ដោយ សុខ សេរី
2009-08-21
រដ្ឋាភិបាលកម្ពុជានិងក្រសួងមហាផៃ្ទ នៅថៃ្ងសុក្រ ទី២១ ខែសីហា កំពុងតែកសាងសំណុំរឿងនិងរកមេធាវីប្រមូលភស្តុតាងនានាដើម្បីប្តឹង លោក ជា មុនី ប្រធានសហជីពសេរីកម្មករកម្ពុជា ក្រោមបទផ្សាយព័ត៌មានមិនពិតនិងបទញុះញង់បំភ្លៃការពិត។
លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា។
លោក ខៀវ កាញារីទ្ធ ជាមន្រ្តីអ្នកនាំពាក្យរបស់រដ្ឋាភិបាលកម្ពុជា បានមានប្រសាសន៍បញ្ជាក់ប្រាប់វិទ្យុអាស៊ីសេរី នៅថៃ្ងសុក្រ ទី២១ ខែសីហា ថា រដ្ឋាភិបាលនិងក្រសួងមហាផៃ្ទកំពុងតែរកមេធាវីរបស់រដ្ឋាភិបាលសិក្សានិងកសាងសំណុំរឿងនិងភស្តុតាងនានា ដើម្បីប្តឹង លោក ជា មុនី ទៅតុលាការសាលាដំបូងរាជធានីភ្នំពេញនៅថៃ្ងសុក្រ ក្រោមបទផ្សាយព័ត៌មានមិនពិត។
រីឯលោក ខៀវ សុភ័គ ជាមន្រ្តីអ្នកនាំពាក្យរបស់ក្រសួងមហាផៃ្ទ បានមានប្រសាសន៍ថា ក្រសួងមហាផៃ្ទរក្សាសិទ្ធិក្នុងការប្តឹង លោក ជា មុនី នោះ នាពេលឆាប់ៗនេះ ក្រោមបទផ្សាយព័ត៌មានមិនពិតនិងបទញុះញង់ ដោយបានប្រើប្រាស់តុលាការសាលាឧទ្ធរណ៍ជាវេទិកាឃោសនានិងបំភ្លៃការពិត។
ផែនការនៃការប្តឹង លោក ជា មុនី នាពេលឆាប់ៗនេះ ក្រោយពីលោក ជា មុនី នោះ បានធ្វើសក្ខីកម្មនៅក្នុងសវនាការមួយនៅឯតុលាការសាលាឧទ្ធរណ៍ កាលពីថៃ្ងទី១៧ ខែសីហាកន្លងទៅនេះ ជុំវិញសំណុំរឿងឃាតកម្មលើ លោក ជា វិជ្ជា អតីតប្រធានសហជីពសេរីកម្មករកម្ពុជា ដែលមានលោក ប៊ន សំណាង និងលោក សុខ សំអឿន រងការចោទប្រកាន់ថាជាឃាតករនោះ។
នៅក្នុងសវនាការនោះ លោក ជា មុនី បានបដិសេធថា លោក ប៊ន សំណាង និងលោក សុខ សំអឿន នោះ មិនមែនជាឃាតករបាញ់សម្លាប់ លោក ជា វិជ្ជា ជាបងប្រុសរបស់លោកទេ។ លោកបានស្រែកយ៉ាងខ្លាំងៗថា រដ្ឋាភិបាលកម្ពុជាជាអ្នករៀបចំផែនការសម្លាប់បងប្រុសរបស់លោក។
លោក ជា មុនី ប្រធានសហជីពសេរីកម្មករកម្ពុជា បានមានប្រសាសន៍ថា លោកមិនតក់ស្លុតចំពោះការប្តឹងនេះទេ ៖ «បើសិនជាក្រសួងមហាផ្ទៃ ក៏ដូចជារដ្ឋាភិបាល មានគម្រោងនឹងប្ដឹង គឺខ្ញុំស្វាគមន៍»។
លោកបានបញ្ជាក់ថា លោកនឹងមិនស្វែងរកមេធាវីការពារក្តីរបស់លោកទេ បើសិនណារដ្ឋាភិបាលកម្ពុជានិងក្រសួងមហាផៃ្ទប្តឹងលោកមែននោះ គឺលោកចង់តទល់ក្តីនេះដោយខ្លួនឯង។
លោក អំ សំអាត ប្រធានផែ្នកស៊ើបអង្កេតនៃអង្គការក្រៅរដ្ឋាភិបាលមួយ ហៅកាត់ថា លីកាដូ បានមានប្រសាសន៍ថា នោះគ្រាន់តែជាសម្ដីចេញពីអារម្មណ៍ក្តុកក្តួលរបស់លោក ជា មុនី តែប៉ុណ្ណោះ។
លោក អំ សំអាត បានបញ្ជាក់ថា ៖ «វាក៏អាចជារឿងមួយដែលធ្វើឲ្យសាធារណមតិបានមានការយល់ច្រឡំថា វាជារឿងមួយដែលបំបិទសិទ្ធិសេរីភាពឬក៏ស្អីក្នុងការបញ្ចេញមតិទៅវិញ»។
លោក ប៊ន សំណាង និងលោក សុខ សំអឿន ដែលមជ្ឈដ្ឋានសង្គមស៊ីវិលនិងអង្គការការពារសិទ្ធិមនុស្សអន្តរជាតិនានា បានរៀបរាប់ថាជាឃាតករសិប្បនិម្មិតនោះ ត្រូវបានតុលាការសាលាឧទ្ធរណ៍សម្រេចកាលពីថៃ្ងទី១៧ ខែសីហាកន្លងទៅនេះ ឲ្យបន្តនៅក្រៅឃុំឬមានសេរីភាពជាបន្តទៀត ហើយបង្គាប់ឲ្យបើកការស៊ើបអង្កេតបន្ថែមចំពោះការចន្លោះប្រហោងកន្លងមក។
អ្នកទាំងពីរត្រូវបានតុលាការសាលាដំបូងរាជធានីភ្នំពេញកាត់ទោសឲ្យជាប់គុកម្នាក់ៗ២០ឆ្នាំ ក្រោមបទចោទថាបានបាញ់សម្លាប់ លោក ជា វិជ្ជា អតីតប្រធានសហជីពសេរីកម្មករកម្ពុជា កាលពីថៃ្ងទី២២ ខែមករា ឆ្នាំ២០០៤កន្លងទៅ ដែលជាបងប្រុសបង្កើតរបស់លោក ជា មុនី នោះ៕
No comments:
Post a Comment