បេក្ខជនប្រឡងបាក់ឌុបនៅស្ទឹងត្រែងតវ៉ាពីភាពមិនប្រក្រតីក្នុងការកែ
ដោយ រដ្ឋា វីសាល
2009-08-26
សិស្សជាបេក្ខជនប្រឡងសញ្ញាបត្រមធ្យមសិក្សាបត្រទុតិយភូមិ នៅមណ្ឌលប្រឡងខេត្តស្ទឹងត្រែង ជិត១០០នាក់ ទាមទារឲ្យមានការពិនិត្យឡើងវិញនូវកំណែវិញ្ញាសាប្រឡងរបស់ពួកគេក្រោមហេតុផលថា មានភាពមិនប្រក្រតីដែលធ្វើឲ្យលទ្ធផលប្រឡងកាលពីពេលថ្មីៗបង្ហាញថាសិស្សជាង៧០%នៅក្នុងខែត្រប្រឡងធ្លាក់។
ទិដ្ឋភាពពេលសិស្សចេញពីមណ្ឌលប្រឡង វិទ្យាល័យទេពប្រណម្យ ក្នុងស្រុកពញាឮ ខេត្តកណ្ដាល កាលពីថ្ងៃ២៧ កក្កដា ២០០៩។
ប្រតិកម្មតវ៉ានេះធ្វើឡើងពីរថ្ងៃបន្តបន្ទាប់គ្នាដោយក្រុមសិស្សជាអតីតបេក្ខជនប្រឡងនៅមណ្ឌលវិទ្យាល័យ ហ៊ុន សែន ខេត្តស្ទឹងត្រែង កាលពីថ្ងៃទី២៤ សីហា ឆ្នាំ២០០៩ ជិត១០០នាក់នាំគ្នាមកកាន់ការិយាល័យសមាគមអាដហុកខេត្ត ដើម្បីសុំឲ្យស្ថាប័នអង្គការក្រៅរដ្ឋាភិបាលមួយនេះជួយ ហើយនៅថ្ងៃទី២៦ សីហា ពួកគេបាននាំញត្តិដាក់ជូនអាជ្ញាធរខេត្តស្ទឹងត្រែង ប្រយោជន៍ជួយអន្តរាគមន៍ទៅក្រសួងអប់រំ។
ឈ្មោះ ហេង ឌីណា តំណាងឲ្យសិស្សអ្នកតវ៉ាមានប្រសាសន៍ថា ៖«គេប្រឡងទាំង១០មុខហ្នឹង អ្នកខ្លះបាន ០,០០ ឡើងទៅ ០,៩។ ពិន្ទុហ្នឹងមានរហូតដល់ ៤៧%។ បង្ខំកូនសិស្សឲ្យស្រាតខោដើម្បីគេឆែកឯកសារ»។
ចំណែកឈ្មោះ ញាណ បុប្ផា តំណាងអ្នកតវ៉ាម្នាក់ទៀតបញ្ជាក់ថា ការរិតបន្តឹងបែបនេះជាភាពអយុត្តិធម៌សម្រាប់ពួកនាងជាសិស្សរៀននៅខេត្តឆ្ងាយដែលភាគច្រើនឪពុកម្តាយមានជីវភាពខ្វះខាត ៖ «សុំឲ្យគេជួយកែម្ដងទៀត ម្នាក់ៗ ០,០០ ២៦៧នាក់»។
ការប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំសិក្សា២០០៨-២០០៩ នៅខេត្តស្ទឹងត្រែង ចាប់ផ្តើមពីថ្ងៃទី២៧ ខែកក្កដា ហើយប្រកាសលទ្ធផលធ្វើឡើងនៅថ្ងៃទី២២ ខែសីហា ឆ្នាំ២០០៩។ ចំណែកលទ្ធផលផ្លូវការមានតែសិស្សជាង២៣%ប៉ុណ្ណោះបានជាប់សញ្ញាបត្រ។
លោក មាន សុវណ្ណារិទ្ធ ប្រធានមណ្ឌលប្រឡងវិទ្យាល័យ ហ៊ុន សែន ខេត្តស្ទឹងត្រែង មានប្រសាសន៍ពីករណីនេះ ៖ «រាងធ្លាក់ច្រើន ប៉ុន្តែរឿងខ្ញុំអត់ដឹងទេ គេមានគណៈកម្មការច្រើន គ្រូគ្រប់ខេត្តទាំងអស់អ្នកកែ ប៉ុន្តែរឿងស្រាតខោស្រាតអីអត់មានទេ»។
វិទ្យុអាស៊ីសេរីមិនអាចសុំការបញ្ជាក់ពី លោក ឡូយ សូផាត អភិបាលខេត្តស្ទឹងត្រែងបានទេ ចំពោះការសុំកិច្ចអន្តរាគមន៍របស់សិស្សខាងលើទៅអាជ្ញាធរខេត្តដោយលោករវល់ប្រជុំ។
លោក ហ៊ូ សំអុល មន្ត្រីស៊ើបអង្កេតសមាគមអាដហុក ខេត្តស្ទឹងត្រែង មានប្រសាសន៍ថា ក្រុមសិស្សអ្នកតវ៉ាបានព្យាយាមដាក់ញត្តិជូនអាជ្ញាធរខេត្ត នៅរសៀលថ្ងៃពុធ ទី២៦ សីហា បន្ទាប់ពីមន្ត្រីសាលាខេត្តតម្រូវឲ្យកែសម្រួលឃ្លាប្រយោគញត្តិមួយចំនួន។
យ៉ាងនេះក្តី លោក សុខ សុខា ប្រធាននាយកដ្ឋានរដ្ឋបាលនិងអធិការកិច្ចក្រសួងអប់រំ មានប្រសាសន៍ថា ក្រសួងមិនទាន់បានដឹងពីការតវ៉ានោះទេ។ លោកថា ញត្តិរបស់សិស្សអាចដាក់ជូនរដ្ឋមន្ត្រីក្រសួងអប់រំដើម្បីចាត់វិធានការ។
លោក សុខ សុខា បានមានប្រសាសន៍ថា ៖ «ទាល់តែដាក់ចូលទៅរដ្ឋមន្រ្តីទៅ ឲ្យយកចូលរដ្ឋមន្រ្តីឲ្យគាត់ពិនិត្យ គាត់ចារមកពួកខ្ញុំ បានខ្ញុំចុះទៅធ្វើកុសល្យវិច័យ»។
កាលពីឆ្នាំសិក្សា២០០៧-២០០៨ លទ្ធផលប្រឡងសញ្ញាបត្រមធ្យមសិក្សាបត្រទុតិយភូមិ នៅខេត្តស្ទឹងត្រែង សិស្សដែលប្រឡងជាប់មានត្រឹមតែ៣៨%តែប៉ុណ្ណោះ៕
No comments:
Post a Comment