មន្ត្រីខ្មែរប្រតិកម្មនឹងការបង្កើតមូលដ្ឋានទ័ពជើងទឹករបស់ថៃ
ដោយ ហ៊ុយ វណ្ណៈ
2009-08-17
មន្ត្រីជាន់ខ្ពស់ខ្មែរមួយរូបបានថ្លែងនៅថ្ងៃច័ន្ទ ទី១៨ សីហា ដោយចាត់ទុកថា ទង្វើរបស់ថៃក្នុងការបង្កើតមូលដ្ឋានកងទ័ពជើងទឹកនៅឯកោះគត់ នៃខេត្តត្រាតរបស់ថៃនោះ គឺជាការរំលោភលើអនុស្សរណៈយោគយល់គ្នារវាងកម្ពុជានិងថៃ ឆ្នាំ២០០០ ហើយថាក៏ជាការគំរាមកំហែងសន្តិសុខកម្ពុជាផងដែរ។
រដ្ឋលេខាធិការទីស្តីការគណៈរដ្ឋមន្ត្រី គឺលោក ផៃ ស៊ីផាន បានថ្លែងយ៉ាងដូច្នេះគឺនៅបន្ទាប់ពីមានសេចក្តីរាយការណ៍ថា នាវាចម្បាំងនៃកងទាហានជើងទឹកថៃត្រូវបានបញ្ជាឲ្យចេញល្បាតនៅក្នុងតំបន់ដែនសមុទ្រត្រួតស៊ីគ្នាដើម្បីប្រឆាំងសកម្មភាពនានារបស់កម្ពុជា។
លោក ផៃ ស៊ីផាន បានមានប្រសាសន៍ថា ៖ «ដូច្នេះការបង្ហាញនូវការគំរាមកំហែងខាងផ្នែកកងទ័ពហ្នឹង មកប៉ះពាល់ដល់ទៅសន្តិសុខនៃព្រះរាជាណាចក្រកម្ពុជា។ ហើយបញ្ហាទី២ ការប្រើប្រាស់ទ័ពក្នុងបំណងនិយាយដោះស្រាយព្រំដែន ឬកិច្ចការពារផ្ទៃទឹកក្នុងឈូងសមុទ្រកម្ពុជាថៃនោះ គឺមិនមែនសមស្របពីអ្វីដែលយើងបានចុះហត្ថលេខាយោគយល់គ្នាពីឆ្នាំ២០០០ ឬភាសាអង់គ្លេសថា MOU នោះ»។
មន្ត្រីស្ថានទូតថៃប្រចាំនៅកម្ពុជាមិនអាចទាក់ទងបានដើម្បីបញ្ជាក់ឲ្យដឹងថា មានកប៉ាល់ចម្បាំងថៃប៉ុន្មានគ្រឿង និងកងទាហានជើងទឹកថៃប៉ុន្មាននាក់ដែលកំពុងប្រតិបត្តិការនៅឯកោះគត់នៃឈូងសមុទ្រថៃ ដែលស្ថិតនៅជិតដែនសមុទ្រកម្ពុជានោះទេ។
ទាហានថៃម្នាក់ដែលត្រូវកាសែតបាងកកប៉ុស្តិ៍របស់ថៃដកស្រង់សម្តីដោយមិនបញ្ចេញឈ្មោះបានថ្លែងថា ការបញ្ជូននាវាចម្បាំងនិងការចេញល្បាតរបស់កងនាវិកថៃគឺធ្វើឡើងបន្ទាប់ពីកម្ពុជាអនុញ្ញាតឲ្យក្រុមហ៊ុនប្រេងតូតាល់របស់ប្រទេសបារាំងរុករកប្រេងនៅតំបន់ដែលថៃចាត់ទុកថាជាតំបន់ព្រំដែនសមុទ្រត្រួតស៊ីគ្នា។
មន្ត្រីថៃដដែលក៏ចាត់ទុកទៀតថា កិច្ចព្រមព្រៀងរបស់កម្ពុជាឲ្យក្រុមហ៊ុនបារាំងរាវរកប្រេងនៅទីនោះគឺជាហេតុផលនយោបាយ ដោយសំអាងថា កម្ពុជាចង់ឲ្យបារាំងជួយដោះស្រាយជម្លោះព្រំដែនទឹកជាមួយថៃ។
មន្ត្រីថៃដដែលក៏រំឭកដែរថា កាលពីអតីតកាលប្រទេសបារាំងក៏ធ្លាប់ជួយកម្ពុជាឲ្យឈ្នះថៃក្នុងរឿងក្តីប្រាសាទព្រះវិហារនៅតុលាការអន្តរជាតិក្រុងឡាអេ នាឆ្នាំ១៩៦២នោះដែរ។
ក៏ប៉ុន្តែ លោក ផៃ ស៊ីផាន ថ្លែងថា កិច្ចព្រមព្រៀងរបស់កម្ពុជាជាមួយក្រុមហ៊ុនប្រេងនៃប្រទេសបារាំងគឺដើម្បីប្រយោជន៍សេដ្ឋកិច្ចនៃប្រទេសទាំងពីរកម្ពុជាថៃ។
លោក ផៃ ស៊ីផាន បានបញ្ជាក់ថា ៖ «ហើយកម្ពុជា គឺគោរពណាស់នូវអ្វីដែលជាការមិត្តជិតខាងគ្នា ភូមិផងរបងជាមួយគ្នា ហើយគោរពណាស់នូវអ្វីដែលជាច្បាប់អន្តរជាតិ»។
លោក ផៃ ស៊ីផាន ថ្លែងគូសបញ្ជាក់ទៀតថា កម្ពុជានឹងធ្វើកំណត់ទូតជូនទៅភាគីថៃចំពោះសកម្មភាពដែលថៃពង្រាយកងទ័ពនិងនាវាចម្បាំងនៅតំបន់ដែនសមុទ្រត្រួតស៊ីគ្នានោះ។
មកដល់ពេលនេះ គេមិនទាន់ដឹងនៅឡើយថា ការពង្រាយកងនាវារបស់ថៃនៅតំបន់ដែនសមុទ្រអាចរារាំងដល់ការវិនិយោគប្រេងរវាងបារាំងនិងកម្ពុជាយ៉ាងណានោះនៅឡើយទេ៕
No comments:
Post a Comment