សមាជិកសភាគណបក្សសមរង្ស៊ី នៅតែជម្នះទៅសួរសុខទុក្ខកសិករជាប់ពន្ធនាគារខេត្តស្វាយរៀង
- Thursday, January 14, 2010, 14:20
- ពត៌មានពិសេស, ពត៌មានភាសាខ្មែរ, សេដ្ឋកិច្ច & នយោបាយ
- 49 views
- បញ្ចេញមតិផ្ទាល់ខ្លួន
ដោយ : សុភ័ក្ត្រ
ថ្ងៃទី 14 មករា 2010
CEN
សមាជិកសភា គណបក្ស សម រង្ស៊ី កាលពី ថ្ងៃ ទី ១៤ ធ្នូ ឆ្នាំ ២០០៩ បាន ចុះ ទៅ កាន់ ព្រំដែន កម្ពុជា - វៀតណាម ។ ជា ទី ដែល លោក សម រង្ស៊ី បាន ដឹកនាំ អ្នកភូមិ ចុះ ដក តម្រុយ បង្គោល ព្រំដែន ចេញពី ដី ស្រែ កសិករ ខ្មែរ ។ កាលណោះ មាន ការប្រឈមមុខ ជា មួយ អាជ្ញាធរ រា រាំង ម្តង ហើយ ។ ក៏ ប៉ុន្តែ នៅពេល នេះ សមាជិកសភា គណបក្ស សមរង្ស៊ី ក៏ បាន ប្រកាស ចុះ ទៅ សួរសុខទុក្ខ កសិករ ជាប់ឃុំ ក្នុង រឿង ដក តម្រុយ ព្រំដែន និង ចុះ ទៅ មើល កន្លែង ដក តម្រុយ បង្គោល ក្នុង ឃុំ សំរោង ស្រុក ចន្ទ្រា ខេត្ត ស្វាយរៀង ជាថ្មី ម្តងទៀត ៕
ភ្នំពេញ: សមាជិកសភាគណបក្សសមរង្ស៊ី បានប្រកាសនៅថ្ងៃទី១៤មករានេះថា ពួកគេនៅតែធ្វើដំណើរទៅសួរសុខទុក្ខ ប្រជាកសិករ ២ រូប ដែលជាប់ឃុំឃាំង នៅពន្ធនាគារខេត្តស្វាយរៀង នាថ្ងៃទី ១៩ មករា ឆ្នាំ ២០១០ បើទោះបីជាក្រសួងមហាផ្ទៃ បានបដិសេធសំណើសុំក៏ដោយ។
សេចក្តីប្រកាសបែបនេះ បានធ្វើឡើងភ្លាមៗ បន្ទាប់ពីក្រសួងមហាផ្ទៃ បានបដិសេធនូវសំណើរបស់អគ្គលេខាធិការ គណបក្សសមរង្ស៊ី ដែលបានសុំការអនុញ្ញាត ឲ្យសមាជិកសភា និង សមាជិកព្រឹទ្ធសភារបស់គណបក្សសមរង្ស៊ី សរុបចំនួន ២៦ រូប ចូលជួបសួរសុខទុក្ខប្រជាកសិករ ២ រូប នៅពន្ធនាគារខេត្តស្វាយរៀង នាព្រឹកថ្ងៃទី ១៩មករា ឆ្នាំ ២០១០។
ប្រជាកសិករ ២ រូបនោះ គឺ អ្នកស្រី មាស ស្រី និង លោក ព្រំ ជា ត្រូវបានចាប់ឃុំខ្លួន កាលពីថ្ងៃទី ២២ ធ្នូ ឆ្នាំ ២០០៩ ក្រោម បទចោទប្រកាន់ ក្នុងរឿងដកតម្រុយបង្គោលព្រំដែនលេខ ១៨៥ រវាងប្រទេសកម្ពុជា និង វៀតណាម។ អ្នកទាំង ២ រួមទាំងកសិករ ៣ នាក់ទៀត ដែលកំពុងរត់គេចខ្លួន ត្រូវតុលាការខេត្តស្វាយរៀង ធ្វើការជាប់ចោទ ដូចគ្នានឹងលោក សម រង្ស៊ី ដែរ។
នៅព្រឹកថ្ងៃទី ១៤ មករានេះ លោក យឹម សុវណ្ណ អ្នកនាំពាក្យគណបក្សសមរង្ស៊ី បានប្រាប់អ្នកកាសែតថា ទោះជាមិនមាន ការអនុញ្ញាត ពីក្រសួងមហាផ្ទៃ តាមសំណើរបស់យើងក៏ដោយ ក៏សមាជិកសភា និង សមាជិកព្រឹទ្ធសភារបស់គណបក្សសមរង្ស៊ី នៅព្រឹកថ្ងៃទី ១៩ មករា អាទិត្យក្រោយនេះ នឹងធ្វើដំណើរទៅកាន់ពន្ធនាគារខេត្តស្វាយរៀង ដើម្បីព្យាយាមចូលសួរសុខទុក្ខ កសិករ ២ នាក់ ដែលជាប់ពន្ធនាគារខេត្តស្វាយរៀង។
លោក យឹម សុវណ្ណ បានបញ្ជាក់ថា បើទោះជាមិនបានចូលជួបមុខអ្នកទាំង ២ ក៏សមាជិកសភាគណបក្សសមរង្ស៊ី នាំគ្នាទៅ ឈរថ្លែងការណ៍ ប្រាប់ដល់ក្រុមអ្នកកាសែត នៅមុខពន្ធនាគារខេត្តស្វាយរៀង ជាប់ព្រំដែនវៀតណមនោះ។ បន្ទាប់មកគណបក្សសមរង្ស៊ី នឹងទៅសួរសុខទុក្ខអ្នកភូមិ នៅឃុំសំរោង ស្រុកចន្ទ្រា ជាប់ព្រំដែនវៀតណាម។ ជាទីកន្លែង ដែលលោកសមរង្ស៊ី បានដឹកនាំអ្នកភូមិ ចុះទៅ ដកបង្គោលតម្រុយព្រំដែន ហើយនាំដល់ការប្តឹងផ្តល់ពេលនេះ។
សូមរម្លឹកថា ក្នុងសំណុំរឿងដកតម្រុយបង្គោលព្រំដែនលេខ ១៨៥ រវាងប្រទេសកម្ពុជា និង ប្រទេសវៀតណាម ត្រូវបានតុលាការ ខេត្តស្វាយរៀង កំណត់បើកសវនាការជំនុំជម្រះ នៅព្រឹកថ្ងៃទី ២៧ មករា ឆ្នាំ ២០១០។ នោះគឺកាត់ទោស លោក សមរង្ស៊ី និង អ្នកភូមិ ៥ រូប ពីបទបំផ្លាញតម្រុយបង្គោលព្រំដែន និង ការញុះញុងជាតិសាសន៍។ បទចោទប្រកាន់នេះ ត្រូវមានទោសជាប់ពន្ធនាគារពី ១ ឆ្នាំ ទៅ ៣ឆ្នាំ៕
No comments:
Post a Comment