ឌុច ទទួលស្គាល់ថា ការសម្រេចចិត្តរបស់ខ្លួននាំឲ្យមានឧក្រិដ្ឋកម្មនៅស-២១
ដោយ ហ៊ុយ វណ្ណៈ
2009-08-12
ជនជាប់ចោទ កាំង ហ្កេកអ៊ាវ ហៅ ឌុច ថ្លែងគូសបញ្ជាក់ថា ដោយសារចំណុច៣យ៉ាងនៅក្នុងរបៀបនៃការសម្រេចចិត្តរបស់គាត់ ទើបបណ្តាលឲ្យមានឧក្រិដ្ឋកម្មលើមនុស្សជាង ១ម៉ឺននាក់ នៅមន្ទីរស-២១ ឬគុកទួលស្លែង នាអំឡុងរបបខ្មែរក្រហម។
ក្នុងអង្គសវនាការនាថ្ងៃអង្គារ ទី១១ ខែសីហា ឌុច ថ្លែងថា មូលហេតុសំខាន់ទី១ ដែលនាំឲ្យមានឧក្រិដ្ឋកម្មនៅក្រោមការដឹកនាំរបស់គាត់ គឺបណ្តាលមកពីគាត់មិនស្តាប់តាមគំនិតត្រឹមត្រូវ ៖ «ឧទាហរណ៍ បទឧទ្ទេសនាមថ្ងៃ១៨ កុម្ភៈ ១៩៧៦ ដែលខ្ញុំយកពួកអ្នកតស៊ូក្រុងមក ហើយកម្ចាត់ទស្សនៈត្រឹមត្រូវរបស់គេ ដាក់ទស្សនៈឧក្រិដ្ឋឲ្យគេវិញ។ ទស្សនៈត្រឹមត្រូវគឺស្អី? តើមនុស្សដែលចាប់មកខ្មាំងមែនឬក៏មិនមែន? នេះគឺទស្សនៈត្រឹមត្រូវរបស់គេ។ ចំណែកខ្ញុំយកទស្សនៈឧក្រិដ្ឋរបស់បក្សកុម្មុយនីស្តកម្ពុជា ទៅដាក់ឲ្យគេ។ មនុស្សទាំងអស់ណាដែលបក្សចាប់មកហើយ ត្រូវចាត់ទុកជាខ្មាំង បើមិត្តឯងមិនចាត់ទុកជាខ្មាំងទេ មិត្តឯងសួរចម្លើយមិនចេញទេ។ នេះឧក្រិដ្ឋកម្មដ៏ធ្ងន់ធ្ងរបំផុត លើសអ្វីទាំងអស់ដែលខ្ញុំទទួលទៅលើអាយុជីវិតមនុស្សជាងមួយម៉ឺននាក់ គឺនៅត្រង់ហ្នឹងធ្ងន់ជាងគេ»។
ឌុច ថ្លែងបន្តទៀតថា មូលហេតុទី២ ដែលនាំឲ្យមានឧក្រិដ្ឋកម្មដែរនោះ គឺដោយសារតែគាត់ចេញបញ្ជាឲ្យចាប់មនុស្ស ដែលកំពុងមានសេរីភាពយកទៅសួរចម្លើយ ៖ «មនុស្សនៅរស់ មនុស្សដែលមានសេរីភាព ខ្ញុំសរសេរឯកសារទៅជូនមេ មេគេអ្នកសម្រេចមែន ប៉ុន្តែឯកសារហ្នឹងវាចេញពីដៃខ្ញុំ ដូច្នេះឧក្រិដ្ឋកម្មទៅលើមនុស្សដែលនៅមានសេរីភាព វាធ្ងន់ជាងឧក្រិដ្ឋកម្មទៅលើមនុស្សដែលគេសម្រេចចាប់ចងរួចមកហើយ»។
ចំណែកឯចំណុចសំខាន់ទី៣ដែលនាំឲ្យមានឧក្រិដ្ឋកម្មនៅគុកទួលស្លែងដែរនោះ គឺដោយសារតែគាត់បញ្ជាឲ្យគេនាំយកមនុស្សទៅសម្លាប់ចោលនៅទីពិឃាតបឹងជើងឯក ៖ «វាស្ថិតនៅក្នុងក្របខ័ណ្ឌដែលខ្ញុំគ្រប់គ្រង អ្នកឯងមិនធ្វើតាមបញ្ជាខ្ញុំ អ្នកឯងអត់បានទេ»។
យោងតាមប្រសាសន៍សាក្សីម្នាក់ គឺលោក សោម ម៉េត ជាអតីតយុទ្ធជនកងការពារអ្នកទោសនៅគុកទួលស្លែង បានឆ្លើយក្នុងតុលាការនៅថ្ងៃអង្គារនេះថា សូម្បីតែបុគ្គលិកមួយចំនួននៃគុកទួលស្លែង ក៏ត្រូវ ឌុច បញ្ជាឲ្យចាប់ខ្លួននិងនាំយកទៅសម្លាប់ផងដែរ ហើយក្នុងនោះក៏មានបងប្រុសលោកផងដែរ។
លោក សោម ម៉េត ថ្លែងទៀតថា នៅពេលនោះ ទោះបីជាដឹងអំពីការចាប់មនុស្សតាមខ្សែនិងការចាប់មនុស្សជាប្រព័ន្ធបានកើតឡើងក៏ដោយ ក៏គ្មានអ្នកហ៊ានតវ៉ានិងហ៊ានរត់គេចចេញពីគុកទួលស្លែងនោះដែរ។
លោក សោម ម៉េត ឆ្លើយបំភ្លឺយ៉ាងដូច្នេះថា ៖ «ហើយឲ្យខ្ញុំរត់ទៅណា? បើខ្ញុំរត់រួច ឪពុកម្ដាយខ្ញុំ បងប្អូននៅស្រុកច្បាស់ជាងាប់ហើយ គ្មានៅទេ ស្រាវជ្រាវចាប់យកមកដាក់គុកទាល់តែអស់»។
ឌុច ថ្លែងទទួលស្គាល់ថា ការសម្រេចចិត្តបីចំណុចរបស់គាត់នោះ គឺជាកំហុស និងអំពើឧក្រិដ្ឋរបស់គាត់លើមនុស្សជាង ១ម៉ឺននាក់នៅគុកទួលស្លែងដែលរួមទាំងគ្រួសាររបស់ សោម ម៉េត ផងដែរ។
ប៉ុន្តែ លោក ប៊ូ ម៉េង ជាអតីតជនរងគ្រោះម្នាក់នៅគុកទួលស្លែង ថ្លែងថា បើ ឌុច ដឹងកំហុសក្នុងការដឹកនាំរបស់ខ្លួនតាំងពីពេលនោះ ម្ល៉េះគ្មានមនុស្សស្លាប់ច្រើននៅប្រទេសកម្ពុជាក្នុងគ្រានោះឡើយ៕
No comments:
Post a Comment