កម្ពុជា កំពុងពង្រីកបណ្តាញអគ្គិសនី នៅទូទាំងប្រទេស
- Tuesday, January 12, 2010, 2:15
- ពត៌មានភាសាខ្មែរ, សេដ្ឋកិច្ច & នយោបាយ
- 2 views
- បញ្ចេញមតិផ្ទាល់ខ្លួន
ដោយ លី ម៉េងហួរ
អត្ថបទ RFI
ថ្ងៃទី 11/01/2010
គណៈរដ្ឋមន្ត្រីរបស់រាជរដ្ឋាភិបាលកម្ពុជា ទើបតែបានអនុម័តនូវគម្រោងវិនិយោគ ដែលមានទឹកប្រាក់សរុប ១០៧,៦ លានដុល្លារអាមេរិក ដើម្បីសាងសង់អនុស្ថានីយ៍ និង ខ្សែបណ្តាញបញ្ជូនអគ្គិសនី ពីភ្នំពេញ ទៅកាន់ខេត្តកំពង់ចាម ប្រវែង ១១០ គីឡូម៉ែត្រ។
គម្រោងវិនិយោគថ្មីនេះ ស្ថិតក្នុងគម្រោងនៃការអភិវឌ្ឍន៍អនុស្ថានីយ៍ និង ខ្សែបណ្តាញមេតង់ស្យុល ឆ្ពោះទៅកាន់តំបន់ភូមិភាគឦសាន ក្នុងជំហានទី៣ នៃផែនការអភិវឌ្ឍន៍មូលដ្ឋានគ្រឹះនៃប្រព័ន្ធផ្គត់ផ្គង់អគ្គិសនីរបស់កម្ពុជា។ កម្ពុជា ដែលបានកំណត់ក្នុងយុទ្ធសាស្ត្រអភិវឌ្ឍន៍ប្រទេសថា នៅឆ្នាំ២០២០ខាងមុខ អគ្គិសនីត្រូវតែមានដល់ទីជនបទ ទូទាំងប្រទេស។
អនុស្ថានីយ៍ និង ខ្សែ បណ្តាញ បញ្ជូន អគ្គិសនី ពី ភ្នំពេញ ទៅ កាន់ ខេត្ត កំពង់ចាម (រូបថត ៖ សុវណ្ណារ៉ា)
គម្រោងវិនិយោគសាងសង់ខ្សែបណ្តាញបញ្ជូនអគ្គិសនី ពីភ្នំពេញ ទៅខេត្តកំពង់ចាម ប្រវែង ១១០ គីឡូម៉ែត្រ ត្រូវបានគណៈរដ្ឋមន្ត្រីរបស់រដ្ឋាភិបាលកម្ពុជា បានអនុម័ត យល់ព្រមកាលពីថ្ងៃសុក្រ ចុងសប្តាហ៍មុន។ គម្រោងវិនិយោគនេះ ធ្វើឡើងដោយក្រុមហ៊ុនមកពីប្រទេសម៉ាឡេស៊ី ដែលនឹងត្រូវសាងសង់ខ្សែបណ្តាញបញ្ជូនថាមពលអគ្គិសនីកម្លាំង ២៣០ គីឡូវ៉ុល ព្រមទាំងសាងសង់អនុស្ថានីយ៍២។ ១-នៅភ្នំពេញ និងអនុស្ថានីយ៍មួយទៀត នៅខេត្តកំពង់ចាម។ ខ្សែបណ្តាញបញ្ជូនអគ្គិសនីនេះ សម្រាប់បែងចែកថាមពល ពីគម្រោងវារីអគ្គិសនី ដែលកំពុងតែសាងសង់ នៅខេត្តពោធិសាត់ និង ខេត្តកោះកុង។ វារីអគ្គិសនីនេះ នឹងត្រូវតភ្ជាប់ចូលមកកាន់ទីក្រុងភ្នំពេញ ហើយត្រូវបញ្ជូនបន្ត តាមខ្សែបណ្តាញ ដែលរដ្ឋាភិបាលទើបអនុម័តនេះ ទៅកាន់ខេត្តកំពង់ចាម និង ខេត្តភាគឦសាន ជាប់ព្រំដែនវៀតណាម និង ខេត្តព្រំដែនប្រទេសឡាវ ដូចជា ខេត្តស្ទឹងត្រែង រតនៈគិរី មណ្ឌលគិរី ក្រចេះ និង ខេត្តកំពង់ចាម។
គម្រោងចែកចាយអគ្គិសនី នៅទូទាំងប្រទេស គឺជាផែនការយុទ្ធសាស្ត្រដ៏វែងឆ្ងាយ សម្រាប់ការអភិវឌ្ឍន៍ប្រទេស។ នោះគឺ រដ្ឋាភិបាលកំណត់ថា ការភ្ជាប់បណ្តាញខ្សែបញ្ជួនអគ្គិសនី ឲ្យដូចជាផ្លូវថ្នល់ ដែលប្រទាក់ក្រឡាគ្នា។ ពោលគឺតភ្ជាប់ខ្សែបណ្តាញ ពីវារីអគ្គិសនី មានជាអាទិ៍ នៅតំបន់ភាគខាងត្បូងប្រទេស ពីខេត្តកំពត ចេញពីវារីអគ្គិសនីស្ទឹងកំចាយ-កម្លាំង ១៩៣ មេហ្គាវ៉ាត់ ឆ្ពោះទៅកាន់ខ្សែបណ្តាញមេ នៅទីរួមខេត្តតាកែវ។ ខ្សែបណ្តាញមេនេះ បានតភ្ជាប់អគ្គិសនី មកពីប្រទេសវៀតណាម តាមច្រកភ្នំដិន កម្លាំង ២០០ មេហ្គាវ៉ាត់ ចូលមកកាន់ទីក្រុងភ្នំពេញ។ រដ្ឋាភិបាលក៏ បានរៀបចំតភ្ជាប់ តាមតំបន់ឆ្នេរសមុទ្រ ពីកំពត ទៅកាន់ក្រុងព្រះសីហនុ។ ក្រុងព្រះសីហនុ ដែលកំពុងសាងសង់រោងចក្រអគ្គិសនីកម្លាំង ២០០ មេហ្គាវ៉ាត់ ដោយប្រើប្រាស់ធ្យូងថ្ម។ ថាមពលអគ្គិសនី ដោយប្រើប្រាស់ធ្យូងថ្ម នៅកំពង់សោមនេះ ក៏នឹងត្រូវតភ្ជាប់ខ្សែបញ្ជូន តាមផ្លូវជាតិលេខ ៤ មកកាន់វារីអគ្គិសនីគិរីរម្យ។ វារីអគ្គិសនីគិរីរម្យ បានតភ្ជាប់ខ្សែបណ្តាញរួចហើយ មកកាន់ក្រុងភ្នំពេញ។ ចំណែកនៅភាគពាយ័ព្យ ខេត្តជាប់បឹងទន្លេសាបឯណោះវិញ វារីអគ្គិសនីធំៗចំនួន ៤ ក្នុងខេត្តពោធិសាត់ មានកម្លាំងសរុបជាង ៩០០ មេហ្គាវ៉ាត់-វិនិយោគដោយក្រុមហ៊ុន មកពីប្រទេសចិន ក៏កំពុង តែដំណើរការសាងសង់។ ខ្សែបណ្តាញបញ្ជូនអគ្គិសនី ពីខេត្តពោធិសាត់ កាត់តាមខេត្តកំពង់ឆ្នាំង ចូលមកកាន់ទីក្រុងភ្នំពេញ ក៏កំពុងតែសិក្សាសាងសង់។ វារីអគ្គិសនី នៅខេត្តពោធិសាត់នេះ ក៏នឹងត្រូវតភ្ជាប់ ទៅកាន់ខេត្តបាត់ដំបង និង ឆ្ពោះទៅកាន់ ខេត្តបន្ទាយមានជ័យ ជាប់ព្រំដែនប្រទេសថៃ។ ខេត្តបន្ទាយមានជ័យ មានខ្សែបណ្តាញ បញ្ជូនអគ្គិសនីរួចហើយ ទៅកាន់ខេត្តសៀមរាប។ វារីអគ្គសនីនៅខេត្តពោធិសាត់នេះ ក៏នឹងត្រូវតភ្ជាប់ខ្សែបណ្តាញបញ្ជូនអគ្គិសនី ទៅកាន់ខេត្តកោះកុង ដើម្បីផ្គត់ផ្គង់អគ្គិសនី ដល់រោងចក្រសហគ្រាស តំបន់សេដ្ឋកិច្ចពិសេស និង តំបន់អភិវឌ្ឍន៍នានាមួយចំនួនទៀត។ ចំណែកខេត្តនៅព្រំដែនឡាវ រដ្ឋាភិបាលក៏កំពុងតែរៀបចំខ្សែបណ្តាញបញ្ជូនអគ្គិសនី មកកាន់ខេត្តស្ទឹងត្រែង និង ក្រចេះ ដើម្បីតភ្ជាប់នឹងខ្សែបញ្ជូន ពីខេត្តកំពង់ចាម។ នៅឯខេត្តស្វាយរៀង និងខេត្តព្រៃវែង ជាប់ព្រំដែនប្រទេសវៀតណាមឯណោះវិញ ក៏បានតភ្ជាប់បណ្តាញអគ្គិសនី ពីប្រទេសវៀតណាម រួចរាល់ហើយ។
ប៉ុន្តែបច្ចុប្បន្ន ប្រជាជនកម្ពុជាបានចំណាយតម្លៃអគ្គិសនីខ្ពស់។ នេះក៏ព្រោះតែអគ្គិសនីទាំងនោះ ពឹងផ្អែកតែលើម៉ាស៊ីនភ្លើងរបស់ឯកជន។ ចំណែកបណ្តាខេត្តមួយចំនួន ជាប់ព្រំដែនប្រទេសថៃ ឡាវ និងខេត្តជាប់ព្រំដែនវៀតណាម បានប្រើប្រាស់ភ្លើងអគ្គិសនី មកពីប្រទេសជិតខាងទាំងនោះ។ អ៊ីចឹងបើសិនជាប្រទេសជិតខាង មិនសប្បាយចិត្ត នោះប្រជាជនកម្ពុជា នឹងជួបការលំបាក។ ផ្ទុយទៅវិញ នៅពេល ដែលវារីអគ្គិសនីស្ទឹងកំចាយ ខេត្តកំពត វារីអគ្គិសនីនៅខេត្តពោធិសាត់ និង វារីអគ្គសនីនៅខេត្តភាគឦសាន ក្នុងខេត្តរតនៈគិរី ក្រចេះ និង ខេត្តស្ទឹងត្រែង ដែលសព្វថ្ងៃ កំពុងតែដំណើរការសាងសង់ គឺនៅពេលបញ្ចប់គម្រោងទាំងនេះ នាំឲ្យប្រទេសកម្ពុជា មានភ្លើងអគ្គិសនីប្រើប្រាស់គ្រប់គ្រាន់ ទាំងនៅទីប្រជុំជន និង ទាំងនៅតំបន់ជនបទ ដាច់ស្រយាល។ ក៏ប៉ុន្តែគម្រោងនេះ អាចនឹងសម្រេចទៅបាន ទាល់តែដល់ឆ្នាំ២០២០ ឯណោះ។
ប្រព័ន្ធ វារី អគ្គីសនី ភ្នំកំចាយ (រូបថត ៖ សុវណ្ណារ៉ា)
ផ្លូវ និង ភ្លើង គឺជាឆ្អឹងខ្នង សម្រាប់ការអភិវឌ្ឍន៍ប្រទេស។ រដ្ឋាភិបាលកម្ពុជា បានកំណត់ដូច្នេះ។ នៅទូទាំងប្រទេស ត្រូវមានខ្សែបណ្តាញ បញ្ជូនអគ្គិសនី-តភ្ជាប់គ្នា ដោយមិនអាចខ្វះបាន។ ដើម្បីកាត់បន្ថយការពឹងពាក់លើការប្រើប្រាស់ប្រេងឥន្ធនៈ។ សព្វថ្ងៃ កម្ពុជា ប្រើប្រាស់ប្រេង ស្ទើរតែទាំងអស់ ដើម្បីផលិតអគ្គិសនី។ ដូច្នេះ នៅពេលប្រេងឡើងថ្លៃ នាំឲ្យអគ្គិសនីត្រូវឡើងថ្លៃខ្ពស់ដែរ។ ក៏ប៉ុន្តែសម្រាប់នៅភ្នំពេញ រដ្ឋាភិបាល បានបំពេញខាត ចំនួន ២០ លានដុល្លារ ក្នុងមួយឆ្នាំៗ ដើម្បីកុំឲ្យភ្លើងឡើងថ្លៃ។ ម្យ៉ាងទៀត នៅពេលដែលវារីអគ្គិសនីស្ទឹងកំចាយ ខេត្តកំពត វារីអគ្គិសនីខេត្តពោធិសាត់ និង វារីអគ្គិសនីនៅខេត្តភាគឦសាន ត្រូវបានសាងសង់រួចរាល់-នាពេលខាងមុខ តម្លៃភ្លើងអគ្គិសនីនៅទូទាំងប្រទេស នឹងត្រូវចុះថោក ជាងសព្វថ្ងៃ។ សព្វថ្ងៃ ភ្លើងអគ្គិសនី នៅភ្នំពេញ តម្លៃ ១៧ សេន ក្នុង១ គីឡូវ៉ាត់ម៉ោង តែនៅពេលភ្លើងអគ្គិសនី បានមកពីវារីអគ្គិសនីនោះ ភ្លើងនឹងមានតម្លៃត្រឹមតែ ១០ សេន ក្នុងមួយគីឡូវ៉ាត់ម៉ោងប៉ុណ្ណោះ។ ដូចគ្នានេះដែរ ការពង្រីក និង រៀបចំខ្សែបណ្តាញ តាមរយៈវារីអគ្គិសនីនៅកម្ពុជាពេលនេះ ក៏ជាការចូលរួមចំណែកយ៉ាងសំខាន់ ដើម្បីកាត់បន្ថយផលប៉ះពាល់បរិស្ថានឧស្ម័នផ្ទះកញ្ចក់ផងដែរ៕
No comments:
Post a Comment