រមណីយដ្ឋានអេកូទេសចរណ៍មួយដែលលាក់ខ្លួននៅព្រែកតាតៃ
- Saturday, January 16, 2010, 9:05
- ពត៌មានភាសាខ្មែរ, សេដ្ឋកិច្ច & នយោបាយ
- 29 views
- បញ្ចេញមតិផ្ទាល់ខ្លួន
កោះកុង: វាទំនងមិនគួរឱ្យជឿដែលដៃព្រែកមួយបង្កើតឱ្យមានរមណីយដ្ឋានលើទឹកប្រកបដោយផាសុកភាព ។
ធ្វើដំណើរចេញពីគល់ស្ពានតាតៃ (ស្ពានទី៤ ពីភ្នំពេញ-កោះកុង) តាមផ្លូវទឹកដោយមានកាណូតដឹកជញ្ជូនឆ្ពោះទៅកាន់ដៃព្រែកខាងលើជាប់ លំហសមុទ្រចម្ងាយប្រមាណកន្លះគីឡូម៉ែត្រ ដែលអមសងខាងព្រែកហ៊ុមព័ទ្ធ ដោយធម្មជាតិបៃតង
ស្រស់ត្រកាលគួរឱ្យទាក់ទាញភ្ញៀវទេសចរ យើងនឹង ឃើញរមណីយដ្ឋានបណ្តែតទឹកមួយផុសឡើងកណ្តាលទឹកគួរឱ្យចម្លែក ។
ស្រស់ត្រកាលគួរឱ្យទាក់ទាញភ្ញៀវទេសចរ យើងនឹង ឃើញរមណីយដ្ឋានបណ្តែតទឹកមួយផុសឡើងកណ្តាលទឹកគួរឱ្យចម្លែក ។
ក្នុងឱកាសចុះទៅស្វែងយល់អេកូទេសចរណ៍កាលពីសប្តាហ៍មុនរបស់ក្រសួងទេសចរណ៍ដឹកនាំដោយលោករដ្ឋមន្ត្រី ថោង ខុន លោករដ្ឋមន្ត្រី បានទៅដល់ទីនោះ ។ រមណីយដ្ឋានខ្មែរនោះមានបន្ទប់ផ្ទះសំណាក់សង់លើទឹកគ្របដណ្តប់ដោយតង់ក្រណាត់ចំនួន ១២ ផ្ទះសំណាក់ និងមានសំណង់រដ្ឋបាល មួយបម្រើសេវាគ្រប់ផ្នែកទាំងអស់ ចំពោះភ្ញៀវទេសចរដែលបានទៅលេងកម្សាន្ត និងស្នាក់នៅទីនេះ មានទាំងការហូបចុក ម្ហូបអាហារគ្រប់គ្រាន់តាមខ្នាត អន្តរជាតិ ។
លោក វ៉ាឡង់ទីន ផាវលីក (Valentin Pawlik) នាយកគ្រប់គ្រងរមណីយដ្ឋានអេកូតាតៃបានប្រាប់អ្នកសារព័ត៌មានថា ពីខែមេសា ឆ្នាំ២០០៩ គាត់បានមកឃើញទីតាំងនេះគួរឱ្យទាក់ទាញ និងគួរឱ្យទុកចិត្តលើសុវត្ថិភាព ។ ដោយឆ្លងកាត់ការយល់ព្រមពីអាជ្ញាធរខេត្ត គាត់សម្រេចវិនិយោគនូវ រមណីយដ្ឋាននេះឡើងក្នុងតម្លៃមួយលានដុល្លារអាមេរិកក្នុងដំណាក់កាលដំបូង ។ ទីនេះគឺជាតំបន់អេកូដ៏ទាក់ទាញភ្ញៀវទេសចរមិនថាភ្ញៀវបរទេស ឬភ្ញៀវ ក្នុងស្រុកទេ ។ ទីនេះគឺសប្បាយនឹងធម្មជាតិពិតៗមិនធ្វើតាមបែបសិប្បនិម្មិតទេ ។ ទីនេះអាចស្រូបយកខ្យល់អាកាសបរិសុទ្ធ អាចសម្រួលសុខភាពបានល្អ ។ គ្មានការបំពុលបរិស្ថានមកលាយឡំក្នុងតំបន់រមណីយដ្ឋាននេះឡើយ ។
លោកនាយកគ្រប់គ្រងបានឱ្យដឹងទៀតថា អ្នកមកស្នាក់នៅរមណីយដ្ឋាននេះអាចទៅកម្សាន្តព្រៃកោងកាង អាចជិះទូកលេងតាមព្រែក ។ សេវា បម្រើតាមស្តង់ដារអន្តរជាតិទាំងអស់ ។ ធានាសុវត្ថិភាពដល់ភ្ញៀវទាំងយប់ទាំងថ្ងៃ ។ ភ្ញៀវខ្មែរអ្នកមានលុយប្រហែលជាមិនសូវបានឮ បានស្គាល់នូវទិដ្ឋភាព នៃរមណីយដ្ឋាននេះទេ ហើយអ្វីគួរចាប់អារម្មណ៍គឺសុវត្ថិភាព ។ ចំណែកភ្ញៀវទេសបរទេសវិញទីនេះ គឺជាចំណុចពិសេសដែលគេចូលចិត្តបំផុត ។ ភ្ញៀវ ទេសចរដែលនិយមបរិស្ថានបានចាត់ទុកទីនេះជាមណ្ឌលសុខភាពរបស់គេ ពីព្រោះជាតំបន់អេកូទេសចរណ៍មួយសម្បូរដោយធម្មជាតិស្អាតស្រស់បំព្រង ។
លោក ថោង ខុន បានចាត់ទុករមណីយដ្ឋាននេះជាទីតាំងដកពិសោធន៍មួយសម្រាប់ការអភិវឌ្ឍន៍ផ្នែកអេកូទេសចរណ៍ដទៃៗទៀត ។ មន្ត្រីទេសចរណ៍ពាក់ព័ន្ធទាំងអស់គួរតែស្វែងយល់ និងរៀនសូត្រតាម ។ សុំឱ្យអ្នកគ្រប់គ្រងរមណីយដ្ឋាននេះធ្វើយ៉ាងណាគោរពបទដ្ឋានបច្ចេកទេស និងបែបបទបរិស្ថានឱ្យបានត្រឹមត្រូវ ។ ទូទាំងប្រទេសមាន ៣០ សហគមន៍អេកូទេសចរណ៍ត្រូវបានបង្កើតឡើង ។ ក្នុងនោះខេត្តកោះកុងមាន ៣ សហគមន៍ ។ ភ្ញៀវទេសចរប្រមាណ ៦០ ភាគរយ បានងាកមកលេងកម្សាន្តតាមសហគមន៍អេកូទេសចរណ៍ ដូច្នេះអ្វីដែលកើតឡើង ហើយត្រូវរក្សាការពារឱ្យបានល្អ ។
លោក Valentin បានបញ្ជាក់ទៀតថា ទីនេះមានភ្លើងអគ្គិសនីប្រើដោយសូឡាផង ដោយម៉ាស៊ីនភ្លើងផង ។ កាកសំណល់រឹង និងរាវត្រូវបាន កែលំអសម្អាតស្របតាមបច្ចេកទេសស្តង់ដារ មិនឱ្យមានការខូចបរិស្ថានអ្វីឡើយ ។ ភ្ញៀវមកពេញផ្ទះសំណាក់ ។ អ្នកបម្រើខ្មែរធ្វើការនៅទីនោះមាន ប្រមាណ ២០ នាក់ ប្រកបដោយគុណភាពខ្ពស់ ។ តម្លៃស្នាក់នៅមួយយប់មួយថ្ងៃ ១៧០ ដុល្លារ ។ តង់បន្ទប់ស្នាក់នៅនីមួយៗមានទំហំ ៩០ ម៉ែត្រការ៉េ ។ នាយកគ្រប់គ្រងរូបនេះសង្ឃឹមថា នឹងពង្រីកតង់ (ផ្ទះសំណាក់បណ្តែតទឹក) បន្ថែម ហើយអាចមានគម្រោងវិនិយោគដល់ទៅ ៥០ឆ្នាំ ៕
No comments:
Post a Comment