្រូវតុលាការក្រុងភ្នំពេញកាត់ទោសឲ្យជាប់ពន្ធនាគារចំនួន២ឆ្នាំនិងបង់ប្រាក់ពិន័យចំនួន១៥លានរៀល បានអំពាវនាវនៅថ្ងៃអង្គារ ទី១៨ សីហា សុំឲ្យព្រះមហាក្សត្រកម្ពុជាជួយឲ្យលោកបានរួចចាកទោសដើម្បីបានវិលចូលមកប្រទេសកម្ពុជាវិញ។
លោក មឿង សុន ប្រធានអង្គការមូលនិធិទ្រទ្រង់អរិយធម៌ខ្មែរ។
លោក មឿង សុន ដែលបច្ចុប្បន្នរស់នៅប្រទេសបារាំង បានមានប្រសាសន៍តាមទូរស័ព្ទឲ្យដឹងថា លោកត្រូវចៅក្រមតុលាការក្រុងភ្នំពេញកាត់ទោសឲ្យជាប់គុកនិងបង់ប្រាក់ ពីព្រោះលោកត្រូវរដ្ឋាភិបាលកម្ពុជាចាត់ឲ្យមេធាវីប្តឹងចោទពីបទផ្សាយព័ត៌មានមិនពិតនិងញុះញង់ ដោយសារលោកបានលើករឿងអំពីការដាក់ភ្លើងតាំងនៅប្រាសាទអង្គរវត្ត កាលពីចុងខែឧសភាកន្លងទៅ។
លោក មឿង សុន បានឲ្យដឹងថា ៖ «លិខិតដែលខ្ញុំសរសេរទៅព្រះករុណា ទៅសម្ដេចនាយក សរសេរទៅឯកឧត្ដម សុខ អាន លិខិតទាំងអស់ហ្នឹងសុទ្ធតែក្នុងគោលបំណងសុំអន្តរាគមន៍និងសូមជួយធ្វើការអភ័យទោសដែលយល់ថា អ្វីដែលខ្ញុំបានសរសេរនិងធ្វើអធិប្បាយជុំវិញផលប៉ះពាល់ប្រាសាទអង្គរវត្តដោយសារអំពូលភ្លើង ការដាក់ភ្លើងមិនត្រឹមត្រូវតាមបទដ្ឋានបច្ចេកទេស និងសុំឲ្យរួចទោសពីការចោទប្រកាន់»។
លិខិតរបស់លោក មឿង សុន ដែលបានសុំឲ្យព្រះមហាក្សត្រកម្ពុជា ព្រះបាទ នរោត្តម សីហមុនី ជួយចំពោះរូបខ្លួននោះ មានសេចក្តីជាអាទិ៍ថា សូមព្រះមហាក្សត្រមានព្រះរាជតម្រិះ ប្រោសប្រណី ព្រះរាជទានទោសដល់កូនចៅនិងអន្តរាគមន៍ដល់លោកនាយករដ្ឋមន្រ្តី ហ៊ុន សែន ដើម្បីឲ្យរូបទូលបង្គំ មឿង សុន បានរួចចាកទោសនិងបានវិលត្រឡប់មកបម្រើប្រទេសតាមប្រក្រតីវិញ។
សេចក្តីលិខិតនោះបានសរសេរឲ្យដឹងទៀតថា ការសរសេរលិខិតរបស់លោកកន្លងមកជូនលោកនាយករដ្ឋមន្រ្តី ហ៊ុន សែន ទាក់ទងជាមួយការដាក់ភ្លើងនៅប្រាសាទអង្គរវត្តនោះ គឺគ្រាន់តែបានសុំឲ្យមានការយកចិត្តទុកដាក់ចំពោះការដាក់ភ្លើងតាំងនិងគ្មានចេតនាប្រឆាំងរាជរដ្ឋាភិបាលទេ ហើយនោះគ្រាន់តែជាយោបល់តាមន័យបច្ចេកទេសមួយតែប៉ុណ្ណោះ។
លោក ប៉ាល់ ច័ន្ទតារា មេធាវីរដ្ឋាភិបាលដែលធ្លាប់បានមានប្រសាសន៍ប្រាប់អ្នកកាសែតក្នុងស្រុកជាច្រើននាក់ថា ការដាក់ពាក្យប្តឹង លោក មឿង សុន កាលពីថ្ងៃទី២ មិថុនាកន្លងទៅ ក្រោយពេលលោក មឿង សុន បានធ្វើសន្និសីទកាសែតមួយនៅខែត្រសៀមរាបទាក់ទងជាមួយការដាក់តាំងអំពូលតាមថែវនៅប្រាសាទអង្គរវត្ត លោក មឿង សុន បានធ្វើឲ្យប៉ះពាល់ដល់មុខមាត់រាជរដ្ឋាភិបាលកម្ពុជា និងធ្វើឲ្យភ្ញៀវទេសចរណ៍លែងហ៊ានមកទស្សនាប្រាសាទអង្គរវត្តខ្មែរទៀត។
លោក សំ សុកគង់ មេធាវីរបស់លោក មឿង សុន នៅកម្ពុជា បានមានប្រសាសន៍នៅថ្ងៃទី១៨ សីហា ថា ក្រោយពីលោកបានដាក់ពាក្យប្តឹងទាស់ចំពោះសាលក្រមសាលាដំបូងរាជធានីភ្នំពេញមក លោកបានទទួលដំណឹងកាលពីពេលថ្មីៗនេះថា តុលាការរាជធានីភ្នំពេញមានគម្រោងលើកយករឿងក្តីរបស់លោក មឿង សុន មកកាត់សាឡើងវិញ។
លោក សំ សុកគង់ បានបញ្ជាក់ថា ៖ «រឿងនេះឥឡូវកំពុងនៅតុលាការ ហើយតុលាការប្រហែលជាកំពុងតែរៀបចំ... ឧបមាករណីយើងប្ដឹងទាស់ គេត្រូវកាត់រឿងហ្នឹងឡើងវិញនៅតុលាការដដែលហ្នឹង»៕
No comments:
Post a Comment